ކުރެންދޫން ކޮވިޑްގެ ކޭސްތަކެއް ފެނި މުޅި އަތޮޅަށް ބަލި ފެތުރިއްޖެ

ޅ ކުރެންދޫން ކޮވިޑްގެ ކޭސްތަކެއް ފެނި މުޅި އަތޮޅަށް ބަލި ފެތުރިއްޖެއެވެ.

އެކަމާއި ގުޅިގެން ކުރެންދޫ ސިއްހީ މަރުކަޒުން ބުނީ ކުރެންދޫން ނެގި ސާމްޕަލްތަކުގެ ތެރެއިން ދެ ސާމްޕަލެއް ޕޮޒިޓިވްވެފައިވާކަމަށެވެ. މިހާތަނަށް ކުރެންދޫން 166 ސާމްޕަލް ނަގާފައިވާއިރު ނަތީޖާ ލިބިފައި ވަނީ 100 ސާމްޕަލްގެ ތެރެއިންކަމަށް އެރަށު ސިއްހީ މަރުކަޒުން ބުނެއެވެ. ނަތީޖާ ނުލިބޭ 66 ސާމްޕަލް އަދިވާކަމަށް ވެސް ބުނެއެވެ.

ކުރެންދޫން ފެނުނު ކޮވިޑްގެ ކޭސްތަކާއި ގުޅިގެން އެރަށު ކައުންސިލްގެ ނާއިބުރައީސާ އައިޝަތު ވިޝާމާ "ރާއްޖެ އެމްވީ"އަށް މައުލޫމާތު ދެއްވަމުން ވިދާޅުވީ ޕޮޒިޓިވް ވެފައިވަނީ ބޮޑު މީހަކާއި ކުޑަކުއްޖެއްކަމަށެވެ. މިތަނުން އެކަކީ އެއަތޮޅުގެ ނައިފަރުން ފެނިފައިވާ ކްލަސްޓަރ އާ ގުޅިގެން ޕޮޒިޓިވްވި މީހެއްކަމަށާއި އަނެއް މީހާ ޕޮޒިޓިވްވިކަން އެނގިފައިވަނީ ނެގުނު ރޭންޑަމް ސާމްޕަލަކުން ކަމަށް ވިޝާމާ ވިދާޅުވިއެވެ.

ޕޮޒިޓިވް ކޭސްތަކެއް ފެނުމާ ގުޅިގެން ކޮންޓެކްޓް ޓްރޭސިން ހެދުމުގެ މަސައްކަތްކުރަމުން އަންނަކަމަށް ވިޝާމާ ވިދާޅުވިއެވެ. އަދި ރައްކާތެރިކަމުގެ ފިޔަވަޅުތަކަށް ސަމާލުކަން ދިނުމަށް ރައްޔިތުންނަށް އަންގަމުން އަންނަކަމަށްވެސް ވިދާޅުވިއެވެ.

ކުރެންދޫން ކޮވިޑްގެ ކޭސްތައް ފެނުމާއެކު އެއަތޮޅުގައި މީހުން ދިރިއުޅޭ ހުރިހާ ރަށަކުން މިހާރު ވަނީ ކޮވިޑްގެ ކޭސްތައް ފެނިފައެވެ. އެގޮތުން ޅ ހިންނަވަރުން މިހާތަނަށް 20 މީހަކު ޕޮޒިޓިވްވެފައިވާއިރު ނައިފަރުން ވަނީ 72 މީހަކު ޕޮޒިޓިވްވެފައެވެ.

ޅ އަތޮޅުން ކޭސްތައް ފެނިފައިވާއިރު ކުރެންދޫ ފިޔަވައި ދެން ހުރި ރަށްތައް ވަނީ މޮނިޓަރިން އަށް ގެނެސްފައެވެ. އަދި ނައިފަރުގައި ކޮވިޑްގެ ކޭސްތައް އިތުރުވަމުންދިޔުމާއެކު ޒަރޫރީ ބޭނުންތަކަށް ނޫނީ މަގުމައްޗަށް ނިކުމެ ނޫޅެވޭ ގޮތަށް ވަނީ ނިންމާފައެވެ.