ދިރާގު ދިވެހި ޕްރިމިއާ ލީގުގައި ހޮނިހިރު ދުވަހުގެރޭ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް ނުކުންނައިރު، އެ މެޗުގައި ލޯނު އުސޫލުން ސުޕަ ޔުނައިޓެޑް ސްޕޯޓްސް (ސަސް) އާ ގުޅުނު މާޒިޔާގެ ޑިފެންޑަރު މުޖުތާޒް މުޙައްމަދު (މުޖޭ) އާއި މިޑްފީލްޑަރު އަބްދުﷲ ޖުނައިދު (ޖެންނޭ) އަށް ނުކުޅެވޭނެ ކަމަށް ސަސްގެ ކޯޗު މުޙައްމަދު ޝިޔާޒް (މޯހަން) ބުނެފިއެވެ.

ނިމިގެންދިޔަ ޓްރާންސްފާ ބާޒާރުގައި މުޖުތާޒާއި ޖުނައިދު ސަސްއަށް ބަދަލުވީ މާޒިޔާގެ ލޯނު އެއްބަސްވުމެއްގެ ދަށުން، މި ސީޒަނުގެ ނިޔަލަށެވެ. އަދި ލޯނު އެއްބަސްވުމެއްގެ ދަށުން ޒުވާން ދެ ކުޅުންތެރިން ކުލަބު ބަދަލުކުރީ، މި ސީޒަނުގެ ބާކީ ބައިގައި ކުޅުމުގެ ފުރުޞަތު ގިނައިން ހޯދުމަށް ކަމަށް މާޒިޔާއިން މީގެ ކުރިން ވަނީ ބުނެފައެވެ.

ލީގުގައި ހޮނިހިރު ދުވަހުގެރޭ މާޒިޔާއާ ދެކޮޅަށް ނުކުތުމުގެ ކުރިން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން މޯހަން ބުނީ މި މެޗުގައި އެ ޓީމަށް ލޯނު އުސޫލުން ގުޅުނު މުޖުތާޒާއި ޖުނައިދަށް ނުކުޅެވޭނެ ކަމަށެވެ. މަޢުލޫމާތު ލިބޭ ގޮތުގައި މާޒިޔާއިން ލޯނު އެއްބަސްވުން ހަދާފައިވަނީ އެ ދެ ކުޅުންތެރިންނަށް މާޒިޔާއާ ދެކޮޅަށް ނުކުޅެވޭ ގޮތަށެވެ.

މެޗާ ބެހޭ ގޮތުން މޯހަން ބުނީ މާޒިޔާއަކީ ރާއްޖޭގައި އޮތް އެންމެ މޮޅު ޓީމު ކަމަށާއި، އެކަމަކު މެޗާ ކުރިމަތިލާނީ މި މެޗުން ޕޮއިންޓެއް ނަމަވެސް ހޯދަން ކަމަށެވެ. އެގޮތުން މެޗުން ޕޮއިންޓެއް ލިބުމަކީވެސް ސަސްއަށް ލިބޭ ބޯނަހެއް ކަމަށާއި، އަދި ލީގުގެ ގަދަ ހައެއްގައި ނިންމާލަން މި މެޗުން ލިބޭ ޕޮއިންޓަކީވެސް ވަރަށް މުހިންމު ޕޮއިންޓަކަށް ވެގެންދާނެ ކަމަށްވެސް ވަނީ ބުނެފައެވެ.

ލީގުގައި ހޮނިހިރު ދުވަހުގެރޭ ސަސްއާ ދެކޮޅަށް މާޒިޔާ ނުކުންނައިރު، މިހާތަނަށް ލީގުގެ މެޗުކުން މާޒިޔާ ބަލިވެފައެއް ނުވެއެވެ. އެއާއެކު މި ސީޒަނުގެ ލީގުގައި މެޗަކުން ބަލިނުވެ އޮތް ހަމައެކަނި ޓީމަކީވެސް މާޒިޔާއެވެ.

ސަސް މެޗުގެ ކުރިން މާޒިޔާގެ ކޯޗު ރިސްޓޯ ވިޑަކޮވިޗް ބުނީ އިދިކޮޅަށް ނުކުންނަ ޓީމާ ދޭތެރޭ ވިސްނުމުގެ ބަދަލުގައި، މިހާރު އެންމެ ބޮޑަށް މަސައްކަތްކުރަމުން އަންނަނީ މާޒިޔާގެ ކުޅުން އިތުރަށް ރަނގަޅުކުރުމަށެވެ. އެގޮތުން މިހާތަނަށް އައިރު ވަރަށް ގިނަ ކަންކަން ކުޅުންތެރިން ރަނގަޅުކޮށްފައިވާ ކަމަށްވެސް ބުންޏެވެ.

ވިޑަކޮވިޗް ބުނީ ލީގުގައި ކޮންމެ ޓީމަކުންވެސް މާޒިޔާއާ ދެކޮޅަށް ނުކުންނަނީ އެ ޓީމު ބަލިކުރުމުގެ ރޫހުގައި ކަމަށާއި، އެހެންކަމުން މާޒިޔާއަށް އެއްވެސް މެޗެއް ފަސޭހަނުވާނެ ކަމަށެވެ. އަދި ސަސްއަކީ މި ވަގުތު ރަނގަޅު ކުޅުމެއް ދައްކަމުން އަންނަ ޓީމެއް ކަމަށާއި، އެހެންކަމުން މި މެޗުން މޮޅުވަން ކުޅުންތެރިން 100 އިންސައްތަ ދޭން ޖެހޭނެ ކަމަށްވެސް ވިޑަކޮވިޗް ބުންޏެވެ.

ލީގުގައި މާޒިޔާ އާއި ސަސް ބައްދަލުކުރާއިރު، ލީގު ތާވަލުގެ އެއްވަނައިގައި މާޒިޔާ އޮތީ ކުޅުނު 10 މެޗުން ލިބުނު 24 ޕޮއިންޓާއެކުއެވެ. އަދި ސަސް އޮތީ ތާވަލުގެ ހަވަނައިގައި 10 މެޗުން 11 ޕޮއިންޓާއެކުއެވެ.

ދިރާގު ދިވެހި ޕްރިމިއާ ލީގުގައި މާޒިޔާ އާއި ސަސް ބައްދަލުކުރާ މެޗު ފަށާނީ ހޮނިހިރު ދުވަހުގެރޭ 21:00 ގައެވެ.