ފްލައިޓް ޗާޓާކޮށްގެން ވެކްސިން ބަލައި ދާން ޖެހުމުން އަނދުން ހުސެއިންގެ ފާޑުކިޔުން ޗައިނާއަށް!
ޗައިނާއިން ވަނީ އެގައުމުން އުފެއްދި ސިނަފަރމް ވެކްސިންގެ ދެ ލައްކަ ޑޯޒު ރާއްޖެއަށް ހަދިޔާ ކުރާނެކަން އިއުލާން ކޮށްފައި
ރައްޔިތުން މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމް
ޗައިނާއިން ރާއްޖެއަށް ހަދިޔާކުރި ކޮވިޑް-19 ވެކްސިން ބަލައި ފްލައިޓް ޗާޓާކޮށްގެން ދާން ޖެހުމުން ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް (އަނދުން ހުސެއިން) ޗައިނާއަށް ފާޑު ވިދާޅުވެއްޖެއެވެ.
ޗައިނާއިން ރާއްޖެއަށް ކަނޑައަޅާފައި ހުންނަވާ ސަފީރު ޖަންގ ލިޖޮންގ ޓެގް ކުރައްވާ ހޯމަ ދުވަހުގެރޭ އަނދުން ހުސެއިން ކުރެއްވި ޓްވީޓެއްގައި ވިދާޅުވީ، ޗައިނާއިން ރާއްޖެއަށް ހަދިޔާކުރި ވެކްސިން ބަލައި ދިއުމަށް 100،000 (އެއްލައްކަ) ޑޮލަރު ހޭދަކޮށްގެން ފްލައިޓެއް ޗާޓާކޮށްގެން ދާން ޖެހުން އެއީ ހިތާމަވެރި ހަބަރެއް ކަމަށެވެ.
ޗައިނާއިން ވަނީ އެގައުމުން އުފެއްދި ސިނަފަރމް ވެކްސިންގެ ދެ ލައްކަ ޑޯޒު ރާއްޖެއަށް ހަދިޔާ ކުރާނެކަން އިއުލާން ކޮށްފައެވެ. އެހެންނަމަވެސް ނިމިދިޔަ ހަފްތާ ރާއްޖޭގެ މީޑިއާތަކުން ވަނީ ޗައިނާއިން ހަދިޔާކުރި ވެކްސިން ބަލައި އެގައުމަށް ދާން ޖެހޭނެ ކަމަށް ބުނެ ރިޕޯޓްކޮށްފައެވެ. އެއާއެކު މިކަމަށް ގިނަ ބަޔަކުގެ ފާޑުކިޔުން ވަނީ އަމާޒުވެފައެވެ.
