ޖަރުމަނުގެ ބަޔާން މިއުނިކް އަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭންގެ އަމާޒަކީ ބަޔާންއާ އެކު ކުރިއަށް ދިޔުން ކަމަށާއި، ހުރިހާ ފޯކަސްއެއް ހުރީ އެ ކުލަބަށް ކަމަށް އޭނާ ބުނެފި އެވެ.

ޓޮޓެންހަމް ދޫކޮށްލުމަށް ފަހު ކޭން ބަޔާން އަށް ބަދަލުވީ 2023 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައި ވަނީ ހަތަރު އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރު އެވެ.

މުސްތަޤުބަލާ ގުޅޭ ގޮތުން ވާހަކަ ދައްކަމުން ކޭން ބުނެފައި ވަނީ، އޭނާ އަށް ފެންނަނީ ބަޔާންގައި ދިގު މުއްދަތެއް ވަންދެން ހުންނަ މަންޒަރު ކަމަށެވެ. އެހެން ނަމަވެސް، މިވަގުތާ ހަމައަށް އައިއިރު އައު އެއްބަސްވުމެއްގެ ވާހަކަ ބަޔާންއާ ދެކެވިފައި ނުވާ ކަމަށާއި، ބަޔާން އިން ބޭނުންވެއްޖެ ނަމަ އެ ފަދަ މަޝްވަރާ އަކަށް ތައްޔާރަށް ހުރި ކަމަށް ކޭން ބުންޏެވެ.

އަލުން އެނބުރި އިނގިރޭސި ޕްރިމިއާ ލީގަށް ގޮސްދާނެތޯ ސުވާލު ކުރުމުން ކޭން ބުނީ، އެކަމުގައި ވަކި އެއްޗެއް ބުނަން ނޭނގޭ ކަމަށެވެ. އެހެން ނަމަވެސް، އެންމެ ފުރަތަމަ ބަޔާން އަށް ބަދަލުވި ދުވަސްވަރު އެ ސުވާލު ކުރި ނަމަ، އަލުން އެނބުރި ޕްރިމިއާ ލީގަށް ދާން ބޭނުންވާ ވާހަކަ ބުނާނެ ކަމުގައި ކޭން ވަނީ ބުނެފަ އެވެ. އެކަމަކު، ބަޔާން އަށް ބަދަލުވެ މިހާރު ދެ އަހަރެއްހާ ދުވަސްވެފައިވާކަން ފާހަގަކޮށް ކޭން ބުނީ، މިހާރު ކަންކަން ބަދަލުވެފައިވާ ކަމަށެވެ.

އެހެން ނަމަވެސް، އަދި ވެސް އަލުން އެނބުރި ޕްރިމިއާ ލީގަށް ދިޔުމަކީ ނުވާނެ ކަމެއްގެ ގޮތުގައި ނުބުނާނެ ކަމަށް ކޭން ބުންޏެވެ. އެކަން ފާހަގަކޮށް ކޭން ބުނީ، އޭނާގެ ހުރިހާ ފޯކަސްއެއް ހުރީ ބަޔާން އަށް ކަމަށެވެ. ބަޔާންގެ އެއްބަސްވުމަށް އިޝާރާތް ކުރަމުން ކޭން ބުނެފައި ވަނީ މިހާރު ކުރިއަށް ދާ ސީޒަން، އަދި އިތުރު އެއް ސީޒަން ބަޔާންގައި އޭނާ އަށް އޮތް ކަމަށެވެ. އަދި މިއީ ބަޔާންގައި އޭނާގެ އެންމެ ފަހު އަހަރު ނޫން ކަމަށާއި، ހަމަޖެހިގެން ހުރި ކަމަށް ކޭން ބުނެފައިވެ އެވެ.

ބަޔާންގައި މިހާތަނަށް ހޭދަ ކުރި ތިން ސީޒަންގެ ތެރޭގައި ކޭން ވަނީ އެ ކުލަބަށް ކުޅެދިން 106 މެޗުގައި 103 ލަނޑު ޖަހައިފަ އެވެ. އަދި ބަޔާން އާއެކު އޭނާ ވަނީ ޖަރުމަނު ލީގުގެ އިތުރުން، ޖަރުމަނު ސުޕަ ކަޕް ވެސް ކާމިޔާބު ކޮށްފަ އެވެ. ބަޔާންގައި ތިބި ކުޅުންތެރިންގެ ތެރެއިން އޭނާ އަކީ އެ ޓީމުގައި އެންމެ މުހިންމު އެއް ކުޅުންތެރިޔާ އެވެ.