ބޭބީ ހައިމާކު އަކުން ކުރެންދޫ ބަނދަރު ތަރައްޤީ ކުރުމުގެ ބޮޑު މަޝްރޫޢު ރައީސް ފައްޓަވައި ދެއްވައިފި
53.36 މިލިއަން ރުފިޔާގެ މި މަޝްރޫޢުގެ މަސައްކަތްތައް 450 ދުވަހުގެ ތެރޭގައި ނިންމުމަށް ވަނީ އެމްޓީސީސީއާ ހަވާލުކޮށްފަ
ޅ. ކުރެންދޫ ބަނދަރު ތަރައްޤީ ކުރުމުގެ މަސައްކަތް ރަސްމީކޮށް ފައްޓާފައިވާއިރު، އެމްޓީސީސީ އިން ބޭނުންކުރާ ހައިމާކު
ބޭބީ ހައިމާކަކުން ޅ. ކުރެންދޫ ބަނދަރު ތަރައްޤީކުރުމުގެ ބޮޑު މަޝްރޫޢުގެ މަސައްކަތް ރަސްމީކޮށް ރައީސް މުއިއްޒު ގެ ހާޒިރުގައި ފަށައިފި އެވެ.
ޅ. ކުރެންދޫ ބަނދަރު ތަރައްޤީކުރުމުގެ މަޝްރޫޢުގެ ޢަމަލީ މަސައްކަތް ފެށުމުގެ ރަސްމިއްޔާތު ހޯމަ ދުވަހު އެރަށުގައި ބާއްވާފައިރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޝަރަފުވެރިކޮށްދެއްވި މި ރަސްމިއްޔާތުގައި މަޝްރޫޢުގެ މަސައްކަތް ފައްޓަވައިދެއްވީ މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ، ޑރ. ޢަބްދުﷲ މުއްޠަލިބެވެ.
ރައީސުލް ޖުމްހޫރިއްޔާ އާއި ކަމާ ބެހޭ ވަޒީރު ޝާމިލު ވާ ގޮތުން މި މަސައްކަތް ފެށި ގޮތުން ގިނަ ބަޔަކު ވަނީ ހަޖޫ ޖަހާފައެވެ. އެންމެ ކުޑަ ސައިޒުގެ ހައިމާކެއް ރަށުގެ ގޮނޑުދޮށަށް ބާލައިގެން މަސައްކަތް ފެށިކަން ދެއްކުމުން އެއީ މި ސަރުކާރުން ތަރައްގީ ގެންނަ ގޮޮތްތޯ ސޯޝަލް މީޑިއާ ގައި ސުވާލު ކޮށްފައި ވެއެވެ.
ރައްޔިތުންނާއި ބައްދަލުކުރައްވާ ވާހަކަ ދައްކަވަމުން ރައީސް ވިދާޅުވީ، ރައްޔިތުންނަށް އެންމެ ދަތިވެފައިވާ އެއް މައްސަލައަކީ ބަނދަރު އަދި ބަނދަރާއި ގުޅިފައިވާ މައްސަލަ ކަމަށެވެ.
53.36 މިލިއަން ރުފިޔާގެ މި މަޝްރޫޢުގެ މަސައްކަތްތައް 450 ދުވަހުގެ ތެރޭގައި ނިންމުމަށް ހަވާލު ކުރީ އެމްޓީސީސީއާ އެވެ. މި މަޝްރޫޢުގެ ދަށުން، 36,363 ކިއުބިކް މީޓަރުގެ ސަރަހައްދެއްގައި ކުރިން ފުންކޮށްފައިވާ ފަޅު އަލުން ފުންކުރުމާއި، 63 މީޓަރުގެ ސަރަހައްދެއްގައި ރިވެޓްމެންޓް ޖެހުމުގެ އިތުރުން 415 މީޓަރުގެ ސަރަހައްދެއްގައި ބޭރުތޮށި ލާ ގޮތައް ވަނީ ހަމަޖެހިފައެވެ. އަދި 243 މީޓަރު ދިގު އަދި 60 މީޓަރު ދިގު، 2 މީޓަރު ފުޅާ ދެ އާރްސީ ޖެޓީއެއްވެސް މި މަޝްރޫޢުގެ ދަށުން ހެދޭނެ އެވެ.
މި ރަސްމިއްޔާތުގައި ކެބިނެޓް މިނިސްޓަރުންނާއި، ރައްޔިތުންގެ މަޖިލީހުގެ މެންބަރުން، އެމްޓީސީސީގެ މެނޭޖިންގ ޑިރެކްޓަރ އަދި ޑެޕިއުޓީ ކޮމިޝަނަރ އޮފް ޕޮލިސް (ރިޓަޔަރޑް) އަޙްމަދު ސަޢުދީގެ އިތުރުން ކުރެންދޫ ކައުންސިލް މެންބަރުންނާއި ސަރުކާރުގެ އިދާރާތަކުގެ އިސްވެރިން ބައިވެރިވެވަޑައިގެންނެވި އެވެ.
