ބާސެލޯނާއަށް ކުޅެމުން އަންނަ ފްރާންސްގެ ފޯވާޑް އޮސްމާނޭ ޑެމްބެލޭ ހޯދަން ޔުވެންޓަސްއިން މަސައްކަތްކުރަމުން އަންނަ ކަމަށް ރިޕޯޓުތައް ބުނެފިއެވެ.

އުމުރުން 23 އަހަރުގެ ޑެމްބެލޭ 2017 ވަނަ އަހަރު ބާސާއާ ގުޅުނީ ޖަރުމަނުގެ ބޮރޫޝިއާ ޑޯޓްމުންޑް ދޫކޮށް 147 މިލިޔަން ޔޫރޯގެ އަގަކަށެވެ. އަދި ބާސާއާއެކު ޑެމްބެލޭ ފަސް އަހަރުގެ އެއްބަސްވުމެއް ހެދިއިރު، އެ އެއްބަސްވުން އަންނަ އަހަރުގެ ޖޫން މަހު ހަމަވާނެއެވެ.

ރިޕޯޓުތައް ބުނާ ގޮތުން ޑެމްބެލޭ ހޯދަން ޔުވެންޓަސްއިން މަސައްކަތްކުރަމުން އަންނައިރު، އެ ޓީމުން ޑެމްބެލޭ ގެންދާނީ އޭނާގެ އެއްބަސްވުން ހަމަވުމުން އަންނަ އަހަރުއެވެ. އެހެންކަމުން ޑެމްބެލޭގެ ޓްރާންސްފާއާ ގުޅޭ ކަންކަން ވަރަށް ގާތުން ޔުވެންޓަސްއިން ބަލަމުން އަންނަ ކަމަށްވެސް ރިޕޯޓުތައް ބުނެއެވެ.

އަންނަ އަހަރު ޑެމްބެލޭގެ އެއްބަސްވުމުގެ މުއްދަތު ހަމަވާއިރު، ރިޕޯޓުތައް ބުނާ ގޮތުން އަންނަ އަހަރުގެ ހޫނު މޫސުމުގައި ޑެމްބެލޭއަށް ހިލޭ ކުލަބު ބަދަލު ކުރެވޭނެތީ، ބާސާއިން މިހާރު އަންނަނީ ޑެމްބެލޭގެ އެއްބަސްވުން އާކުރުމާމެދު މަޝްވަރާކުރަމުންނެވެ. އެކަމަކު އަވަސް އަރުވާލައިގެން އެއްބަސްވުން އާކުރުމުގެ ބަދަލުގައި، އެއްބަސްވުން އާކުރާނީ މި ސީޒަނުގައި އޭނާ ދައްކާ ކުޅުމަށް ބެލުމަށްފަހު ކަމަށްވެސް ރިޕޯޓުތައް ބުނެއެވެ. ނަމަވެސް ދާދި ފަހުން ދިން އިންޓަވިއުއެއްގައި ޑެމްބެލޭ ވަނީ އެއްބަސްވުމާ ގުޅޭ އެއްވެސް މަޝްވަރާއެއް އަދި މިހާތަނަށް ކޮށްފައިނުވާ ކަމަށް ބުނެފައެވެ.

ޑެމްބެލޭގެ އެއްބަސްވުން އާކުރަން ބާސާއިން މަޝްވަރާކުރަމުން އަންނައިރު، އޭނާ ހޯދަން ޔުވެންޓަސްގެ އިތުރުން މެންޗެސްޓާ ޔުނައިޓެޑުން އަންނަނީ މަސައްކަތް ކުރަމުންނެވެ. އެގޮތުން މީގެ ކުރިން ޑެމްބެލޭގެ ޓްރާންސްފާއާ ގުޅޭ ގޮތުން ޔުނައިޓެޑުން ބާސާއާއެކު މަޝްވަރާކުރި ކަމަށް މީޑިއާތަކުން ރިޕޯޓުކުރި ނަމަވެސް، ބާސާއިން ވަނީ އެކަން ދޮގުކޮށްފައެވެ.

ޑެމްބެލޭއަކީ އޭނާ ބާސާއަށް ގެނައިރު ދުނިޔޭގައި ހުރި އެންމެ ހުނަރުވެރި އެއް ފޯވާޑެވެ. އެކަމަކު އަނިޔާގެ ސަބަބުން އެއް ފެންވަރެއްގައި ހިފަހައްޓާލެވޭ ގޮތް ނުވެއެވެ. މިދިޔަ ސީޒަނުގައި އަނިޔާގެ އެތައް މައްސަލައެއް ދިމާވިއެވެ. އަނިޔާއިން ރަނގަޅުވެ، މި ސީޒަނުގައި ރޮނާލްޑް ކޫމަންގެ އިރުޝާދުގެ ދަށުން ޑެމްބެލޭ އަންނަނީ މޮޅު ކުޅުމެއް ދައްކަމުންނެވެ. އެގޮތުން މިހާތަނަށް މި ސީޒަނުގައި ބާސާއަށް 37 މެޗު ކުޅެދީފައިވާއިރު، އޭނާ ވަނީ 10 ލަނޑު ޖަހާފައެވެ.

އަދި ބާސާއަށް މިހާތަނަށް ކުޅެދިން 111 މެޗުގައި 29 ލަނޑު ޖަހާފައިވާ ޑެމްބެލޭ ވަނީ ބާސާއާއެކު ސްޕެނިޝް ލީގު ދެ ފަހަރު އަދި ސްޕެނިޝް ކަޕް އެއް ފަހަރު ކާމިޔާބުކޮށްފައެވެ.