ކުއާޓާގައި ބަޔާނާއި ޕީއެސްޖީގެ ކުރިމަތިލުމެއް

ޔުއެފާ ޗެމްޕިއަންސް ލީގުގެ ކުއާޓާ ފައިނަލުގައި އެންމެ ފަހުގެ ޗެމްޕިއަން ބަޔާން މިއުނިކާއި ޕީއެސްޖީ ބައްދަލުކުރަން ޖެހިއްޖެއެވެ.

ޗެމްޕިއަންސް ލީގުގެ ކުއާޓާގެ ގުރު ނެގުން ކުރިއަށްދިޔައީ ހުކުރު ދުވަހުގެ ހަވީރުއެވެ. މި ސީޒަނުގެ ޗެމްޕިއަންސް ލީގުގެ ކުއާޓާގައި ބަޔާނާއި ޕީއެސްޖީ ބައްދަލުކުރާއިރު، މިދިޔަ ސީޒަނުގެ ޗެމްޕިއަންސް ލީގުގެ ފައިނަލް މެޗުގައި މި ދެ ޓީމު ވަނީ ބައްދަލުކޮށްފައެވެ. އެ ފަހަރު ފައިނަލް މެޗުން 1-0 ގެ ނަތީޖާއަކުން ޕީއެސްޖީ ބަލިކޮށް، ބަޔާނުން ވަނީ ހަވަނަ ފަހަރަށް ޔޫރަޕުގެ ޗެމްޕިއަންކަން ހޯދާފައެވެ.

މީގެ އިތުރުން ކުއާޓާގައި ދެން ފާހަގަކޮށްލެވޭ އަނެއް މެޗަކީ ސްޕެއިނުގެ ޗެމްޕިއަން ރެއާލް މެޑްރިޑާއި އިންގްލެންޑުގެ ޗެމްޕިއަން ލިވަޕޫލް ބައްދަލުކުރާ މެޗެވެ. މި ސީޒަނުގެ ޗެމްޕިއަންސް ލީގުގެ ކުއާޓާގައި ރެއާލާއި ލިވަޕޫލް ބައްދަލުކުރާއިރު، މި ދެ ޓީމު އެންމެ ފަހުން ބައްދަލުކޮށްފައިވަނީ 2017-2018 ވަނަ އަހަރުގެ ސީޒަނުގެ ޗެމްޕިއަންސް ލީގުގެ ފައިނަލުގައެވެ. އެ ފަހަރު ރެއާލުން ވަނީ 3-1 ގެ ނަތީޖާއަކުން ލިވަޕޫލް ބަލިކޮށް ޗެމްޕިއަންކަން ހޯދާފައެވެ.

މީގެ އިތުރުން މި ސީޒަނުގެ ޗެމްޕިއަންސް ލީގުގެ ކުއާޓާގެ އެހެން މެޗުތަކަށް ބަލާއިރު، މެންޗެސްޓާ ސިޓީ ބައްދަލުކުރަން ޖެހުނީ ބޮރޫޝިއާ ޑޯޓްމުންޑާއެވެ. އަދި ޗެލްސީ ނުކުންނަން ޖެހޭނީ ޕޯޓޯއާ ދެކޮޅަށެވެ.

ކުއާޓާ ފައިނަލުގެ ފުރަތަމަ ލެގުގެ މެޗުތައް އަންނަ އޭޕްރީލް މަހުގެ 6 އާއި 7 ވަނަ ދުވަހު ކުޅޭއިރު، ދެވަނަ ލެގުގެ މެޗުތައް ކުޅޭނީ އެ މަހުގެ 13 އަދި 14 ވަނަ ދުވަހުއެވެ. އެއަށްފަހު މުބާރާތުގެ ސެމީ ފައިނަލް ފުރަތަމަ ލެގުގެ މެޗުތައް އޭޕްރީލް މަހުގެ 27 އާއި 28 ވަނަ ދުވަހު ކުޅޭއިރު، ދެވަނަ ލެގުގެ މެޗުތައް ކުޅޭނީ މެއި މަހުގެ 4 އަދި 5 ވަނަ ދުވަހުއެވެ. އަދި އިސްތަންބޫލުގައި މުބާރާތުގެ ފައިނަލް މެޗު ކުޅުމަށް ތާވަލުކޮށްފައިވަނީ މެއި މަހުގެ 29 ވަނަ ދުވަހުއެވެ.

ޗެމްޕިއަންސް ލީގުގެ ކުއާޓާގެ މެޗުތައް: