އޭއެފްސީ ކަޕުގެ މޮޅު ފޯވާޑުންގެ ތެރޭގައި ދަގަނޑޭ، ވޯޓެއް ދެއްވާ!

އޭއެފްސީ ކަޕުގެ ޑްރީމް ޓީމެއް ހޮވުމުގެ ގޮތުން ހުޅުވާލި އޮންލައިން ވޯޓިން ޕޯލެއްގައި މުބާރާތުގެ އެންމެ މޮޅު ފޯވާޑުންގެ ތެރޭގައި ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) ހިމެނިއްޖެއެވެ.

އޭއެފްސީން 13 ފޯވާޑުން ޝޯޓްލިސްޓުކުރިއިރު، އޭގެ ތެރޭގައި ދަގަނޑޭ އާއި އަވައްޓެރި އިންޑިއާގެ އެންމެ މޮޅު ފޯވާޑް ސުނިލް ޗެތުރީވެސް ވަނީ ހިމެނިފައެވެ. އޭއެފްސީ ވެބްސައިޓް މެދުވެރިކޮށް ކުރިއަށްދާ މި ވޯޓުގައި އަންނަ ހުކުރު ދުވަހުގެ މެންދުރުފަހު 02:00 އާ ހަމައަށް ދަގަނޑޭއަށް ވޯޓު ދެވޭނެއެވެ. އޮންލައިން ވޯޓުން ހޮވާ ޑްރީމް ޓީމު އެކުލަވާލަނީ 3-4-3 ފޯމޭޝަނަށް ކަމަށް އޭއެފްސީން ވަނީ ބުނެފައެވެ. އެހެންކަމުން 13 ފޯވާޑުންގެ ތެރެއިން ހޮވޭނީ އެންމެ ގިނަ ވޯޓު ލިބޭ ތިން ފޯވާޑުންނެވެ.

އޭއެފްސީ ކަޕުގެ މޮޅު ފޯވާޑުންގެ ތެރޭގައި ދަގަނޑޭ ހިމެނުނުއިރު، މީގެ ކުރިން އޭއެފްސީން އެކުލަވާލީ މުބާރާތުގެ އެންމެ މޮޅު ޑިފެންޑަރުންގެ ތެރޭގައި ރާއްޖޭގެ ޤައުމީ ފުޓްބޯޅަ ޓީމުގެ ކެޕްޓަން އަކުރަމް އަބްދުލް ޣަނީ (އަކޫ) ވެސް ވަނީ ހިމެނިފައެވެ. އެކަމަކު އޮންލައިން ވޯޓު މަދުވުމާއެކު ޑްރީމް ޓީމުގައި އޭނާ ހިމެނިފައެއް ނުވެއެވެ.

އޭއެފްސީ ކަޕުގެ މޮޅު ފޯވާޑުންގެ ތެރޭގައި ދަގަނޑޭ ހިމެނުނުއިރު، އޭނާ އެންމެ ފުރަތަމަ އޭއެފްސީ ކަޕުގައި ކުޅެފައިވަނީ އުމުރުން އެންމެ 18 އަހަރުގައި، 2004 ވަނަ އަހަރެވެ. އަދި އޭގެ ފަހުން މިހާތަނަށް އޭއެފްސީ ކަޕުގެ 10 މުބާރާތެއްގައި ދަގަނޑޭ ކުޅެފައިވާއިރު، މި ކޮންމެ މުބާރާތެއްގައިވެސް އޭނާ ވަނީ ލަނޑު ޖަހާފައެވެ. އެގޮތުން މިހާތަނަށް އޭއެފްސީ ކަޕުގައި ދަގަނޑޭ 29 ލަނޑު ޖަހާފައިވާއިރު، ދައޭނާއަކީ އޭއެފްސީ ކަޕުގައި އެންމެ ގިނަ ލަނޑު ޖެހި ކުޅުންތެރިންގެ ލިސްޓުގެ ހަތްވަނައިގައި އޮތް ކުޅުންތެރިޔާއެވެ.

މީގެ އިތުރުން 2005 ވަނަ އަހަރު ނިއު ރޭޑިއަންޓް ސްޕޯޓްސް ކުލަބުން އޭއެފްސީ ކަޕުގެ ސެމީ ފައިނަލުގައި ކުޅުނުއިރު، އެ ޓީމުގައި ދަގަނޑޭ ވަނީ މުހިންމު ދައުރެއް އަދާކޮށްފައެވެ. އަދި ނިއު ރޭޑިއަންޓުގެ އިތުރުން ކުލަބު ވެލެންސިއާ އާއި، ވީބީ އައްޑޫ އެފްސީ އަދި ޓީސީ ސްޕޯޓްސް ކުލަބާއެކުވެސް ދަގަނޑޭ ވަނީ އޭއެފްސީ ކަޕުގައި ވާދަކޮށްފައެވެ.

އޭއެފްސީ ކަޕުގެ މޮޅު ފޯވާޑުންގެ ތެރޭގައި ދަގަނޑޭ ހިމެނުނުއިރު، ދާދި ފަހުން އޭނާ ވަނީ އޭއެފްސީ ކަޕުގައި ޖަހާފައިވާ ފާހަގަކޮށްލެވޭ ލަނޑުތަކުގެ މެދުގައި ކުރިއަށްގެންދިޔަ އޭއެފްސީ ބްރެކެޓް ޗެލެންޖުވެސް ކާމިޔާބުކޮށްފައެވެ. އަދި އާންމުން ވޯޓު ދީގެން ހޮވި އޭއެފްސީ ކަޕްގެ އެންމެ މޮޅު ސޯލޯ ލަނޑަކަށްވެސް ދަގަނޑޭގެ ލަނޑު ވަނީ ހޮވިފައެވެ. އެ ލަނޑަކީ އޭއެފްސީ ކަޕުގައި 2013 ވަނަ އަހަރު ނިއު ރޭޑިއަންޓުން އިންޑޮނޭޝިއާގެ ޕާސިބޯގެ މައްޗަށް 0-7 ގެ ނަތީޖާއަކުން ކުރިހޯދި މެޗުގައި ދަގަނޑޭ ޖަހައިދިން ރީތި ހިތްގައިމު ސޯލޯ ލަނޑެވެ.