ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފާދިއްޕޮޅަށް މިހާރު ކުރައްވަމުން ގެންދަވާ ދަތުރުފުޅާއި ދިމާކޮށް، ކުރެންދޫ އަށް ސަތަރި އަޅާފައިވާ ގޮތްނޭނގޭ ބާޖެއް ގެންގޮސް، ރައްޔިތުންގެ ކަންބޮޑުވުންތައް ހައްލުވާގޮތަށް ބަނދަރުގެ މަސައްކަތް ފުރިހަމަކޮށްދެއްވާނެކަމުގެ ޔަޤީންކަން ދެއްވައިފި އެވެ.

އެމަނިކުފާނު މިފަދައިން ވިދާޅުވީ، ފާދިއްޕޮޅުގެ މީހުން ދިރިއުޅޭ ރަށްރަށަށް މިއަދު ފެއްޓެވި ދަތުރުފުޅުގެ ދެވަނަ މަންޒިލެއްގެ ގޮތުގައި އެ އަތޮޅު ކުރެންދުއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވާ، ވާހަކަފުޅުދައްކަވަމުންނެވެ.

ބަނދަރުގެ މަޝްރޫއު:

ރައްޔިތުންނަށް އެންމެ ދަތިވެފައިވާ އެއް މައްސަލައަކީ ބަނދަރު އަދި ބަނދަރާއި ގުޅިފައިވާ މައްސަލަތައްކަން ފާހަގަކުރައްވައި، ބަނދަރުގެ މަޝްރޫޢު ކުރިއަށްގެންދާއިރުގައި ރައްޔިތުންގެ ކަންބޮޑުވުންތައް ހައްލުވާގޮތަށް ބަނދަރުގެ މަސައްކަތް ފުރިހަމަކޮށްދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފަ އެވެ. އެގޮތުން ރޭމްޕަކާއި އެއްގަމު ތޮށީގެ މަސައްކަތްތައް ކީވޯލް ޖަހައި، ތޮށިގަނޑަށް ބަދަލުތަކެއް ގެނައުމާއި ނެރުފައިކަށްޓައް ވެސް މުހިންމު ބަދަލުތަކެއް ގެންނަން ބޭނުންފުޅުވާކަން ހާމަކުރައްވައި ރައީސުލްޖުމްހޫރިއްޔާ ވަނީ މިހުރިހާ މަސައްކަތެއް ހިމެނޭހެން މަސައްކަތް ގެންދަވާނީ ރަށު ރައްޔިތުންގެ އުންމީދުތައް ހާސިލްވާގޮތަށް ކަމުގައި ވިދާޅުވެފަ އެވެ.

ރައީސް މިގޮތަށް ވިދާޅުވިއިރު މިކަމުގެ ކަންބޮޑުވުން އެރަށު ރައްޔިތުން ދަނީ ފާޅުކުރަމުންނެ އެވެ. އެގޮތުން އެއްވެސް ތަރައްގީގެ މަސްރޫއެއް ނުހިންގާ ދެއަހަރު ދުވަސް ދުއްވާލުމަށް ފަހު ސަތަރި އަޅާފައިވާ ގޮތްނޭނގޭ ބާޖަކުން ރައްޔިތުން ގުނބޯ ހެެއްދަޭނެ ކަމަށް މަނިކުފާނު ހީފުޅު ކުރައްވަނީތޯއޭ ވިދާޅުވެ ބައެއް ފަރާތްތަކުން ވަނީ ސުވާލު އުފައްދާފަ އެވެ.

ޞިއްޙީ މަރުކަޒު:

ރަށުގެ ޞިއްޙީ މަރުކަޒަށް އިތުރުކުރެވޭ އިމާރާތަކީ ރަށުގެ އާބާދީގެ ގިނަ ރައްޔިތުންނަށް އެންމެ އެކަށީގެންވާގޮތުގައި މިހާރު ނުދެވޭ ޚިދުމަތްތައް ގާއިމުކުރުމަށްޓަކައި އިތުރުކުރެވޭ އިމާރާތެއް ކަމުގައި އެމަނިކުފާނު ވިދާޅުވި އެވެ. މި އިމާރާތް ހަދާނީ 4 އެނދުގެ ވޯޑަކާއި ނަރސް ސްޓޭޝަން، އެކްސް ރޭ ކޮޓަރިއާއި ކޮންސަލްޓޭޝަން ކޮޓަރިއާއި ޕްރައިވެޓް ކޮޓަރި ހިމެނޭހެން ކަމުގައި ރައީސުލްޖުމްހޫރިއްޔާ ވިދާޅުވި އެވެ. މި މަޝްރޫޢާއެކު ރަށުގައި ޞިއްޙީ ޚިދުމަތް ވަރުގަދަކުރުމުގެ މަސައްކަތަށް ވަރަށް ބޮޑު ކުރިއެރުމެއް ލިބޭނެކަމުގައި ރައީސުލްޖުމްހޫރިއްޔާ ވިދާޅުވި އެވެ.

ބިމުގެ ޖާގައިގެ މައްސަލަ:

ރައީސުލްޖުމްހޫރިއްޔާގެ ވާހަކަފުޅުގައި ކުރެންދުއަށް އެންމެ ބޮޑުވެފައިވާ އެއް މައްސަލަކަމުގައިވާ، ބިމުގެ ޖާގައިގެ މައްސަލަ ޙައްލުކުރެއްވުމަށް، ޅޮސްއަލަފުށި އެ ރަށުގެ ބައެއްގެ ގޮތުގައި ހަމަޖައްސަވައިދެއްވުމަށް ވެވަޑައިގެންފައިވާ ވަޢުދާއެއްގޮތަށް އެ މަސައްކަތް ކުރައްވަމުން ގެންދަވާކަން ހާމަކުރައްވައި، އެ މަސައްކަތުގެ ތަފްސީލުތައް ހާމަކުރެއްވި އެވެ. އަދި ބިމުގައި ޖާގަ އޮތް މިންވަރަކުން ގެދޮރު އަޅައިދިނުމުގެ މަޝްރޫޢު ފަދަ މުހިންމު ކަންކަމަށް އިސްކަންދެއްވާނެކަމުގައި ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވި އެވެ.

ބައެއް އެއްބަސްވުންތައް:

މިރަސްމިއްޔާތުގައި ޅ. ކުރެންދޫ ޞިއްޙީ މަރުކަޒުގެ އައު އިމާރާތް ޤާއިމުކުރުމުގެ މަސައްކަތާއި ކުރެންދޫ މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތުގެ އެއްބަސްވުމުގައި ސޮއިކުރައްވައި، އެ މަސައްކަތްތައް ވަނީ ޙަވާލުކުރައްވާފަ އެވެ.