ޔޫވީ މެޗަކީ ސީޒަނުގެ އެންމެ މުހިންމު މެޗު: ނިޒާމްބެ

ދިރާގު ދިވެހި ޕްރިމިއާ ލީގުގައި ޔުނައިޓެޑް ވިކްޓަރީ (ޔޫވީ) އާ ދެކޮޅަށް ކުޅެން އޮތް މެޗަކީ ޓީސީ ސްޕޯޓްސް ކުލަބަށް މި ސީޒަނުގެ އެންމެ މުހިންމު މެޗު ކަމަށް އެ ޓީމުގެ ކޯޗު މުޙައްމަދު ނިޒާމް (ނިޒާމްބެ) ބުނެފިއެވެ.

ލީގުގައި ހޮނިހިރު ދުވަހުގެ ހަވީރު ޔޫވީއާ ދެކޮޅަށް ޓީސީ ނުކުންނައިރު، އެންމެ ފަހުން ކުޅުނު މެޗުން ޓީސީ ވަނީ ސުޕަ ޔުނައިޓެޑް ސްޕޯޓްސް (ސަސް) އަތުން 1-0 ގެ ނަތީޖާއަކުން ބަލިވެ، ތާވަލުގެ ހަތްވަނައަށް ވެއްޓިފައެވެ. އެގޮތުން ލީގު ތާވަލުގެ ފުލުން ދެވަނައިގައި ޓީސީ އޮތީ ކުޅުނު 10 މެޗުން ލިބުނު ނުވަ ޕޮއިންޓާއެކުއެވެ.

ލީގުގައި ހޮނިހިރު ދުވަހުގެ ހަވީރު ޔޫވީއާ ދެކޮޅަށް ނުކުތުމުގެ ކުރިން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ނިޒާމްބެ ބުނީ މިހާރު ޓީސީ އޮތް ހާލަތަށް ބަލާނަމަ، ކުރިއަށް އޮތް މެޗަކީ މި ވަގުތު ޓީސީއަށް އެންމެ މުހިންމު މެޗު ކަމަށެވެ. އެގޮތުން ތާވަލުގައި މިހާރު އޮތް ހިސާބުން އަރައިގަތުމަށް ޔޫވީ މެޗުން ތިން ޕޮއިންޓް ހޯދުން މަޖުބޫރުކަމަށްވެސް ނިޒާމްބެ ވަނީ ބުނެފައެވެ. އަދި މިއީ މި ސީޒަނުގެވެސް އެންމެ މުހިންމު ތިން ޕޮއިންޓް ކަމަށާއި، އެހެންކަމުން މެޗާ ކުރިމަތިލާނީ ވަރަށް ފުރިހަމައަށް ތައްޔާރުވެގެން ކަމަށްވެސް ވަނީ ބުނެފައެވެ.

ނިޒާމްބެ އިތުރަށް ބުނީ މި ސީޒަނުގައި ޓީސީއަށް ދިމާވާ އެންމެ ބޮޑު އެއް މައްސަލައަކީ ލަނޑު ޖަހަން ލިބޭ ފުރުޞަތުތަކުގެ ބޭނުން ނުހިފުން ކަމަށެވެ. އެގޮތުން އެންމެ ފަހުން ކުޅުނު މެޗުތަކުގައިވެސް އެކަން ވަރަށް ބޮޑަށް ފާހަވަގެންދިޔަ ކަމަށާއި، މީގެ އިތުރުން އެ ޓީމުގައި ރަނގަޅު ބަދަލެއް ކުރަން ކުޅުންތެރިން ނެތުމަކީވެސް ދިމާވާ އެއް ގޮންޖެހުން ކަމަށްވެސް ނިޒާމްބެ ވަނީ ބުނެފައެވެ.

ޓީސީ މެޗުގެ ކުރިން ޔޫވީގެ ކޯޗު އިހުސާން އަބްދުލް ޣަނީ (ސާންތި) ބުނީ ޓީސީއާ ދެކޮޅަށް ނުކުންނައިރު އޮތް އެންމެ ބޮޑު ހިތްހަމަޖެހުމަކީ އެންމެ ފަހުން މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް ކުޅުނު މެޗުގައި ޔޫވީން ދެއްކި ރަނގަޅު ކުޅުން ކަމަށެވެ. އެގޮތުން އެ މެޗުން 1-0 ގެ ނަތީޖާއަކުން ބަލިވި ނަމަވެސް، މެޗުގައި ކުޅުންތެރިން މޮޅު ކުޅުމެއް ދެއްކި ކަމަށާއި، އެހެންކަމުން އެއީ ކުރިއަށް މެޗަށް ނުކުންނައިރު ޓީމުގެ ހާލަތު އިތުރަށް ރަނގަޅުވެގެންދާނެ ކަމެއް ކަމަށްވެސް ވަނީ ބުނެފައެވެ.

އެކަމަކު މި ސީޒަނުގައި ޔޫވީއަށް އަނިޔާގެ ގިނަ މައްސަލަތަކެއް ކުރިމަތިވެފައިވާއިރު، އެކަމުގެ އަސަރު ކުރިއަށް އޮތް މެޗުންވެސް ފެނިގެންދާނެ ކަމަށް ސާންތި ބުންޏެވެ. އެގޮތުން އެ ޓީމުގެ ބެދޭސީ ޑިފެންޑަރަށް އަނިޔާވެފައިވާއިރު، ޓީސީއާ ދެކޮޅަށް ކުޅޭ މެޗުގައި އޭނާއަށް ކުޅެވޭނެކަން އަދި ޔަގީންނުވާ ކަމަށްވެސް ސާންތި ވަނީ ބުނެފައެވެ.

ލީގުގައި ހޮނިހިރު ދުވަހުގެ ހަވީރު ޓީސީއާ ދެކޮޅަށް ނުކުންނައިރު، ފުލުގައި އޮތް ޔޫވީ އަދި މިހާތަނަށް މެޗަކުން މޮޅުވެފައެއް ނުވެއެވެ. އެގޮތުން ޔޫވީ ފުލުގައި އޮތީ ކުޅުނު 10 މެޗުން ލިބުނު އެންމެ ތިން ޕޮއިންޓާއެކުއެވެ.

ދިރާގު ދިވެހި ޕްރިމިއާ ލީގުގައި ޓީސީ އާއި ޔޫވީ ބައްދަލުކުރާ މެޗު ފަށާނީ ހޮނިހިރު ދުވަހުގެ ހަވީރު 16:00 ގައެވެ.