މި ސަރުކާރަށް ދަރަނި މެނޭޖްކުރަން ނޭނގޭ، އެނގޭނަމަ ޕްރޮޖެކްޓްތައް ނުހުއްޓި، އާސަންދަ ނުލިބި، ދަރިވަރުންގެ ލޯންތައް ނުލިބި ނުހުންނާނެ - ރައީސް ޞާލިހު
ކޮވިޑަށް ހަރަދުވި ފައިސާއާއި ނުލައި ލޯނު ހުންނާނީ އެހެން ސަރުކާރުތަކުންވެސް ނެގި މިންވަރުގައި
ކުރީގެ ރައީސް އިބްރާހިމް މުހައްމަދު ޞާލިހު (ކ) ރައީސް ޑރ. މުހައްމަދު މުއިއްޒު (ވ) އާއެކު ރިޔާސީ އިންތިހާބުގެ ނަތީޖައަށްފަހު ބައްދަލުކުރައްވަނީ - ފައިލް
މި ސަރުކާރަށް ލޯނުތަކާއި ދަރަނިތައް މެނޭޖްކުރަން ނޭނގޭ ކަމަށާއި، އެކަންކަން ކުރަން އެނގޭނަމަ ތަރައްގީގެ ޕްރޮޖެކްޓްތައް ނުހުއްޓި އާސަންދަ ނުލިބި ދަރިވަރުންގެ ލޯންތައް ނުލިބި ނުހުންނާނެ ކަމަށް ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ރައީސް ޞާލިހު ވިދާޅުވީ 2018 ގައި އެމަނިކުފާނު ވެރިކަމާ ހަވާލުވިއިރުގައި ދައުލަތުގެ މާލިއްޔަތު އޮތީ ރަނގަޅަކަށް ނޫން ކަމަށެވެ. މާލިއްޔަތު ވަރަށް ދަތިކޮށް އޮތް ނަމަވެސް މެނޭޖްކުރެއްވި ކަމަށާއި، ކޮވިޑް-19ގެ ކުރީ ފުރަތަމަ 2 އަހަރު ސަރުކާރު ހިންގިއިރުގައި، އެއިރު ކޮށްފައި ހުރި މަސައްކަތްތަކުން އެތައް ރަނގަޅު ކަމެއް އެ އަހަރު ނިމުނު ކަން ފެންނަން ހުންނާނެ ކަމަށެވެ. ރައީސް ޞާލިހު ވިދާޅުވީ ޖެހިގެން އައިއިރު، ކޮވިޑު މުޅި ދުނިޔެއަށް ފެތުރި، މިދިޔަ ސަތޭކަ އަހަރުގެ ތެރޭގައި ނާންނަ ވަރުގެ ބޮޑު ބަލިމަޑުކަމެއް ހުރަހެއް މުޅި ދުނިޔަތު ކުރިމަތިވި ކަމަށެވެ.
ރައީސް ޞާލިހު ވިދާޅުވީ އެއީ ދުނިޔެ ފުރަތަމަ ފަހަރަށް ބޯޑަރުތައް ބަންދުކުރި ފަހަރު ކަމަށާއި، ދައުލަތުގައި ލާރިއެއް ނެތް ކަމަށެވެ. އަދި ފައިސާ ހުރީ ގާތްގަނޑަކަށް ދޮޅު މަސްދުވަހު އިމްޕޯޓްކުރާވަރަށް ކަމަށާއި، ދައްކަންޖެހޭ ލޯނު ހުރި އިރު، ކާޑެއް ނެތް ކަމަށެވެ.
