ރައްޔިތުންނަށް ލިބެމުންދާ އަނިޔާ ފެނިވަޑައިނުގަންނަވަންޏާ ރައީސް ކަމުގެ މަގާމުގައި އަބުދުﷲ ޔާމީން ހުންނަން ކުފޫ ހަމަނުވާކަމަށް ޕީޕީއެމް ރައީސް މައުމޫނު އަބްދުއްޤައްޔޫމް ފެކްޝަންގެ ނައިބު ލީޑަރު، އާމިނަތު ނާދިރާ ވިދާޅުވެއްޖެއެވެ.

ގުޅިފައިވާ ސިޔާސީ ޕާޓީތަކުން ގއ. ވިލިނގިލިގައި ބޭއްވި ޖަލްސާގައި ވާހަކަދައްކަވަމުން ނާދިރާ ވިދާޅުވީ، ދިވެހި މަސްވެރިންގެ އާމްދަނީ ސަރުކާރުން ވަނީ ފޭރިގެންފައިކަމަށާއި، އާމްދަނީ ލިބޭނެ ގޮތެއް ނެތްއިރު، މަސްކޮޅު ޖެހެނީ އުކާލަންކަމަށެވެ. އަދި ބެޔަސް ނުބެޔަސް ދޭން ވައުދުވި ފައިސާ ދިނުމަށް ނާދިރާ ވަނީ ސަރުކާރަށް ގޮވާލައްވާފަ އެވެ. އޭނާ ވިދާޅުވީ މަސްވެރިން ބާނާ މަހަށް ހަމަ އަގުދޭންޖެހޭ ކަމަށެވެ.

ކިޔަވައިގެން ތިބި މޮޅު ޒުވާނުން ތިއްބައި ވަކިބަޔަކަށް ވަޒީފާ ދޭ ދިނުން މިއަދު އާއްމުވުމުން، ކިޔަވައިގެން ތިބި ޒުވާނުން ތިބީ ބޭކާރު ބަޔަކަށް ވެފައިކަމަށް ނާދިރާ ވިދާޅުވިއެވެ. އަދި ވަޒީފާގައި ތިބި ފަރާތްތަކަށް ވެސް އިންތިހާއަށް ބިރުދައްކަމުންދާއިރު، ވަޒީފާގެ ބަޔާނުގައިވާ ގޮތަށް އެފަރާތްތަކުގެ ހައްގުތަށް ކަށަވަރުކޮށްދީ ބިރުދެއްކުން ހުއްޓާލުމަށް ނާދިރާ ގޮވާލެއްވިއެވެ.

ނޫސްވެރިކަމުގެ މިނިވަންކަމާއި ގުޅޭގޮތުން ނާދިރާ ވިދާޅުވީ، އަބުރުގެ ގާނޫނެއްގެ ދަށުން މިއަދު ނޫސްވެރިކަމުގެ މިނިވަންކަން އެއްކޮށް ގެއްލުވާލާފައިވާކަމަށެވެ. އަބުރަކީ އަމިއްލައަށް ރައްކާ ކުރެވޭ އެއްޗެއްކަން ނޭނގުމަކީ އާއްމުންގެ ކުށެއްނޫންކަމަށް ނާދިރާ ވިދާޅުވިއެވެ.

އެ މޭރުމުން ވާހަކަދައްކަވަމުން ނާދިރާ ވިދާޅުވީ، ދިހަ ޓަނު ކަދުރު ކާލީމާ އެވާހަކަ ނުދައްކާ ނުތިބޭނެކަން އެބޭފުޅުންނަށް އެނގެން ޖެހޭނެކަމަށެވެ. އަދި 1.5 ބިލިއަން ރުފިޔާ މާލިއްޔަތުން ގެއްލުމުން އެވާހަކަ ދައްކާނެކަމާއި، ބަކަރި ކަތިލީމައި އެވާހަކަ ނުދައްކާ ނުތިބޭނެކަމަށް ނާދިރާ ވިދާޅުވިއެވެ. ނާދިރާ ވިދާޅުވީ، އެވާހަކަތައް ދައްކަނީ އެއީ ދިވެހި ރައްޔިތުންގެ ތަކެތި ވީމައިކަމަށާއި އެކަން އެގޮތަށް ނުކުރިނަމަ އެވާހަކަތައް ދައްކަން ނުޖެހުނީސްކަމަށެވެ. މުއައްސަސާތަކަށް ނުފޫޒު ފޯރުވީމައި އެވާހަކަވެސް ދައްކާނެކަމަށާއި، މުއައްސަސާތައް ނަޒާހަތްތެރިކުރުމުގެ ނަމުގައި ފްލެޓް ދިނުމުން އެވާހަކަދެއްކުމަކީ އަބުރަށް އަރައިގަތުން ނޫންކަމަށް ނާދިރާ ވިދާޅުވިއެވެ.

ނާދިރާ ވިދާޅުވިގޮތުގައި ނޫސްވެރިކަމުގެ މިނިވަންކަމާއި، ވަޒީފާގެ ފުރުސަތު ތަކާއި އެކަން ކަމުގެ ހާލަތު މިއަދު އޮތީ، ޖާހިލިއްޔަ ޒަމާނުގައި އަޅުންނަށް އޮންނަ މިނިވަންކަން ގެއްލިފައިވާ ދަރަޖައަށް ވެއްޓިފައެވެ.

"އެމީހުނަށް އެނގޭނެ ތިމަންމެންނަކީ އަޅުންކަން. ތިމަންމެންނަކަށް ބޭނުންކަމެއް ނުކުރެވޭނެކަން" ނާދިރާ ވިދާޅުވިއެވެ.

ގާނޫނުއަސާސީ މިއަދު އެ ހުރިހާ މިނިވަންކަމެއް ލިބިދީފައި އޮތް އިރުވެސް، މިއަދު އުޅެން ޖެހިފައިވަނީ އަޅުންނަށްވުރެވެސް ދަތިހާލުގައިކަމަށް ނާދިރާ ވިދާޅުވިއެވެ. ދިވެހިރައްޔިތުން ކާ ކާޑުގެ ބާވަތްތަކުން އަގުބޮޑު ކުރި ކުރުން އަނބުރާ ގެންގޮސް ކުރިން ހުރިއަގަށް ތިރިކޮށް، ކަރަންޓާއި ފެނާއި، މުއާސަލާތީ ޚިދުމަތްތަކުން ނަގަމުންދާ ޓެކްސްއަކީ ރައްޔިތުންނަށް ތަކުލީފަކަށް ނުވާނެގޮތަކަށް ކަންކަން ކޮށްދިނުމަށް ރައީސް ޔާމީނަށް ގޮވާލާކަމަށް ނާދިރާ ވިދާޅުވިއެވެ.