ހެކި ނެތި ދަޢުވާއުފުލުމަކީ އަނބު ނެތް ގަހަކަށް ގާއުކުން، ޕީޖީގެ ނިންމެވުން ރަނގަޅު: ނިޝާން
28 މާރިޗު 2021 | އާދީއްތަ 19:17ދަޢުވާ ސާބިތުނުވެ މައްސަލައިގައި ހިމެނޭ މީހުން ދޫވެގެން ދިއުމަށް މަގުފަހިވެދޭ
ރާއްޖެޓީވީގެ ފަލަސުރުޙީ ޕްރޮގްރާމުގައި ބައިވެރިވެވަޑައިގެން ޤާނޫނީ ވަކީލު މުޙައްމަދު ނިޝާން އިބްރާހީމް ވާހަކަ ދައްކަވަނީ | ރާއްޖެއެމްވީ
ޖިނާއީ ކުށެއްގެ ދަޢުވާ ޕްރޮސެކިއުޓަރ ޖެނެރަލް (ޕީޖީ) އުފުއްލަވާއިރު، ކުށް ސާބިތުކުރެވޭ މިންވަރަށް ހެކި ނެތި ދަޢުވާ އުފުލައިފިނަމަ، ދައުލަތަށް ގެއްލިގެންދަނީ އިތުރު ޚަރަދުތަކެއް ކަމަށް ޤާނޫނީ ވަކީލު މުޙައްމަދު ނިޝާން އިބްރާހީމް ވިދާޅުވެއްޖެއެވެ.
އާދިއްތަ ދުވަހުގެރޭ ރާއްޖެޓީވީގެ "ފަލަސުރުޙީ" ޕްރޮގްރާމުގައި ވާހަކަ ދައްކަވަމުން ނިޝާން ވަނީ ކޮވިޑް-19 ގެ ބަލިމަޑުކަމުގެ ތެރޭގައި ރާއްޖެ ގެންނަން މަސައްކަތް ކުރި ވެންޓިލޭޓަރުތަކުގެ މައްސަލައިގައި ޕީޖީ އޮފީހާއި އޭސީސީއާ ދެމެދު އުފެދިފައިވާ ޙިޔާލުތަފާތުވުންތަކާ ގުޅޭގޮތުން ޤާނޫނީ ނަޒަރަކުން ވާހަކަ ދައްކަވާފައެވެ. އެގޮތުން ނިޝާން ވިދާޅުވީ، ޖިނާއީ ކުށެއްގެ ދަޢުވާ ޕީޖީ އުފުއްލަވާއިރު، ކުށް ސާބިތުކުރެވޭ މިންވަރަށް ހެކި ނެތި ދައުވާ އުފުލައިފިނަމަ، އެހިސާބުން ދައުލަތުންވެސް އެކަމަށްޓަކައި ބޭކާރު ޚަރަދުތަކެއް ކުރަންޖެހޭ ކަަމަށެވެ. އެގޮތުން މައްސަލަ ހުށަހަޅައި، ދައުޢުވާކުރަން ނިންމާ ހިސާބުން، ޕީޖީ އޮފީހުން އެކަމަށްޓަކައި ގިނަ މަސައްކަތްތަކެއް ކުރާނެކަން ފާހަގަކުރައްވައި ނިޝާން ވިދާޅުވީ، އެހިސާބުން ދައުލަތުގެ މުވައްޒަފުންނާއި ވަސީލަތްތައް އެކަމުގައި ބޭނުންކުރަންޖެހޭ ކަމަށެވެ.
ނިޝާން ވިދާޅުވީ، މި މައްސަލަ ދިރާސާކުރުމަށްފަހު ދަޢުވާއެއް އުފުލުމުގެ ބޭނުމުގައި ކޯޓަށް ފޮނުވުމުން ދެ ނަތިޖާއެއް ނުކުންނަ ކަމަށެވެ. އެއް ކަމެއްގެ ގޮތުން ދަޢުވާ ސާބިތުނުވެ މައްސަލައިގައި ހިމެނޭ މީހުން ދޫވެގެން ދިއުން ނިޝާން ފާހަގަކުރެއްވިއެވެ. އަދި ދެވަނަ ކަމެއްގެ ގޮތުން ކުށުގެ އަމަލުން ދޭހަވާ އެހެންކަމެއްގެ މައްޗަށް ދަޢުވާކުރުންވެސް ޤާނޫނުއަސާސީން މަނާވެގެންދާނެ ކަމަށް ނިޝާން ވިދާޅުވިއެވެ. އަދި ވިދާޅުވީ އެގޮތަށް ވިސްނަވާއިރު، ޕީޖީގެ ނިންމެވުން އެންމެ ރަނގަޅުކަމަށް ޤަބޫލުކުރެވޭ ކަމަށެވެ.
މި މައްސަލައާ ގުޅޭގޮތުން ޕީޖީ ހުސައިން ޝަމީމް މީގެ ކުރިން ވިދާޅުވެފައިވަނީ ދަޢުވާކުރުމަށް އެކަށީގެންވާ މިންވަރަށް ހެކި ހުރުމާއި، ސާބިތުކުރެވޭ މިންވަރަށް ހެކި ހުރުމަކީ ތަފާތު ދެކަމެއް ކަމަށެވެ. އެކަށީގެންވާ މިންވަރަށް ހެކި ނެތީސް ދަޢުވާކުރުމުން އެއިން ނުކުމެދާނެ ނުރަނގަޅު ނަތީޖާތަކެއް ހުންނާނެ ކަމަށްވެސް ޝަމީމް ވިދާޅުވިއެވެ. އެގޮތުން ދަޢުވާ ކުރާނެ ހެކި ނެތީސް ދަޢުވާ ކުރާ ފަހުން، ފައިސާ ޖަމާވެފައި ހުރި އެކައުންޓެއް ތަޙުޤީޤަށް ހޯދިއްޖެނަމަ، ދެން އަލުން ދަޢުވާކުރުމުގެ ފުރުޞަތު ޤާނޫނުއަސާސީން ފަހިވެފައި ނުވާކަން ޝަމީމުވެސް ވަނީ ފާހަގަކުރައްވާފައެވެ.
ދުބާއީގެ ކުންފުންޏެއް ކަމަށްވާ އެގްޒެކިއުޓާސް ޖެނެރަލް ޓްރޭޑިންނާއެކު 75 ވެންޓިލޭޓަރު ސަޕްލައިކޮށްދިނުމަށް އެއްބަސްވެފައިވާއިރު، މިހާތަނަށް ލިބިފައިވަނީ އެންމެ 15 ވެންޓިލޭޓަރެވެ. އެއްބަސްވުން ހެދިއިރު އެއްވެސް ގެރެންޓީއަކާ ނުލައި، އެ ކުންފުންޏަށް ވަނީ އެޑްވާންސަށް ފައިސާ ދީފައެވެ.