އެހެންވީމާ، އަޅުގަނޑުގެ އެހެން ވިސްނުމަކަށްވީ އަދި ވެރިކަމެއްގައި ހުންނަ މީހެއްގެ ވިސްނުމަކަށް ވާންވާނީ، އެކަހަލަ ބޮޑެތި ކަންތައްތައް ޖެހޭވަގުތު، ރައްޔިތުންނަށް އެ ދަތިއުނދަގޫ ޕާސްނުކޮށް، އުފުލަން ނުދީ، ނުޖެހޭ ގޮތަކަށް ސަރުކާރުން އެ ޒިންމާ ނެގުން. އެކަން އަޅުގަނޑު ކުރިން. އާއްމު ރައްޔިތުންނަށް އަޅުގަނޑުމެން ވީވަރަކުން އެހީތެރިވަމުން ދިޔައީ. ކުދި ވިޔަފާރިތަކަށް އެހީ ދިނިން، ލޯނު ދިނިން. މުސާރަ ނުލިބޭ ފަރާތްތަކަށް ދިރިއުޅެވޭ ވަރަށް އެހީތެރިކަން ފޯރުކޮށްދިނިން. ބޮޑެތި ވިޔަފާރިތަކަށް އަޅުގަނޑުމެން ލޯނު ދިނިން. ރިސޯޓުތަކަށް ޓެކްސް ދެއްކުން ފަސްކޮށްދިނިން. އަދި ލޯނުވެސް ދިން. މިހެންގޮސް އިޤްތިޞާދެއް ދެމެހެއްޓުމަށްޓަކައި، ދައުރުކުރުމަށްޓަކައި ކުރަންޖެހޭ ހުރިހާ ކަމެއް އަޅުގަނޑުމެން ކުރިއަށް ގެންދިޔައީ. ދެން ސަރުކާރުގެ ޕްރޮޖެކްޓަށް އޭރު ހިންގަން ޖެހުނު ވެސް އެންމެ ބޮޑު ސަބަބަކީ، މާކެޓުގައި ފައިސާ ދައުރުކުރުމަށްޓަކައި ސަރުކާރުން މަސައްކަތްތަކެއް ކުރަން އެވަގުތު ޖެހޭކަމަށް އަޅުގަނޑަށް ގަބޫލުކުރެވުނީ.ކުރީގެ ރައީސް އިބްރާހިމް މުހައްމަދު ޞާލިހު
ރައީސް ޞާލިހު ވިދާޅުވީ ކޮވިޑުގެ ހާލަތުގައި، ޕްރައިވެޓް ސެކްޓަރަކު މަސައްކަތްކުރެވޭވަރުގެ ފައިސާއެއް ނެތް ކަމަށެވެ. އެހެންކަމުން ސަރުކާރުން އެ މަސައްކަތްތައް ކޮށްގެން އާއްމު ރައްޔިތުންނަށް ފައިދާ ލިބުނު ކަމަށެވެ. އިދިކޮޅު މީހުން ލޯންތަކާއި ގުޅިގެން ދައްކަމުންދާ ވާހަކައަށް އިޝާރާތްކުަަރައްވާ ރައީސް ޞާލިހު ވިދާޅުވީ 60 ވަަރަކަށް ބިލިއަނުގެ ތެރެއިން ޑައިރެކްޓްކޮށް، ސީދާ ކޮވިޑަށް ޚަރަދުކުރީ 17 ބިލިއަން ވަރަކަށް ރުފިޔާ ކަމަށެވެ. އަދި ނުސީދާކޮށް ވެސް ހަރަދު ގޮސްފައި ހުންނާނެ ކަމަށާއި، އެހެންކަމުން އެ 17 ބިލިއަން ލޯނުގެ ތެރެއިން ކަނޑާލުމުން ދަރަނި އޮންނާނީ ކުރީގެ ސަރުކާރުންވެސް ނެގިވަރަށް ކަމަށް ރައީސް ޞާލިހު ވިދާޅުވިއެވެ.
