ބާސެލޯނާ މޮޅުވި މެޗުގައި ފްލިކް އަށް ރަތް ކާޑު ދައްކައިފި

ސްޕެނިޝް ލީގުގައި އެންމެ ފަހުގެ ޗެމްޕިއަން ބާސެލޯނާ އިން ޖިރޯނާއާ ދެކޮޅަށް ކުޅުނު މެޗުން މޮޅުވެއްޖެ އެވެ.

ހޮނިހިރު ދުވަހުގެ ރޭ ކުޅުނު މެޗު ބާސެލޯނާ އިން ކާމިޔާބު ކުރީ 2-1 އިންނެވެ. މެޗުގައި ބާސެލޯނާ އިން ލަނޑު ޖަހައި ކުރި ހޯދާފައި ވަނިކޮށް، ޖިރޯނާ އިން ނަތީޖާ ހަމަހަމަ ވެސް ކުރި އެވެ. ނަމަވެސް، މެޗުގެ އެންމެ ފަހު ވަގުތުގައި ލަނޑު ޖަހައިގެން ބާސެލޯނާ ވަނީ މެޗުން މޮޅުވެފަ އެވެ.

މެޗު ފަށައިގެން 13 ވަނަ މިނެޓުގައި ބާސެލޯނާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ސްޕެއިންގެ ޕެޑްރީ އެވެ. އެ ލަނޑު ޖަހަން ޕެޑްރީ އަށް ފުރުސަތު ތަނަވަސްކޮށް ދިނީ ލަމީން ޔަމާލް އެވެ.

ނަމަވެސް، އޭގެ ފަހުން މެޗުގެ 20 ވަނަ މިނެޓުގައި ޖިރޯނާ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑޫ ޖިރޯނާ އަށް ޖަހައިދިނީ އެކްސަލް ވިޓްސަލް އެވެ. އެއީ އާނައު މާޓިނޭޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ އިތުރު ވަގުތުގައި ބާސެލޯނާގެ ކޯޗު ހަންސީ ފްލިކް އަށް ވަނީ ދެ ވަނަ ރީނދޫ ކާޑާ އެކު ރަތް ކާޑު ދައްކައިފަ އެވެ. މި ކާޑުގެ ސަބަބުން، ލީގުގައި މި މަހުގެ 26 ވަނަ ދުވަހު ވާދަވެރި ރެއާލް މެޑްރިޑާ ދެކޮޅަށް ކުޅޭ މެޗުގެ ބެންޗުގައި ފްލިކް އަށް ނުހުރެވޭނެ އެވެ.

އޭގެ ފަހުން މެޗުން ބާސެލޯނާ މޮޅުވީ ރޮނާލްޑް އަރައުހޯ ޖެހި ލަނޑުންނެވެ. އެއީ ފްރެންކީ ޑި ޔޯން ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުގައި އަރައުހޯ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މޮޅާ އެކު ބާސެލޯނާ އޮތީ ވަގުތީ ގޮތުން އެއް ވަނައިގަ އެވެ. އެއީ މިހާތަަނަށް ކުޅެފައިވާ ނުވަ މެޗުން 22 ޕޮއިންޓާ އެކު އެވެ. ބާސެލޯނާ އަށް ވުރެ އެއް މެޗު މަދުން ކުޅެގެން ދެ ވަަނައިގައި ރެއާލް އަށް 21 ޕޮއިންޓު ލިބޭއިރު، ގެޓާފޭއާ ދެކޮޅަށް ކުޅޭ މެޗުން މޮޅުވެ ރެއާލް އަށް އެއް ވަނަ އަށް ޖެހިލެވޭނެ އެވެ.