ބަޔާން ބަލިކޮށް އާސެނަލް އަށް ފަސް ވަނަ މޮޅު

ޔުއެފާ ޗެމްޕިއަންސް ލީގުގައި ޖަރުމަނުގެ ބަޔާން މިއުނިކްއާ ދެކޮޅަށް ކުޅުނު މެޗުން މޮޅުވެ، އާސެނަލް އިން ފަސް ވަނަ މޮޅު ހޯދައިފި އެވެ.

އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި ބުދަ ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 3-1 އިންނެވެ. މެޗުގައި އާސެނަލް އިން ލަނޑު ޖަހައި ކުރި ހޯދާފައި ވަނިކޮށް، ބަޔާން އިން ނަތީޖާ ހަމަހަމަ ވެސް ކުރި އެވެ. ނަމަވެސް. ދެ ވަނަ ހާފުގައި ދެ ލަނޑު ޖަހައިގެން އާސެނަލް ވަނީ މެޗުން މޮޅުވެފަ އެވެ.

މެޗު ފަށައިގެން 22 ވަނަ މިނެޓުގައި އާސެނަލް އަށް ލީޑު ނަގައިދިނީ ޔޫރިއެން ޓިމްބާ އެވެ. އޭނާ އެ ލަނޑު ޖެހީ ބުކަޔޯ ސަކާ ތަނަވަސްކޮށްދިން ފުރުސަތެއްގަ އެވެ. ނަމަވެސް، އޭގެ ދިހަ މިނެޓު ފަހުން ލެނާޓް ކާލް ވަނީ ލަނޑު ޖަހައި ބަޔާން އަށް ނަތީޖާ ހަމަހަމަ ކޮށްދީފަ އެވެ. އެއީ ސާޖް ގްނަބްރީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ ދެ ވަނަ ހާފުގައި ދެ ވަނަ ފަހަރަށް އާސެނަލް އަށް ލަނޑު ޖަހައި ލީޑު ނަގައިދިނީ ނޯނީ މަޑުއޭކޭ އެވެ. މެޗުގެ 69 ވަނަ މިނެޓުގައި އޭނާ އެ ލަނޑު ޖެހީ ރިކާޑޯ ކަލަފިއޯރީ ތަނަވަސްކޮށްދިން ފުރުސަތެއްގަ އެވެ. އޭގެ ފަހުން މެޗުގެ 77 ވަނަ މިނެޓުގައި ގަބްރިއެލް މާޓިނެލީ ވަނީ އާސެނަލްގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ.

މެޗުން މޮޅުވެ، ޗެމްޕިއަންސް ލީގު ތާވަލްގެ އެއް ވަނައިގައި އާސެނަލް އޮތީ މިހާތަނަށް ކުޅެފައިވާ ފަސް މެޗުން ވެސް މޮޅުވެ، 15 ޕޮއިންޓާ އެކު އެވެ. މި ސީޒަންގެ ޗެމްޕިއަންސް ލީގުގައި މިހާތަނަށް ބަލި ނުވެ އޮތް ހަމަ އެކަނި ޓީމަކީ ވެސް އާސެނަލް އެވެ.

މެޗަށް ފަހު ވާހަކަ ދައްކަމުން އާސެނަލްގެ ކޯޗު މިކޭލް އާޓެޓާ ބުނެފައި ވަނީ މިފަހަރުގެ ޗެމްޕިއަންސް ލީގުގައި އާސެނަލް އިން އެއް ފެންވަރެއްގައި ކުޅެމުން އަންނަ ކަމަށެވެ. އެހެން ނަމަވެސް، މިއީ އަދި މުބާރާތުގެ ކުރީ ކޮޅު ކަމަށާއި، ކުރިއަށް ދިޔުމުގައި ސާބިތުވާން ޖެހޭ ކަމަށް އޭނާ ބުންޏެވެ.

ބަޔާން އާ ދެކޮޅަށް އާސެނަލްގެ ކުޅުންތެރިން ދެއްކި ކުޅުމާ މެދު ހިތްހަމަ ޖެހިގެން ހުރިކަން ފާހަގަކޮށް އާޓެޓާ ބުނީ، މެޗުގައި އާސެނަލް އިން ދެއްކީ ފުރިހަމަ ކުޅުމެއް ކަމަށެވެ. ޚާއްސަކޮށް ކުޅުންތެރިންގެ ފަރާތުން ފެނުނު ރޫޙާއި، މުޅި މެޗުގައި ދެއްކި ހިތްވަރަކީ އަބަދު ވެސް އާސެނަލް އިން ފެންނަން ބޭނުންވާ ކަންކަން ކަމުގައި އާޓެޓާ ބުންޏެވެ.