މި ސީޒަނަށްފަހު އަގުއޭރޯ ސިޓީ ދޫކޮށްލަނީ

މި ސީޒަނަށްފަހު މެންޗެސްޓާ ސިޓީ ދޫކޮށްލަން އާޖެންޓީނާގެ ތަޖުރިބާކާރު ފޯވާޑް ސާޖިއޯ އަގުއޭރޯ ނިންމައިފިއެވެ.

އުމުރުން 32 އަހަރުގެ ފޯވާޑް ސިޓީއާއެކު ހަދާފައި އޮތް އެއްބަސްވުން މި ސީޒަން ނިމުމުން ހަމަވާނެއެވެ. އެހެންކަމުން އެއްބަސްވުން އާކުރުމުގެ ބަދަލުގައި، ސިޓީ ދޫކޮށްލަން އަގުއޭރޯ ނިންމާފައިވާކަން އެ ޓީމުން ހޯމަ ދުވަހުގެރޭ ވަނީ ހާމަކޮށްފައެވެ.

އެހެންކަމުން އަގުއޭރޯގެ ހަނދާނުގައި ސިޓީގެ އިއްތިހާދު ސްޓޭޑިއަމުގައި އޭނާގެ ބުދެއް ބަހައްޓަން ނިންމާފައިވާކަންވެސް އެ ޓީމުން ވަނީ ހާމަކޮށްފައެވެ. މީގެ ކުރިން އިއްތިހާދު ސްޓޭޑިއަމުގައި ބުދު ބަހައްޓަން ނިންމާފައިވަނީ ސިޓީގެ ދެ ލެޖެންޑުން ކަމަށްވާ ވިންސެންޓް ކޮމްޕެނީ އާއި ޑޭވިޑް ސިލްވާގެ ބުދުތަކެވެ.

ސިޓީ ދޫކޮށްލަން އަގުއޭރޯ ނިންމުމުން، އެ ޓީމުގެ ޗެއާމަން ޚަލްދޫން އަލް މުބާރަކް ވަނީ މިދިޔަ 10 އަހަރުގެ ތެރޭގައި ސިޓީއަށް އަގުއޭރޯ ކޮށްދިން ޚިދުމަތް ދުވަހަކުވެސް ހަނދާނުން ނުނެތޭނެ ކަމަށް ވިދާޅުވެފައެވެ. އަދި އަގުއޭރޯއަކީ ސިޓީގެ ލެޖެންޑެއް ކަމަށާއި، އޭނާ ދެކެ އެ ޓީމުގެ ސަޕޯޓަރުންވާ ލޯބި ދުވަހަކުވެސް ފަނޑުވެގެން ނުދާނެ ކަމަށްވެސް ވަނީ ވިދާޅުވެފައެވެ.

މި ސީޒަނަށްފަހު އަގުއޭރޯ ސިޓީ ދޫކޮށްލާއިރު، އޭނާ ހޯދުމަށް ބާސެލޯނާއިން އަންނަނީ މަސައްކަތްކުރަމުންނެވެ. އެހެންކަމުން އަންނަ ސީޒަނުގައި ގާތް ދެ އެކުވެރިން ކަމަށްވާ އަގުއޭރޯ އާއި އާޖެންޓީނާގެ ތަރި ލިއޮނެލް މެސީ، އެއް ކުލަބަކުން ފެނިގެންދިޔުން ގާތް ކަމަށް ރިޕޯޓުތައް ބުނެއެވެ. ނަމަވެސް އަންނަ ސީޒަނުގައި ކުޅޭނެ ޓީމެއް އަދި މިހާތަނަށް އަގުއޭރޯ ހާމަކޮށްފައެއް ނުވެއެވެ.

ސިޓީގައި 10 އަހަރު ހޭދަކުރުމަށްފަހު އަގުއޭރޯ އެ ޓީމު ދޫކޮށްލާއިރު، އޭނާ އެންމެ ފުރަތަމަ ސިޓީއާ ގުޅުނީ 2011 ވަނަ އަހަރެވެ. އެއަށްފަހު އަގުއޭރޯ ވަނީ ސިޓީއަށް ކުޅެދިން 384 މެޗުގައި 257 ލަނޑު ޖަހާފައެވެ. އަދި އޭނާ ވަނީ ސިޓީއާއެކު އިނގިރޭސި ޕްރިމިއާ ލީގު ހަތަރު ފަހަރު ކާމިޔާބުކޮށްފައެވެ.