ދެން ލޯނު ނަގައިގެން ކުރީ ކޮން ކަމެއްތޯ؟ ލޯނު ނަގައިގެން ކުރި އެންމެ ބޮޑު އެއް ކަމަކީ، ކުރީގެ ސަރުކާރުން ނަގާފައި އޮތް ލޯނެއް ދެއްކުން. ރައީސް ޔާމީންގެ ވެރިކަމުގައި. ސަނީސައިޓް ބޮންޑެއް އެ ރޯންނާނެ. އެ 250 މިލިއަން ޑޮލަރޭ އަޅުގަނޑު ހަނދާންވީ. މީގެފަދަ މުޅިން އެކްސެޕްޓްކޮށް އަޅުގަނޑަށް ނުބުނެވުނީސް. އެއީ، އަޅުގަނޑުމެން ދެއްކިން. ދެން މި ދަންނަވާހެން ކޮވިޑާ ގުޅިގެން މި ކުރިމަތިވި އިޤްތިޞާދީ ދަތިކަން ފިލުވުމަށްޓަކައި ވިޔަފާރިވެރިންނަށް އެހީތެރިކަން މި ފޯރުކޮށްދިނީ. ދެން ކޮވިޑް މެނޭޖްކުރީ. އޭގެއިތުރަށް ބޭނުންވާ ނަސީލަތްތައް ހޯދައި ބޭސް ގެނެސް މި ހުރިހާ ކަމެއް ކުރީ. އަޅުގަނޑުމެން އެ ދުވަހު އިޤްތިޞާދަށް އެ ފައިސާ ޕަމްޕު ނުކުރިނަމަ، ޕްރައިވެޓް ސެކްޓަރއަށް އެ ފައިސާ ނުދިންނަމަ، އެހާ ވާހަކަ އިޤްތިޞާދު އަނބުރާ އަށް ރުޖޫޢައެއް ނުވީސް. މާ ދަތިހާލުގައި އޭރަށް މިއަދު ތިބޭނެ. އަޅުގަނޑުމެން ލޯނު ނެގީ، ލޯނު ދައްކާނެގޮތް ހޯދާފަ. އެ ބޭފުޅުން ބެއްލެވި އެނގިވަޑައިގަންނަވާނެ. ސަރުކާރު ބަނގުރޫޓުވަނީއޭ، ސަރުކާރު ބަނޑަށް ޖެހެނީއޭ، ނެތޭ ލާރިއެއް. އެ ދެއްކީ ހަމަ ބުތާނު ދޮގު. އެކަން ނުވާކަމީ މިއަދު ވެސް އެނގޭނެ. އެހެންވީމާ، އެއީ ސަރުކާރެއް ފޭލްކޮށްލުމަށްޓަކައި ދެއްކި ދޮގު ވާހަކަތަކެއް. ވަރަށް ރަނގަޅަށް ހުންނާނެ. އަޅުގަނޑުމެން ލޯނެއް ނަގާފިއްޔާ އެ ލޯނު ދައްކާނެގޮތް ހުންނާނީ. މިއަދު އަޅުގަނޑުމެންނަށް ވެރިކަމަކު ނޫން މި ތިބީ. އަޅުގަނޑުމެންނަށް ވެރިކަމުގައި ތިބެވުނު ނަމަ އެއްވެސް ދައްޗެއް ނެތި އެ ހުރިހާ ކަމެއް ކުރެވިފަ އޮންނާނީ.ކުރީގެ ރައީސް އިބްރާހިމް މުހައްމަދު ޞާލިހު
ރައީސް ޞާލިހު ވިދާޅުވީ ރައީސް މުއިއްޒުގެ ސަރުކާރަށް މެނޭޖްކުރަން ނޭނގޭ ކަމަށެވެ. އަދި ރައީސް ޑރ. މުޢިއްޒު އަރިހުގައި އެކަމަށް ރަނގަޅު ލަފާ އަރުވާނެ ބޭފުޅުން ނެތީކަމެއް، ނޫނީ އަޑު ނާއްސަވަނީކަމަށް ވެދާނެ ކަމަށެވެ. އެހެން ނޫންނަމަ މިއަދަކު ރައްޔިތުން އާސަންދަ ނުލިބިގެން ނޫޅޭނެ ކަމަށާއި، ދަރިވަރުން ސްޓޫޑެންޓް ލޯނު ނުލިބިގެން ނުތިބޭނެ ކަމަށެވެ.
ރައީސް ޞާލިހު ވިދާޅުވީ ރަނގަޅަށް މެނޭޖުކޮށްގެން ގެންދާ ކަމަށްވާނަމަ، އެއްވެސް ޕްރޮޖެކްޓެއް ނުހުއްޓޭނެ ކަމަށެވެ. އަދި އެމްޑީޕީގެ ސަރުކާރުން ކޮވިޑް ތެރޭގައި ދަތީގައި ކިތައްމެ ކަމެއްވެސް ކޮށްފައި ހުންނާނެ ކަމަށާއި، ނުފެންނަ ބަޔަކަށް އެ ނުފެންނާނެ ކަމަށެވެ. ރައީސް ޞާލިހު ވިދާޅުވީ އެމަނިކުފާނުގެ ސަރުކާރުގައި ކަންކަން ނުކުރާކަމަށް ދެކެވޭ ވާހަކައަކީ އޮޅުވާލަން ދެކެވޭ ވާހަކަ ކަމަށެވެ.
