ގްރީން ސްޓްރީޓްސް ބަލިކޮށް ވެލެންސިއާ އަލުން ދެވަނައަށް

ދިރާގު ދިވެހި ޕްރިމިއާ ލީގުގައި ހޯމަ ދުވަހުގެރޭ ކުލަބު ގްރީން ސްޓްރީޓްސް ބަލިކޮށް، ތާވަލުގެ ދެވަނައަށް ވެލެންސިއާ އަލުން ޖެހިލައިފިއެވެ.

ޤައުމީ ފުޓްބޯޅަ ދަނޑުގައި ކުޅުނު މެޗުން ވެލެންސިއާ މޮޅުވީ 3-0 ނަތީޖާއަކުންނެވެ.

މި މެޗުގެ ފުރަތަމަ ހާފުގައި ގްރީން ސްޓްރީޓްސްއިން ވަނީ ވެލެންސިއާގެ ގޯލަށް އަމާޒުކޮށް ނުރައްކާތެރި ގިނަ ހަމަލާތަކެއް ފޮނުވާލައިފައެވެ. އެގޮތުން މެޗުގެ އަށްވަނަ މިނެޓުގައި ޒުވާން ފޯވާޑް އަބްދުﷲ ޔާމީން ހުހަށްހުރެ ފޮނުވާލި ހަމަލާ ވެލެންސިއާގެ ގޯލްކީޕަރު މުޙައްމަދު ފައިސަލް ދިފާއުކުރިއިރު، އޭގެ ފަހުން މެޗުގެ 28 ވަނަ މިނެޓުގައި ގްރީން ސްޓްރީޓްސްގެ އަންޞާރު އިބްރާހީމް ފޮނުވާލި ބޯޅަ ދިޔައީ ގޯލާ އަމާޒުނުވެއެވެ.

އެކަމަކު އޭގެ ފަހުން ވެލެންސިއާއިން ކުޅުން ރަނގަޅުކުރިއިރު، ފުރަތަމަ ހާފުގައި އެ ޓީމުން ވަނީ ލީޑު ނަގާފައެވެ. އެގޮތުން ފުރަތަމ ނިމެން ދެ މިނެޓަށް ވެފައި ވަނިކޮށް ކެޕްޓަން އަލީ އަޝްފާގު (ދަގަނޑޭ) ގެ އެހީތެރިކަމާއެކު ވެލެންސިއާއަށް ލީޑު ނަގައިދިނީ މި ފަހަރުގެ ޓްރާންސްފާގައި އެޓީމާ އަލަށް ގުޅުނު ފޯވާޑް ބޯހަސް މާޓިންނެވެ.

މި މެޗުގެ ދެވަނަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ 75 ވަނަ މިނެޓުގައި ވެލެންސިއާއިން ވަނީ އިތުރު ލަނޑެއް ޖަހާ ލީޑު ފުޅާކޮށްފައެވެ. މި ލަނޑުވެސް އެޓީމަށް ކާމިޔާބުކޮށްދިނީ މާޓިންނެވެ. އަދި އޭގެ ދެ މިނެޓު ފަހުން ވެލެންސިއާގެ އަބްދުﷲ މިދުހަތު ފަހުމީ (ބިޗަޑު) އަށް ވަނީ އިތުރު ލަނޑެއް ޖެހުމަށް ހުސް ފުރުސަތެއް ލިބި ބޭކާރުވެފައެވެ. މި މެޗުގައި ވެލެންސިއާއިން ކާމިޔާބުކުރި ފަހު ލަނޑު، މެޗު ނިމެން މިނެޓަކަށް ވެފައި ވަނިކޮށް ކާމިޔާބުކޮށްދިނީ އިތުބާރު ފޯވާޑް އަލީ ފާސިރު (ސެންޓޭ) އެވެ. މި ލަނޑު އޭނާ ކާމިޔާބުކުރީ ބިޗަޑު ދިން ޕާހަކުންނެވެ.

މެޗަށްފަހު ވާހަކަދައްކަމުން ވެލެންސިއާގެ ކޯޗު މުޙައްމަދު އާތިފް (އާތީ) ބުނީ މެޗުން ތިން ޕޮއިންޓް ލިބުމުން އެކަމާ ހިތްހަމަޖެހޭ ކަމަށާއި، އަދި ޚާއްޞަކޮށް ބޮޑު ބްމެދުކެނޑުމަކަށްފަހު ކުޅުނު ފުރަތަމަ މެޗުގައި ޓީމުގެ ކުޅުން ރަނގަޅު ކަމަށެވެ.

ގްރީން ސްޓްރީޓްސްގެ ކޯޗު އަލީ ނިސްތާރު ބުނީ މެޗާ ބެހޭ ގޮތުން ވާހަކައެއް ދައްކަން ބޭނުންނުވާ ކަމަށާއި، އެކަމަގެ ސަބަބު ފުރަތަމަ ލަނޑުން އެނގޭނެ ކަމަށެވެ. ރެފުރީންގެ ނިންމުންތަކަށް ނުސީދާ ގޮތެއްގައި ނިސްތާރު ފާޑުކިއިރު، އޭނާ ބުނީ ހުރިހާ އެންމެން ކައިރިން އޭނާ އެދޭ އެދުމަކީ ވެލެންސިއާއިން ޖެހި ފުރަތަމަ ލަނޑު އޮފްސައިޑްވެފައި އޮތީ ކިތައް މީޓަރު ތޯ ބަލައިލަން، ރިޕްލޭ ބެލުމަށެވެ.

ގްރީން ސްޓްރީޓްސް އަތުން ހޯދި މޮޅާއެކު ތާވަލުގެ ދެވަނައަށް ވެލެންސިއާ އަލުން ޖެހިލީ ކުޅުނު 10 މެޗުން ލިބުނު 18 ޕޮއިންޓާއެކުގައެވެ. މި މެޗުން ބަލިވި ގްރީން ސްޓްރީޓްސް އޮތީ ތާވަލުގެ ހަތަރުވަނައިގައި 10 މެޗުން 14 ޕޮއިންޓާއެކުއެވެ.