ބަޔާން މޮޅުވީއިރު، ކޭން 100 ވަނަ ލަނޑު ޖަހައިފި

ޖަރުމަނު ލީގުގައި ވާޑް ބްރެމަންއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބަޔާން މިއުނިކް އިން މޮޅުވުމުގެ ސިލްސިލާ ދަމަހައްޓައިފި އެވެ.

ބަޔާންގެ އަމިއްލަ ދަނޑުގައި ހުކުރު ދުވަހުގެ ރޭ ކުޅުނު މެޗު ބަޔާން އިން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި ބަޔާން އިން ދެ ލަނޑު ޖެހިއިރު، ފަހު ހާފުގައި ވަނީ އަނެއް ދެ ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 22 ވަނަ މިނެޓުގައި ބަޔާން އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަަހައިދިނީ ޖޮނަތަން ޓާ އެވެ. އެ ލަނޑު އޭނާ ޖެހީ މައިކަލް އޮލައިސޭ ތަނަވަސްކޮށްދިން ފުރުސަތެއްގަ އެވެ.

މެޗުގެ ފުރަތަމަ ހާފު ނިމުމުގެ ކުރިން ބަޔާން އިން ވަނީ ދެ ވަނަ ލަނޑެއް ވެސް ޖަހައި ލީޑު ފުޅާ ކޮށްފަ އެވެ. ފުރަތަމަ ހާފުގެ ފަހު ވަގުތުގައި ބަޔާން އަށް ލިބުނު ޕެނަލްޓީ ކާމިޔާބުކޮށް، އެ ލަނޑު ޖަހައިދިނީ އިންގްލެންޑުގެ ކެޕްޓަން ހެރީ ކޭން އެވެ.

އޭގެ ފަހުން ދެ ވަނަ ހާފުގައި ބަޔާންގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްދިނީ ވެސް ކޭން އެވެ. އެއީ މެޗުގެ 65 ވަނަ މިނެޓުގައި ލުއިސް ޑިއާޒް ތަނަވަސްކޮށްދިން ފުރުސަތެއްގައި ކޭން ޖެހި ލަނޑެކެވެ. އެއީ ބަޔާން އަށް ބަދަލުވި ފަހުން އެ ޓީމަށް ކޭން ޖަހައިދިން 100 ވަނަ ލަނޑެވެ. މެޗުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް، ބަޔާންގެ ފަހު ލަނޑު ޖެހީ ކޮނާޑް ލައިމާ އެވެ.

މެޗަށް ފަހު ވާހަކަ ދައްކަމުން ބަޔާންގެ ކޯޗު ވިންސެންޓް ކޮމްޕެނީ ވަނީ، ކޭން އަށް ވަރަަށް ބޮޑަށް ތައުރީފު ކޮށްފަ އެވެ. އޭނާ ބުނީ މިއީ އަނެއްކާ ވެސް ބަޔާންގައި ކޭން އަށް ވަރަށް ޚާއްސަ، އަދި އުފާވެރި ކާމިޔާބެއް ކަަމަށެވެ. ޚާއްސަކޮށް ބަޔާންގައި އޭނާ ދައްކަމުން އަންނަ މޮޅު ކުޅުމާއި، އޭނާގެ ހުނަރު ކޮމްޕެނީ ވަނީ ފާހަގަ ކޮށްފަ އެވެ.

އިތުރަށް ވާހަކަ ދައްކަމުން ކޮމްޕެނީ ބުނެފައި ވަނީ، ބަޔާން އިން މި ސީޒަން ފެށިއިރު އެ ޓީމުގެ ސްކޮޑާ މެދު ވެސް ގިނަ ވާހަކަ ތަކެއް ދެކެވެމުން އައި ކަމަށެވެ. ނަމަވެސް، އޭރު ވެސް ޓީމުގެ ހުރިހާ ކުޅުންތެރިންނަށް ވެސް ފުރިހަމަ އިތުބާރު އޮތް ކަމަށް އޭނާ ބުންޏެވެ. އޭނާ ބުނީ ކުޅުންތެރިޔަކު ބަދަލު ކުރަން ޖެހުނު ކަމަށް ވީ ނަމަވެސް، އެއްވެސް ހާސް ކަމެއް ނެތި އެ ބަދަލެއް ގެނެވޭ ކަމަށެވެ.

ކޮމްޕެނީ ބުނީ ބަޔާން ކުރިއަށް ދަނީ ވެސް ރަނގަޅު މިސްރާބެއްގައި ކަމަށާއި، މެޗުގައި ކުޅުންތެރިން ދެއްކި ކުޅުމާ މެދު ވެސް ހިތްހަމަ ޖެހޭ ކަމަށެވެ. މި ސީޒަންގައި ބަޔާން އިން ކަނޑައަޅާފައިވާ ލަނޑު ދަނޑިތައް ހާސިލު ކުރުމަށް ފުރިހަމަ އަށް މަސައްކަތް ކުރާނެ ކަމަށް ވެސް ކޮމްޕެނީ ބުންޏެވެ.

ލީގުގައި މިހާތަނަށް ކުޅެފައިވާ ފަސް މެޗުން ވެސް މޮޅުވެ، ބަޔާން އެއް ވަަނައިގައި އޮތީ 15 ޕޮއިންޓާ އެކު އެވެ.