އެމެރިކަން އެކަޑަމީ އޮފް ޕީޑިއެޓްރިކްސް އިން ހުރިހާ ކުޑަކުދިންނަށް ކޮވިޑް-19 ވެކްސިން ޖެހުމަށް ލަފާދީއެވެ.

މިއީ އެމެރިކާގެ މައި ސަރުކާރުގެ ސިޔާސަތާ ސީދާ ފުށުއަރާ ލަފައެއް ކަން ފާހަގަ ކުރެވޭ އިރު، އެމެރިކާ ސަރުކާރުން ބުނެފައިވަނީ ޞިއްޙަތު ރަނގަޅު ކުޑަކުދިންނަށް އާންމުކޮށް ކޮވިޑް ވެކްސިން ޖެހުމަށް ރެކޮމެންޑް ނުކުރާ ކަމަށެވެ.

އެމެރިކާގެ ކުޑަކުދިންގެ ޞިއްޙަތާ ބެހޭ މި ގްރޫޕުން އަންގާރަ ދުވަހު އެންމެ ފަހުން ނެރުނު ސިޔާސަތުގެ ލިޔުމުގައި ބުނެފައިވަނީ، 6 މަހާއި 23 މަހުގެ އުމުރުފުރައިގެ ހުރިހާ ކުދިންނަށްވެސް، ކުރިން ވެކްސިން ޖަހާފައިވީ ނަމަވެސް ނުވަތަ ސާރސް-ކޮވް-2 ބަލި ޖެހިފައިވީ ނަމަވެސް، ކޮވިޑް-19 ވެކްސިން ޖަހަން ޖެހޭނެ ކަމަށެވެ. އަދި ވަކި ރިސްކް ގްރޫޕްތަކުގައި ހިމެނޭ އުމުރުން ދޮށީ ކުދިންނަށް ވެސް ވެކްސިން ޖެހުމަށް ލަފާދީފައިވެއެވެ.

އެމެރިކާގެ ސެންޓަރ ފޯ ޑިޒީސް ކޮންޓްރޯލް އެންޑް ޕްރިވެންޝަން އިން މެއި މަހު ބުނެފައިވަނީ، މައިންބަފައިންނާއި ޑޮކްޓަރުން އެއްބަސްވާ ހާލަތްތަކުގައި ޞިއްޙަތު ރަނގަޅު ކުޑަކުދިންނަށް ކޮވިޑް-19 ވެކްސިން ޖެހުމަކީ އިޚްތިޔާރީ ކަމެއް ކަމަށެވެ.

މި އައު އިރުޝާދު ނެެރުމުގެ ކުރިން، އެޖެންސީން އާންމުކޮށް ލަފާދެމުން އައީ 6 މަސް އަދި އެއަށްވުރެ މަތީ އުމުރުގެ ކުދިންނަށް އެންމެ ފަހުގެ ކޮވިޑް ވެކްސިން ޖެހުމަށެވެ.

ޖުލައި މަހުގެ ކުރީކޮޅު، އެމެރިކަން އެކަޑަމީ އޮފް ޕީޑިއެޓްރިކްސްއާއި އެހެން ބައެއް މެޑިކަލް ގްރޫޕްތަކުން ހެލްތް އެންޑް ހިއުމަން ސަރވިސަސްގެ ސެކްރެޓަރީ ރޮބަޓް ކެނެޑީ ޖޫނިއަރ އަށް ދަޢުވާ އުފުލާފައިވެއެވެ. އެއީ އާންމުކޮށް ވެކްސިން ޖެހުމަށް ދީފައިވާ އިރުޝާދު ތައް ކަމާ ބެހޭ ފަރާތްތަކާ މަޝްވަރާ ކުރުމަކާ ނުލައި މިނިސްޓަރ އަމިއްލަ އަށް ބަދަލު ކުރެއްވުމާ ގުޅިގެންނެވެ.

އަންގާރަ ދުވަހު މި ޖަމްޢިއްޔާއޔާއިން ބުނެފައި ވަނީ، ސީޑީސީގެ ތަފާސްހިސާބުތަކަށް ބަލާއިރު، 2 އަހަރުން ދަށުގެ ކުދިން ކޮވިޑް-19 އާ ގުޅިގެން ހޮސްޕިޓަލްގައި އެޑްމިޓްކުރެވޭ މިންވަރަކީ ކުޑަކުދިންގެ އުމުރުފުރާތަކުގެ ތެރެއިން އެންމެ މަތީ މިންވަރު ކަމަށާއި، 6-23 މަހުގެ އުމުރުފުރައިގެ ކުދިންނަށް މިކަން ދިމާވާ މިންވަރަކީ 50-64 އަހަރުގެ މީހުންނާ އެއްވަރުގެ މިންވަރެއް ކަމަށެވެ.

އެމެރިކާގެ ހެލްތް އެންޑް ހިއުމަން ސަރވިސަސް ޑިޕާޓްމަންޓުން މި މަހުގެ ކުރީކޮޅު ބުނެފައިވަނީ، 27 އަހަރުގެ މެދުކެނޑުމަކަށްފަހު ކުޑަކުދިންނަށް ރައްކާތެރި ވެކްސިން ދިނުމާ ބެހޭ ފެޑެރަލް ޓާސްކް ފޯހެއް އަލުން އުފައްދާ ވާހަކައެވެ.