ބާސެލޯނާގެ ކުޅުންތެރިންނަށް ފްލިކްގެ ހަރުކަށި މެސެޖެއް

ބާސެލޯނާގެ ކުޅުންތެރިންނަށް، އެ ޓީމުގެ ކޯޗު ހަންސީ ފްލިކް ހަރުކަށި މެސެޖެއް ދީފައިވާ ކަމަށް ސްޕެއިންގެ މީޑިއާ ތަކުގައި ރިޕޯޓު ކޮށްފި އެވެ.

ބާސެލޯނާގެ ކުޅުންތެރިންނާ ފްލިކް މިފަދައިން ވާހަކަ ދައްކާފައި ވަނީ، އައު ސީޒަންގެ ސްޕެނިޝް ލީގުގައި ބާސެލޯނާ އިން ކުޅުނު ފުރަތަމަ މެޗަށް ފަހު އެވެ. ފުރަތަމަ މެޗުގައި މަޔޯކާ އަތުން ބާސެލޯނާ މޮޅުވި ނަމަވެސް، ޓީމުގެ ކުޅުމާ މެދު ފްލިކް ހުރީ ހިތްހަމަ ޖެހިގެނެއް ނޫނެވެ.

ބާސެލޯނާގެ ކޯޗުކަމާ ފްލިކް ހަވާލުވެ ފުރަތަމަ ސީޒަންގައި ވެސް ވަނީ އެ ކުލަބާ އެކު ގިނަ ކާމިޔާބީތަކެއް ހޯދައިފަ އެވެ. ފްލިކްގެ އިރުޝާދުގެ ދަށުން ބާސެލޯނާ އިން އެ ޓީމުގެ ކުޅުން ވަރަށް ބޮޑަށް ރަނގަޅު ކޮށްފައިވާއިރު، ބާސެލޯނާ އަށް މިދިޔަ ސީޒަނަކީ ކާމިޔާބު ވެސް ސީޒަނެކެވެ.

ފްލިކްގެ އިރުޝާދުގެ ދަށުން ބާސެލޯނާ ދެ ވަނަ ސީޒަނާ ކުރިމަތިލާފައިވާއިރު، މަޔޯކާ މެޗަށް ފަހު ކުޅުންތެރިންނާ ވާހަކަ ދައްކަމުން ފްލިކް ބުނެފައި ވަނީ، މި ސީޒަނަކީ ދަށް ސީޒަނަަކަށް ވާން ބެނުން ނުވާ ކަމަށެވެ. އަދި ކުޅުންތެރިންގެ ފެންވަރު ދަށްވާން އޭނާ ބޭނުން ނުވާ ކަމަށާއި، ކުޅުންތެރިން ފަރުވާ ކުޑަ ކުރަން ވެސް އޭނާ ބޭނުން ނުވާ ކަމަށް ފްލިކް ވަނީ ބުނެފަ އެވެ.

ބާސެލޯނާގެ ކުޅުންތެރިންނަށް ފްލިކް އަންގާފައި ވަނީ ރަނގަޅަށް މަސައްކަތްކޮށް، ކޮންމެ ކުޅުންތެރިޔަކު ވެސް އެ ކުޅުންތެރިޔެއްގެ އެންމެ ފުރިހަމަ ކުޅުން ދެއްކުމަށެވެ. އަދި މެޗުތަކުގެ ކުރިން ކުރިއަށް ގެންދާ ފަރިތަކުރުން ތަކުގައި ވެސް އިތުރު ހަރުކަށި ގޮތްތަކެއް ގެން ގުޅޭނެ ކަމަށް ފްލިކް ވަނީ ބުނެފަ އެވެ.

މަޔޯކާ އަތުން 3-0 އިން ބާސެލޯނާ މޮޅުވި ނަމަވެސް، އެ މެޗަށް ފަހު އޮތް ނޫސްވެރިންގެ ބައްދަލުވުމުގައި ވެސް ފްލިކް ވަނީ ޓީމުގެ ކުޅުން ރަނގަޅު ނޫން ކަމަށް ބުނެފަ އެވެ. އަދި ޖުމުލަ ގޮތެއްގައި ޓީމުގެ ކުޅުމާ މެދު އޭނާ ހިތްހަމަ ނުޖެހޭ ކަމަށް ވެސް ފްލިކް ވަނީ ހާމަކޮށްފަ އެވެ.

މީގެ އިތުރުން ޓީމުގައި މައިގަނޑު ގޮތެއްގައި އިސްކަން ދެމުން އަންނަ، ނުވަތަ ފުރުސަތު ދެމުން އަންނަ ކުޅުންތެރިންގެ ކުޅުން ދަށްވާ ނަމަ، އެހެން ކުޅުންތެރިންނަށް އޭނާ ފުރުސަތު ދޭނެ ކަމަށް ވެސް ފްލިކް ވަނީ ބުނެފަ އެވެ. އޭނާ ބުނެފައި ވަނީ ކޮންމެ ކުޅުންތެރިޔަކު ވެސް ދަނޑު މަތީގައި ކުރަން ޖެހޭ މަސައްކަތަކީ ރަނގަޅު ކުޅުމެއް ދައްކައި، ޓީމު މޮޅު ކޮށްދިނުން ކަމަށެވެ.

މިދިޔަ ސީޒަންގެ ސްޕެނިޝް ލީގު ބާސެލޯނާ އިން ކާމިޔާބު ކޮށްފައިވާއިރު، ފްލިކް ހުރީ މި ފަހަރުގެ ލީގު ވެސް ކާމިޔާބު ކުރަން ބޭނުންވެގެންނެވެ. އެކަން ކުރުމަށްޓަކައި ބާސެލޯނާ އިން އެއްވެސް މެޗެއް ފަސޭހަ ކޮށްގެން ނުވާނެ ކަމަށް ވެސް އޭނާ ބުނެފައިވެ އެވެ.

ސްޕެނިޝް ލީގުގައި ބާސެލޯނާގެ ދެ ވަނަ މެޗުގައި ރަށުން ބޭރުގައި އެ ޓީމު ކުޅޭނީ ލެވަންޓޭއާ ދެކޮޅަށެވެ.