ރެއާލް މެޑްރިޑަށް ބަޔާނަކީ ނުރައްކާތެރި ޓީމެއް: އެންޗެލޯޓީ
ޗެމްޕިއަންސް ލީގުގައި ބަޔާން ފެންނަނީ ވަރުގަދަ ޓީމެއްގެ ގޮތުގައި
މެޗުގައި ލަނޑު ޖެހުމަށްފަހު ބަޔާންގެ ކުޅުންތެރިން އުފާ ފާޅުކުރަނީ
ބަޔާން މިއުނިކަކީ ވަރަށް ނުރައްކާތެރި ޓީމެއް ކަމަށާއި މެޗު ފަސޭހަކޮށް ނުނަގާނެ ކަމަށް ރެއާލް މެޑްރިޑްގެ ކޯޗު ކާލޯ އެންޗެލޯޓީ ބުނެފި އެވެ.
ޗެމްޕިއަންސް ލީގު ފުޓްބޯޅަ މުބާރާތުގެ ސެމީ ފައިނަލުގައި މިރޭ ޖަރުމަނުގެ އެލިއާންޒް އެރީނާގައި ކުޅޭ މެޗުގެ ކުރިން އެންޗެލޯޓީ ބުނީ ބަޔާން މިއުނިކް ސީޒަނުގެ ފަހު ކޮޅު ފެންނަނީ ވަރުގަދަކޮށް ކަމަށެވެ.
ރެއާލް މެޑްރިޑުން 14 ފަހަރު މި މުބާރާތް ކާމިޔާބުކޮށްފައިވެ އެވެ. މިހެންވެ މުބާރާތުގެ އެންމެ ކާމިޔާބު ޓީމަކީ އެެއީ އެވެ. އެންޗެލޯޓީ އަކީ މުބާރާތުގެ އެންމެ ކާމިޔާބު ކޯޗެވެ. އޭނާ ވަނީ ހަތަރު ފަހަރު މި މުބާރާތް ކާމިޔާބުކޮށްފަ އެވެ. މިއާ ހިލާފަށް ބަޔާން ތަށި ހޯދީ ހަ ފަހަރު އެވެ. ޓުޗެލް ތަށި ހޯދާފައިވަނީ އެންމެ ފަހަރަކު އެވެ. ނަމަވެސް އެންޗެލޯޓީ ބުނީ ޓުޗެލް އަކީ ހާއްސަކޮށް މި މުބާރާތުގައި މޮޅު ޓީމެއް ކަމަށެވެ.
މި މެޗަށް ނުކުންނައިރު އެންޗެލޯޓީ ބުނީ އޭނާގެ ޓީމު އޮތީ ރަނގަޅު ރޫހެއްގައި ކަމަށާއި ސެމީ ފައިނަލުގެ ފުރަތަމަ މެޗުގައި ރަށުން ބޭރުގައި ރަނގަޅު ނަތީޖާއެއް ހޯދުމަކީ މުހިންމު ކަމެއް ކަމަށެވެ.
ރެއާލްގެ މިޑްފީލްޑްރު ފްރެޑިކޯ ވަލްވާޑޭ ބުނީ އެންމެންވެސް ހީކުރީ އެންމެ ވަރުގަދަވާނީ އެންމެ ފަހުގެ ޗެމްޕިއަން މެންޗެސްޓާ ސިޓީ ކަމަށެވެ. ނަމަވެސް އެ ޓީމު ރެއާލް އަތުން ބަލިވެ މުބާރާތުން ކެޓުމަކީ ދެން ވާދަވެރި ޓީމެއް ނެތް ކަމަށް ބަލައިގެން ތިބެންޖެހޭ ސަބަބެއްނޫން ކަމަށެވެ.
މިރޭގެ މެޗުގެ ފަށާނީ މާލޭ ގަޑިން 12 ޖަހާއިރު އެވެ.
