ހާލަންޑުގެ ދެ ލަނޑާ އެކު، ސިޓީ އިން ބާންލީ ބަލިކޮށްފި

އިނގިރޭސި ޕްރިމިއާ ލީގުގައި ބާންލީއާ ދެކޮޅަށް ކުޅުނު މެޗުން، މެންޗެސްޓަރ ސިޓީ މޮޅުވެއްޖެ އެވެ.

ސިޓީގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 5-1 އިންނެވެ. މެޗުގެ ފުރަތަމަ ހާފުގައި ސިޓީ އިން ލީޑު ނަގާފައި ވަނިކޮށް، ބާންލީ އިން ނަތީޖާ ހަމަހަމަ ކުރި އެވެ. ނަމަވެސް ސިޓީ އިން ވަނީ ދެ ވަނަ ހާފުގައި ހަތަރު ލަނޑު ޖަހައިފަ އެވެ.

މެޗު ފަށައިގެން 12 ވަނަ މިނެޓުގައި ސިޓީ އަށް ލީޑު ލިބުނީ ބާންލީގެ މެކްސިމް އެސްޓީވް އަތުން ބައި ކޮޅަށް ވަތް ލަނޑުންނެވެ. ނަމަވެސް ފުރަތަމަ ހާފު ނިމުމުގެ ކުރިން ޖައިޑޮން އެެންތަނީ ވަނީ ލަނޑު ޖަހައި ބާންލީ އަށް ނަތީޖާ ހަމަހަމަ ކޮށްދީފަ އެވެ.

މެޗުގެ ދެ ވަނަ ހާފުގައި ސިޓީ އިން ލަނޑު ޖަހައި ލީޑު ނެގީ ނޫނޯ މެންޑޭސް ޖެހި ލަނޑުންނެވެ. އެ ލަނޑު ޖަހަަން އޭނާ އަށް ފުރުސަތު ތަނަވަސްކޮށްދިނީ ނޯވޭގެ އާލިން ހާލަންޑް އެވެ. އޭގެ ހަތަރު މިނެޓު ފަހުން އަނެއްކާ ވެސް ބާންލީގެ އެސްޓީވް އަތުން ވަނީ ބައި ކޮޅަށް ލަނޑެއް ވަދެފަ އެވެ.

މެޗުގެ 90 ވަނަ މިނެޓުގައި ސިޓީގެ ހަތަރު ވަނަ ލަނޑު ޖެހީ ހާލަންޑް އެވެ. އެއީ ޖެރެމީ ޑޮކޫ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން އިތުރު ވަގުތުގައި ހާލަންޑް ވަނީ ދެ ވަނަ ލަނޑެއް ޖަހައި، ސިޓީގެ ފަސް ވަނަ ލަނޑު ހަމަ ކޮށްފަ އެވެ.

މޮޅާއެކު ސިޓީ އޮތީ ލީގު ތާވަލްގެ ހަ ވަނައިގަ އެވެ. އެއީ މިހާތަނަށް ކުޅެފައިވާ ހަ މެޗުން، 10 ޕޮއިންޓާ އެކު އެވެ. ތިން މެޗުން ސިޓީ މޮޅުވެފައިވާއިރު، އެއް މެޗުން އެއްވަރުވެފައިވެ އެވެ. އަނެއް ދެ މެޗުން އެ ޓީމު ވަނީ ބަލިވެފަ އެވެ.