ގްލާބް ޖާމް އަކީ ދިވެހިންގެ ތެރޭގައި މަގޫބޫލު ފޮނިކާއެއްޗެކެއެވެ. މިފަހަރު ގްލާބް ޖާމް ޕާން ބޭނުންކޮށްގެން ތައްޔާރުކޮށްލަން މަސައްކަތްކޮށްލާށެއެވެ.

ފުރަތަމަ ޕާން ފޮތީގެ ހަތަރު ފަރާތް ކަފާލާށެއެވެ. ދެން މިކްސަރަށް އަޅާ ފުނޑުކޮށްލާށެއެވެ. އެއަށްފަހު ތެއްޔަކަށް ހަކުރާއި، ފެން، ކާފޫރުތޮޅި ހަތަރު ތިކި ލެމަން ޖޫސް، އަޅައިގެން ގިރަމުން ކައްކާލާށެއެވެ. ދެން ކުޑައިރުކޮޅެއްވަންދެން މަތިޖަހާލާށެއެވެ.

ބޯތައްޓަކަށް ޕާންކުޑި އާއި މިލްކް ކްރީމް ރަނގަޅަށް އެއްކުރުމަށްފަހު މޮޑެލާށެއެވެ. އޮމާންވަންދެން ރީތިކޮށް މޮޑެވުމުން ގްލާބް ޖާމް ހެދުމަށް ގުޅަ ވަށާލާށެއެވެ. ދެން ތަވައެއްގެ ތެރެއަށް ތެޔޮ އެޅުމަށްފަހު، މަޑު ގިނީގައި ތެލުލާށެއެވެ. މޮށިކުލަ އެރުމުން ގުޅަތައް ނެގުމަށްފަހު ކުރިން ތައްޔާރުކުރި ހަކުރު ފެންފޮދު ތެރެއަށް ގްލާބްޖާމް އަޅާލާފައި 15 ނުވަތަ 30 މިނިޓް ވަންދެން ބަހައްޓާށެއެވެ.