ނިމިގެންދިޔަ ޓްރާންސްފާ ބާޒާރުގައި އަލަށް ގުޅުނު ބިދޭސީ ދެ ކުޅުންތެރިންނާއެކު، ކުލަބު ވެލެންސިއާއާ އިތުރަށް ވަރުގަދަވެގެން ގޮސްފައިވާ އެ ޓީމުގެ ކޯޗު މުޙައްމަދު އާތިފް (އާތީ) ބުނެފިއެވެ.

މި ފަހަރުގެ ޓްރާންސްފާގައި ވެލެންސިއާއިން ވަނީ ބްރެޒިލުގައި 2014 ވަނަ އަހަރު ބޭއްވި ފީފާ ވޯލްޑް ކަޕުގައި އީރާނުގެ ޤައުމީ ފުޓްބޯޅަ ޓީމަށް ކުޅުނު ޑިފެންޑަރު މެހެރްދާދް ޕޫލާދީ އާއި ސްޕެއިނުގެ ގިނަ ކުލަބުތަކާއި ފިންލެންޑް ފުރަތަމަ ޑިވިޝަނުގައި ކުޅެފައިވާ މިޑްފީލްޑަރު ބޯހަސް މާޓިންގެ ސޮއި ހޯދާފައެވެ. މީގެ ތެރެއިން މާޓިން މީގެ ކުރިންވެސް އައީ ވެލެންސިއާގެ ފަރިތަކުރުންތަކުގައި ބައިވެރިވަމުންނެވެ.

ދިރާގު ދިވެހި ޕްރިމިއާ ލީގުގައި ހޯމަ ދުވަހުގެރޭ ކުލަބު ގްރީން ސްޓްރީޓްސްއާ ދެކޮޅަށް ނުކުތުމުގެ ކުރިން އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން އާތީ ބުނީ ލީގުގައި ގްރީން ސްޓްރީޓްސްއާ ދެކޮޅަށް ވެލެންސިއާ ނުކުންނައިރު، ޓީމަށް ލިބޭ އެންމެ ބޮޑު ހިތްހަމަޖެހުމަކީ ބިދޭސީ ދެ ކުޅުންތެރިންނާއެކު ސްކޮޑް ވަރުގަދަވުން ކަމަށެވެ.

އެގޮތުން ވެލެންސިއާއާ ގުޅުނު އީރާނު ޑިފެންޑަރަކީ ތަޖުރިބާކާރު ކުޅުންތެރިއެއް ކަމަށާއި އެކަމުގެ ބޭނުން އޭނާ ހިފާނެ ކަމަށްވެސް އާތީ ބުންޏެވެ. ދެން އެ ޓީމަށް ގުޅުނު މާޓިންއާއެކު، ވެލެންސިއާގެ މެދުތެރެ ވަރުގަދަވެފައިވާ ކަމަށާއި, އެގޮތުން މާޓިންގެ ބޭނުން މެދުތެރޭގެ އިތުރުން އިތުރުން ފޯވާޑް ލައިނުގައިވެސް ހިފޭނެ ކަމަށް އާތި ވަނީ ބުނެފައެވެ.

ލީގުގައި ހޯމަ ދުވަހުގެރޭ ވެލެންސިއާ އާއި ގްރީން ސްޓްރީޓްސް ބައްދަލުކުރާއިރު، ވެލެންސިއާ އޮތީ ތާވަލުގެ ދެވަނައިގައި ކުޅުނު ނުވަ މެޗުން ލިބުނު 15 ޕޮއިންޓާއެކުގައެވެ. އަދި ލީގު ތާވަލުގެ ހަތަރުވަނައިގައި އޮތް ގްރީން ސްޓްރީޓްސްއަށް ކުޅުނު ނުވަ މެޗުން ވަނީ 14 ޕޮއިންޓް ލިބިފައެވެ.

ވެލެންސިއާ މެޗުގެ ކުރިން ގްރީން ސްޓްރީޓްސްގެ ކޯޗު އަލީ ނިސްތާރު މުޙައްމަދު ބުނީ މި މެޗަށް ނުކުންނައިރު، ގްރީން ސްޓްރީޓްސްއަށް ދިމާވާނެ އެންމެ ބޮޑު މައްސަލައަކީ ކުޅުންތެރިންގެ ވަރުބަލިކަން ކަމަށެވެ. އެގޮތުން ގްރީން ސްޓްރީޓްސްގެގެ ސްކޮޑުގައި ހުނަރުވެރި ކުޅުންތެރިން ތިބި ނަމަވެސް، ދެ ދުވަސް ކޮށްފައި މެޗެއް ކުޅެން ޖެހުމުން ޓީމު ރޮޓޭޓް ކުރަން ޖެހޭ ކަމަށްވެސް ނިސްތާރު ވަނީ ބުނެފައެވެ.

ދިރާގު ދިވެހި ޕްރިމިއާ ލީގުގައި ވެލެންސިއާ އާއި ގްރީން ސްޓްރީޓްސް ބައްދަލުކުރާ މެޗުން ފަށާނީ ހޯމަ ދުވަހުގެރޭ 21:00 ގައެވެ.