ދުނިޔޭގެ އެހެން ޤައުމުތަކުން މިސާލު ނަގައި، ރާއްޖޭގެ ފުޓްބޯޅަ އަލުން ފަށަން ޖެހޭ ކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ކުރީގެ ރައީސް އަޙްމަދު ޠާރިޤް (ޓޮމް) ވިދާޅުވެއްޖެއެވެ.

ކޮވިޑް-19 ގެ ކޭސްތައް މާލެ ސިޓީގައި އިތުރުވުމާއެކު ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނެރުނު އައު އުސޫލުތަކާ ގުޅިގެން ދިރާގު ދިވެހި ޕްރިމިއާ ލީގު މެދުކަނޑާލަން ނިންމީ މިދިޔަ ފެބްރުއަރީ މަހުގެ ތިންވަނަ ދުވަހުއެވެ. އެއާއެކު މީގެ ކުރިންވެސް ފުރަތަމަ ޑިވިޝަނުގެ ހުރިހާ ކުލަބަކުން ވަނީ ލީގު މެދުކަނޑާލުމުން ކުލަބުތަކާއި ކުޅުންތެރިންނަށް ބޮޑު ގެއްލުމަކާ ކުރިމަތިލާން ޖެހޭނެ ކަމަށާއި، އެހެންކަމުން ލީގު ފެށުމުގެ ހުއްދަދިނުމަށް ގޮވާލާފައެވެ.

އޭގެ ފަހުން މިދިޔަ ފެބްރުއަރީ މަހުގެ 25 ވަނަ ދުވަހު ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއި އެޗްޕީއޭ ގުޅިގެން އެކުލަވާލި އައު އުސޫލުތަކުގެ ދަށުން ފުރަތަމަ ޑިވިޝަނުގެ ކުލަބުތަކަށް ފަރިތަކުރުންތައް ފެށުމުގެ ހުއްދަ ވަނީ ދީފައެވެ. އެއާއެކު އެޗްޕީއޭ ގުޅިގެން މި މަހުގެ 20 ވަނަ ދުވަހު ލީގު އަލުން ފަށަން އެފްއޭއެމުން މަސައްކަތްކުރިއިރު، ފަހުން ވަނީ މި މަހުގެ 25 ވަނަ ދުވަހު ލީގު އަލުން ފެށޭތޯވެސް މަސައްކަތްކޮށްފައެވެ. އެކަމަކު މިހާތަނަށްވެސް ލީގު އަލުން ފެށުމުގެ ހުއްދަ އެޗްޕީއޭއިން ދީފައެއް ނުވެއެވެ.

ފުރަތަމަ ޑިވިޝަނުގެ ކުލަބުތަކުންވެސް ވާނުވާ ނޭނގި، ކެތްތެރިކަން ކޮޅުންލާފައިވާ ދަނޑިވަޅެއްގައި، ފޭސްބުކުގައި ހިއްސާކުރެއްވި ލިޔުމެއްގައި ޤައުމީ ފުޓްބޯޅަ ޓީމުގެ ކުރީގެ ފޯވާޑް ޓޮމް ވިދާޅުވީ ފުޓްބޯޅަ ކުޅުންތެރިންނާއި، ކުލަބުތަކަށް މުބާރާތް ކުޅެން ފެށުމުގެ ހުއްދަދިނުމަށް ސަރުކާރުގެ ކަމާ ބެހޭ ވެރިންނަށް ގޮވާލާ ކަމަށެވެ. އަދި ފުޓްބޯޅަ އާއި ޤައުމު ހުއްޓުވާފައި ދެން ނުބޭއްވޭނެ ކަމަށްވެސް ވަނީ ވިދާޅުވެފައެވެ. އަދި ވިދާޅުވީ އެޗްޕީއޭގެ އުސޫލުތައް ހަމަނުޖެހޭކަން، އެ އިދާރާގެ ވެރިންނަށްވެސް އެނގޭނެ ކަމަށާއި، ޓެގް ޓީމެއްގެ އަތްމައްޗަށް ޤައުމު ދީފައި އޮންނަތާ އަހަރެއް ވެފައިވާ ކަމަށެވެ.

ރާއްޖޭގެ ފުޓްބޯޅަ ހަރަކާތްތައް ހުއްޓާލަން އެޗްޕީއޭއިން އަންގާފައިވާއިރު، ރާއްޖެ ހިމެނޭ ދެކުނު އޭޝިއާ ސަރަޙައްދުގައި މި ވަގުތު ފުޓްބޯޅަ ހުއްޓިފައި އޮތް ހަމައެކަނި ޤައުމަކީވެސް ރާއްޖެއެވެ.

ލީގު އަލުން ފެށުމުގެ ހުއްދައަށް އެދި ކުލަބުތަކުން އާދޭސްކުރަމުން އަންނައިރު، ވީ އެންމެ އަވަސް ފުރުޞަތެއްގައި ފުޓްބޯޅަ ކުޅުންތެރިންގެ ޙައްޤުތައް ހޯދައިދިނުމަށް ކަމާ ގުޅުންހުރި ހުރިހާ އިދާރާތަކަށް އެފްއޭއެމުގެ ރައީސް ބައްސާމް އަދީލް ޖަލީލުވެސް ވަނީ ގޮވާލައްވާފައެވެ. ލީގު އަލުން ފެށުމަށް ކުރަމުންދާ މަސައްކަތުގެ ދަށުން، މީގެ ކުރިން ކުލަބުތަކުން ވަނީ ރާއިސުލްޖުމްހޫރިއްޔާ އިބްރާޙީމް މުޙައްމަދު ޞާލިޙާވެސް ބައްދަލުކޮށްފައެވެ. އަދި ލީގު އަލުން ފެށުމަށް ކުޅިވަރާ ބެހޭ ވަޒީރު އަޙްމަދު މަޚްލޫފާއި، ޞިއްޙަތާ ބެހޭ ވަޒީރު އަޙްމަދު ނަސީމުވެސް ވަރަށް ބޮޑަށް އެއްބާރުލުން ދެމުން އަންނަ ދަނޑިވަޅެއްގައި، އެޗްޕީއޭއިން ލީގު ފެށުމަށް ހުއްދަދީފައި ނުވާތީ ކުލަބުތަކުން ވަނީ ކަންބޮޑުވުން ފާޅުކޮށްފައެވެ.