އައު ސީޒަންގެ ޖަރުމަނު ލީގުގައި އެންމެ ފަހުގެެ ޗެމްޕިއަން ބަޔާން މިއުނިކް އިން ކުޅުނު ފުރަތަމަ މެޗުގައި، އާރްބީ ލައިޕްޒިގް އަތުން ބޮޑު މޮޅެއް ހޯދައިފި އެވެ.

ބަޔާންގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 6-0 އިންނެވެ. މެޗުގެ ފުރަތަމަ ހާފުގައި ބަޔާން އިންް ތިން ލަނޑު ޖެހިއިރު، ދެ ވަނަ ހާފުގައި ވަނީ އަނެއް ތިން ލަނޑު ޖަހައިފަ އެވެ.

މެޗު ފަށައިގެން 27 ވަނަ މިނެޓުގައި ބަޔާން އަށް ލީޑު ނަަގައިދިނީ މައިކަލް އޮލައިސޭ އެވެ. އޭގެ ފަހުން މެޗުގެ 32 ވަނަ މިނެޓުގައި ލުއިސް ޑިއާޒް ވަނީ ބަޔާންގެ ދެ ވަނަ ލަނޑު ޖަހައިފަ އެވެ. އެ ލަނޑު އޭނާ ޖެހީ ސާގް ގަނަބްރީ ތަނަވަސްކޮށްދިން ފުރުސަތެއްގަ އެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް ބަޔާންގެ ތިން ވަނަ ލަނޑު ޖެހީ ވެސް އޮލަައިސޭ އެވެ. އެއީ ގްނަބްރީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ ދެ ވަނަ ހާފުގައި، 64 ވަނަ މިނެޓުގައި ބަޔާން އަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން ވަނީ އެ ޓީމުގެ ހަތަރު ވަނަ ލަނޑު ޖަހައިފަ އެވެ. އޭގެ ދެ މިނެޓު ފަހުން ލައިޕްޒިގް އިން ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ.

އޭގެ ފަހުން މެޗުގެ 74 ވަނަ މިނެޓުގައި ޑިއާޒް ތަނަވަސްކޮށްދިން ފުރުސަތެއްގައި ކޭން ވަނީ ބަޔާންގެ ފަސް ވަނަ ލަނޑު ޖަހައިފަ އެވެ. އޭގެ ހަތަރު މިނެޓު ފަހުން ކޭން ވަނީ އެ ޓީމުގެ ހަ ވަނަ ލަނޑު ޖަަހައި ކޭން އޭނާގެ ހެޓްރިކް ހަމަކޮށްފަ އެވެ. އެ ލަނޑު ކޭން ޖެހީ ކިން މިން ޖޭ ތަނަވަސްކޮށްދިން ފުރުސަތެއްގަ އެވެ.

ލީގުގައި ބަޔާންގެ ދެ ވަނަ މެޗުގައި ރަށުން ބޭރުގައި އެ ޓީމު ނިކުންނާނީ ވެހެން ވިއެސްބަޑެންއާ ދެކޮޅަށެވެ.