ފްރެންޗް ލީގުގައި އާދީއްތަ ދުވަހުގެރޭ ކުޅުނު މެޗުން ލިޔޯން ބަލިކޮށް، ތާވަލުގެ އެއްވަނައަށް އެންމެ ފަހުގެ ޗެމްޕިއަން ޕީއެސްޖީ ޖެހިލައިފިއެވެ.

ރަށުން ބޭރުގައި ކުޅުނު މެޗުން ޕީއެސްޖީ މޮޅުވީ 4-2 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ޕީއެސްޖީގެ ފަރާތުން މޮޅު ކުޅުމެއް ފެނިގެންދިޔައިރު، މެޗުގެ 15 ވަނަ މިނެޓުގައި ޒުވާން ތަރި ކީލިއަން އެމްބާޕޭ ވަނީ އެ ޓީމަށް ލީޑު ނަގައިދީފައެވެ. އަދި އޭގެ ފަހުން މެޗުގެ 32 ވަނަ މިނެޓުގައި ޕީއެސްޖީއަށް ލީޑު ފުޅާކޮށްދިނީ ޑަނީލޯ ޕެރެއިރާއެވެ.

މެޗުގެ ދެވަނަ ހާފުގެ ކުރީކޮޅު ޕީއެސްޖީން ގިނަ ހަމަލާތަކެއް އުފެއްދިއިރު، މި ހާފު ފަށައިގެން ދެވަނަ މިނެޓުގައި އެންހެލް ޑި މާރިއާ ވަނީ ޕީއެސްޖީގެ ތިންވަނަ ލަނޑު ޖަހާފައެވެ. އަދި އޭގެ ފަސް މިނެޓު ފަހުން ޕީއެސްޖީގެ ހަތަރުވަނަ ލަނޑު ޖަހައިދިނީ މެޗުގައި މޮޅު ކުޅުމެއް ދެއްކި އެމްބާޕޭއެވެ. އެކަމަކު އޭގެ ފަހުން އިސްލާމް ސްލިމާނީ އާއި މެކްސްވެލް ކޯނެޓުގެ ލަނޑުތަކުން ލިޔޯނުން ވަނީ ފަރަގު ކުޑަކޮށްފައެވެ.

މި މެޗުގައި ޕީއެސްޖީއަށް ކުޅެމުން އަންނަ ފްރާންސްގެ ތަރި އެމްބާޕޭ ދެ ލަނޑު ޖެހިއިރު، އޭނާ މިހާރު ވަނީ ފްރެންޗް ލީގުގައި 100 ލަނޑު ހަމަކޮށްފައެވެ. އެއާއެކު އުމުރުން 22 އަހަރުގެ އެމްބާޕޭ ވެފައިވަނީ ފްރެންޗް ލީގުގެ ތާރީޚުގައި 100 ލަނޑު ހަމަކުރި އެންމެ ހަގު ކުޅުންތެރިޔާއަށެވެ.

އާދީއްތަ ދުވަހުގެރޭ ކުޅުނު މެޗުން ޕީއެސްޖީ މޮޅުވިއިރު، ތާވަލުގެ އެއްވަނައަށް އެ ޓީމު ޖެހިލީ ކުޅުނު 30 މެޗުން ލިބުނު 63 ޕޮއިންޓާއެކުއެވެ. ދެވަނައިގައި އޮތް ލިލްއަށްވެސް 30 މެޗުން 63 ޕޮއިންޓް ލިބިފައިވާއިރު، ޕީއެސްޖީއަށް ކުރި ލިބެނީ ލަނޑުގެ ތަފާތުންނެވެ. އަދި ޕީއެސްޖީ އަތުން ބަލިވި ލިޔޯން ތިންވަނައަށް ވެއްޓުނުއިރު، އެ ޓީމަށް 30 މެޗުން ލިބިފައިވަނީ 60 ޕޮއިންޓެވެ.