ގްރީޒްމަން ބޭނުންވަނީ ބާސާގައި މަޑުކުރަން

ކުރިއަތް އޮތް ހޫނު މޫސުމުގައި ބާސެލޯނާ ދޫކޮށްލުމުގެ ބަދަލުގައި، އެ ޓީމުގައި މަޑުކުރަން ފްރާންސްގެ ފޯވާޑް އެންޓޮއިން ގްރީޒްމަން ބޭނުންވާ ކަމަށް ރިޕޯޓުތައް ބުނެފިއެވެ.

އުމުރުން 30 އަހަރުގެ ގްރީޒްމަން ބާސާއަށް ބަދަލުވީ 2019 އަހަރުގެ ހޫނު މޫސުމުގައި، އޭނާ ކުރީގެ ކުލަބު އެތުލެޓިކޯ މެޑްރިޑާއެކު ހަދާފައިވާ އެއްބަސްވުން އުވާލަން ދައްކަންޖެހޭ 120 މިލިއަން ޔޫރޯ ބާސާއިން ދެއްކުމުންނެވެ. ބާސާއާއެކު ގްރީޒްމަން ފަސް އަހަރުގެ މުއްދަތަކަށް ސޮއިކުރިއިރު، އެ އެއްބަސްވުން ހަމަވާނީ 2024 ވަނަ އަހަރުގެ ޖޫން މަހުއެވެ.

އެކަމަކު ބާސާއަށް ބަދަލުވުމަށްފަހު މީގެ ކުރިން ގްރީޒްމަނަށް އެންމެ އެދެވޭ ކުޅުމެއް ދެއްކިފައެއް ނުވެއެވެ. އެހެންކަމުން ބާސާ ދޫކޮށްލަން ގްރީޒްމަން ބޭނުންވާ ކަމަށް މީގެ ކުރިން ސްޕެއިނުގެ މީޑިއާތަކުން ވަނީ ރިޕޯޓުކޮށްފައެވެ. އަދި މީގެ ކުރިން ގްރީޒްމަން ވިއްކާލަން ބާސާއިން މަސައްކަތްކުރި ކަމަށްވެސް ބައެއް މީޑިއާތަކުން ރިޕޯޓުކުރިއެވެ. ނަމަވެސް ބާސާގެ ކޯޗުގެ މަގާމާ މިދިޔަ އަހަރުގެ އޯގަސްޓް މަހުގެ ތެރޭގައި ރޮނާލްޑް ކޫމަން ހަވާލުވި ފަހުން ގްރީޒްމަނުގެ ކުޅުން ވަނީ ރަނގަޅުވެފައެވެ. އެގޮތުން މި އަހަރު އޭނާ އަންނަނީ ބާސާގައި މޮޅު ކުޅުމެއް ދައްކަމުންނެވެ.

އެއާއެކު ދާދި ފަހުން ސްޕެއިނުގެ ނޫހަކުން ވަނީ ބާސާ ދޫކޮށްލަން ގްރީޒްމަން ބޭނުންނުވާ ކަމަށް ރިޕޯޓުކޮށްފައެވެ. އެގޮތުން ގްރީޒްމަން ބާސާގައި ހުރީ ހިތްހަމަޖެހިގެން ކަމަށާއި، ބާސާއާއެކު ގިނަ ކާމިޔާބީތަކެއް ހޯދުމަށް ގްރީޒްމަން ބޭނުންވާ ކަމަށްވެސް އެ ނޫހުގައި ވަނީ ރިޕޯޓުކޮށްފައެވެ.

ގްރީޒްމަން ބާސާއަށް ބަދަލުވި ސީޒަނުގައި ބާސާއިން ހުސްއަތާ ސީޒަން ނިންމާލި ނަމަވެސް، މި ސީޒަނުގައި އެ ޓީމުން އަންނަނީ މޮޅު ކުޅުމެއް ދައްކަމުންނެވެ. އަދި މިހާތަނަށް ގްރީޒްމަން ބާސާއަށް 88 މެޗު ކުޅެދީފައިވާއިރު، އޭނާ ވަނީ ބާސާއަށް 29 ލަނޑު ޖަހައިދީފައެވެ.