ހުކުރު ދުވަހު 300ށް ވުރެ ގިނަ މީހުން ވެކްސިން ޖަހައިފި
އަތޮޅު ތެރެއިން ވެކްސިން ޖެހި މީހުންގެ ޖުމުލަ އަދަދު ވަނީ 109،083ށް އަރާފައި
ސިނޯފަރމް ވެކްސިން ރާއްޖެ ގެނައުމުގެ ތެރެއިން- ރާއްޖެއިން މިހާރު ވަނީ ސިނޮފަރމް ވެކްސިނަށްވެސް ހުއްދަދީ ބޭނުން ކުރަން ފަށާފައި
ކޮވިޑުން ރައްކާތެރިވުމަށް ހުކުރު ދުވަހު އެކަނިވެސް 300ށް ވުރެ ގިނަ މީހުން ވެކްސިން ޖަހައިފިއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) ގެ ފަހުގެ ތަފާސްހިސާބުތައް ދައްކާ ގޮތުން ހުކުރު ދުވަހު ވެކްސިން ޖަހާފައިވަނީ 354 މީހުންނެވެ. އެއީ ހައްތާވެސް އަތޮޅު ތެރެއިން ވެކްސިން ޖަހާފައިވާ މީހުން ކަމަށް އެޗްޕީއޭގެ ތަފާސްހިސާބުތަކުން ދައްކައެވެ. އެއާއެކު، އަތޮޅު ތެރެއިން ވެކްސިން ޖެހި މީހުންގެ ޖުމުލަ އަދަދު ވަނީ 109،083ށް އަރާފައެވެ.
މާލެ ސަރަޙައްދުންވެސް 132،044 މީހަކު ވެކްސިން ޖަހާފައިވާއިރު، މިހާތަނަށް ރާއްޖެއިން ކޮވިޑް-19 ވެކްސިން ޖެހި މީހުންގެ ޖުމުލަ އަދަދު ވަނީ 241،127ށް އަރާފައެވެ.
ހޮނިހިރު ދުވަހުން ފެށިގެން ރާއްޖޭގައި ކޮވިޝީލްޑް ވެކްސިންގެ ދެވަނަ ޑޯޒް ޖެހުމަށް ނިންމާފައިވާއިރު، މިވަގުތު ދެވަނަ ޑޯޒް ދެވޭނީ ފެބްރުއަރީ 1-4 އާއި ދެމެދު ފުަރަތަމަ ޑޯޒް ޖަހާފައިވާ މީހުންނަށް ކަމަށް އެޗްޕީއޭއިން ހާމަކޮށްފައިވެއެވެ. މި ގިންތީގައި ހިމެނޭ 18 އަހަރުން މަތީގެ މީހުންނަށް ދެވަނަ ޑޯޒު ޖެހުމަށް ކަނޑައެޅިފައިވާ ވަގުތުތައްވެސް އެޗްޕީއޭއިން ވަނީ އާންމުކޮށްފައެވެ.
އެޗްޕީއޭއިން ބުނީ ސޯޝަލް ސެންޓަރާއި، ވިލިމާލޭ ޒުވާނުންގެ މަރުކަޒުގެ އިތުރުން، ހުޅުމާލޭ ވެކްސިނޭޝަން ސެންޓަރާއި، ނޭޝަނަލް އާރޓް ގެލެރީ އަދި ސެނަހިޔާއިން ދެވަނަ ޑޯޒް ޖަހައިދޭނެ ކަމަށެވެ.
