ޔޫވީ އަތުން ގްރީން ސްޓްރީޓްސްއަށް މުހިންމު މޮޅެއް
ތާވަލުގެ ހަތަރުވަނައިގައި ގްރީން ސްޓްރީޓްސް އޮތީ 14 ޕޮއިންޓާއެކު
ގްރީން ސްޓްރީޓްސް އާއި ޔޫވީ ބައްދަލުކުރި މެޗުގެ ތެރެއިން: މި މެޗުން ގްރީން ސްޓްރީޓްސް މޮޅުވީ 1-0 ން
ދިރާގު ދިވެހި ޕްރިމިއާ ލީގުގައި ހުކުރު ދުވަހުގެރޭ ކުޅުނު މެޗުން ޔުނައިޓެޑް ވިކްޓަރީ (ޔޫވީ) އަތުން ކުލަބު ގްރީން ސްޓްރީޓްސް މޮޅުވެއްޖެއެވެ.
ޤައުމީ ފުޓްބޯޅަ ދަނޑުގައި ކުޅުނު މެޗުން ގްރީން ސްޓްރީޓްސް މޮޅުވީ 1-0 ގެ ނަތީޖާއަކުންނެވެ.
މި މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ ފުރަތަމަ ހާފުގައި ދެ ޓީމުން ކުރެ ޓީމަކަށް ގޯލާ އަމާޒުކޮށް ނުރައްކާތެރި ހަމަލާއެއް އުފެއްދިފައެއް ނުވެއެވެ. އެކަމަކު މެޗުގެ ދެވަނަ ހާފުގައި ގްރީން ސްޓްރީޓްސްއިން ވަނީ އެ ޓީމުގެ ކުޅުން ރަނގަޅުކޮށް، ޔޫވީގެ ގޯލަށް ނުރައްކާ ކޮށްފައެވެ. އެގޮތުން ދެވަނަ ހާފު ފަށައިގެން ހަތަރުވަނަ މިނެޓުގައި ގްރީން ސްޓްރީޓްސްގެ ހަސަން ނަޒީމް (ޗޯޓު) ފޮނުވާލި ހަމަލާއެއް ވަނީ ގޯލުގެ ދަނޑިއަށް އަމާޒުވެފައެވެ.
މި މެޗުގައި ފެނިގެންދިޔަ ހަމައެކަނި ލަނޑު ގްރީން ސްޓްރީޓްސްއިން ކާމިޔާބުކުރީ މެޗުގެ 60 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ޗޯޓުއެވެ. އަދި އޭގެ ފަހުންވެސް ގްރީން ސްޓްރީޓްސްއަށް ވަނީ ލަނޑު ޖަހަން ރަނގަޅު ފުރުސަތުތަކެއް ލިބި ބޭކާރުވެފައެވެ.
މި މެޗަށްފަހު ވާހަކަދައްކަމުން ގްރީން ސްޓްރީޓްސްގެ ކޯޗު އަލީ ނިސްތާރު މުޙައްމަދު ބުނީ މެޗަށް ނުކުތީ ތިން ޕޮއިންޓް ހޯދަން ކަމަށާއި، އެކަން ހާސިލުވުމުން ހިތްހަމަޖެހޭ ކަމަށެވެ. އަދި ލީގު މެދު ކަނޑާލުމާއެކު މި މެޗަށް ވަރަށް ބޮޑަށް ތައްޔާރުވި ކަމަށާއި، އަދި ޔޫވީ އަތުން ލިބުނު ތިން ޕޮއިންޓަކީ ލީގުގައި ކުރިއަށްދިޔުމަށް ލިބުނު މުހިންމު ތިން ޕޮއިންޓް ކަމަށްވެސް ވަނީ ބުނެފައެވެ.
ޔޫވީގެ ކޯޗު އިހުސާން އަބްދުލް ޣަނީ (ސާންތި) ބުނީ މި މެޗުގައި އެ ޓީމުގެ ކެޕްޓަން މުޙައްމަދު އާރިފް (ބަކާ) ނެތްތަން ދެއްކި ކަމަށެވެ. އަދި ޔޫވީއަށް މިހާރު ބޭނުންވަނީ މޮޅެއް ކަމަށާއި، އެކަމަކު މި މެޗުގައި ޔޫވީގެ ފަރާތުން ފެނުނު ކުޅުމާ މެދު ހިތްހަމަޖެހޭ ކަމަށްވެސް ސާންތި ބުންޏެވެ.
މި މެޗުން މޮޅުވުމުން ގްރީން ސްޓްރީޓްސްއަށް ވަނީ ތާވަލުގެ ހަތަރުވަނައިގައި ތިން ޕޮއިންޓުގެ ލީޑެއް ލިބިފައެވެ. އެގޮތުން ގްރީން ސްޓްރީޓްސްއަށް ނުވަ މެޗުން 14 ޕޮއިންޓް ލިބިފައިވާއިރު، ތިންވަނައިގައި އޮތް ދަ ގްރާންޑޭ ސްޕޯޓްސް ކުލަބާއި، ދެވަނައިގައި އޮތް ވެލެންސިއާއަށް ނުވަ މެޗުން ވަނީ 15 ޕޮއިންޓް ލިބިފައެވެ. އަދި މިހާތަނަށް މެޗަކުން މޮޅުވެފައި ނުވާއިރު، ޔޫވީ އޮތީ ތާވަލުގެ ފުލުގައި ތިން ޕޮއިންޓާއެކުއެވެ.
