މިފަދަ އިންޒާރުތަކަކީ ބިރުވެރިކަން އުފައްދަން ހިންގާ ޕްރޮޕެގަންޑާ ހަރަކާތެއް: މެޑްރިޑްގެ އެކްޓިން މޭޔަރު
ޕީއެސްޖީގެ ދަނޑު ބޭރުގައި ފުލުހުން ފޯރިމަރަނީ
އިސްލާމިކް ސްޓޭޓްގެ ނަން ދީފައިވާ ހަރުކަށި ޖަމާއަތަކުން ޗެމްޕިއަންސް ލީގު ގަދަ އަށެއްގެ މެޗުތައް ކުޅޭ ސްޓޭޑިއަމްތަކުގެ ފޮޓޯ އާއްމު ކުރުމާއެކު މުބާރާތުގެ ސެކިއުރިޓީ ވަރުގަދަ ކޮށްފި އެވެ.
އިސްލާމިކް ސްޓޭޓް ޗެނަލުން ފޮޓޯ އާއްމުކުރީ ހަތަރު ދަނޑެއްގެ ފޮޓޯ އެވެ. އެއީ ލަންޑަނުގެ އެމިރޭޓްސް ސްޓޭޑިއަމާއި ސްޕޭނުގެ ސެންތިއާގޯ ބާނަބައު އާއި މެޓްރޯޕޮލިތާން އާއި ފްރާންސްގެ ޕީއެސްޖީގެ ދަނޑެވެ. ނަމަވެސް އިސްލާމިކް ސްޓޭޓް ޖަމާއަތާއި މި ޗެނަލާއި ރަސްމީ ހައިސިއްޔަތުން ގުޅިފައިނުވެ އެވެ. އެ ޖަމާއަތުން ބުނެފައިވަނީ މިއީ ސަޕޯޓަރުން ހިންގާ ޗެނަލެއް ކަމަށެވެ.
ޔޫރަޕުގެ ފުޓްބޯޅަ ޖަމިއްޔާއިން ބުނީ މި ފަދަ އިންޒާރެއް ލިބުނު ނަމަވެސް މެޗުތައް ޝެޑިއުލާއެއްގޮތަށް ކުރިއަށްދާނެ ކަމަށެވެ. ނަމަވެސް މިއާއެކު ފްރާންސާއި ސްޕޭން އަދި އިނގިރޭސިވިލާތުގެ ސަރުކާރުން ވަނީ އެ ދެ ގައުމުގައި ކުޅޭ މެޗުތަކުގެ ސެކިއުރިޓީ ވަރުގަދަކޮށްފަ އެވެ.
ފްރާންސްގެ އިންޓީރިއާ މިނިސްޓަރު ޖެރަލްޑް ޑަރްމައިން ވިދާޅުވީ ފްރާންސްގެ ޕީއެސްޖީ އާއި ސްޕޭނުގެ ބާސެލޯނާ އެ އޭނާގެ ގައުމުގައި ކުޅޭ މެޗަށް ސެކިއުރިޓީގެ ކަންކަން ކުރިއަށްވުރެ ހަރުދަނާކޮށްފައިވާނެ ކަމަށެވެ.
ސްޕޭނުގެ ކުޅިވަރާ ބެހޭ ވަޒީރު ޕިލާ އަލެގްރިއާ ވިދާޅުވީ ރޭ އެ ގައުމުގައި ރެއާލް މެޑްރިޑާއި އިނގިރޭސިވިލާތުގެ މެންޗެސްޓާ ސިޓީ ކުޅުނު މެޗުގެ ސަލާމަތީ ކަންކަން ބަލަހައްޓަން 2000ވުރެ ގިނަ ފުލުހުންނާއި ސިވިލް ގާޑުން ނެރުނު ކަމަށެވެ. މިހެންވެ މަސްރަހު އޮތީ އަމާންކޮށް ކަމަށެވެ.
މެޑްރިޑްގެ އެކްޓިން މޭޔަރު އިމަކުލާޑާ ސާންޒް ސްޕޭނުގެ މީޑިއާތަކަށް އިންޓަވިއު ދެއްވަމުން ވިދާޅުވީ ޓެރަރިސްޓް އެޓޭކެއް ދީފާނެ ކަމުގެ އިންޒާރާއެކު ރިސްކް ލެވަލް ފަހަކުން ހަތަރަށް މަތިކުރި ނަމަވެސް ކަންބޮޑުވާންވީ ކަމެއް ނެތް ކަމަށެވެ.
ނަމަވެސް ޔޫރަޕުގެ ގައުމުތަކުން މިކަމާމެދު ސީރިއަސްކޮށް ވިސްނަނީ ހުސްވި މަހު ރަޝިޔާގެ މޮސްކޯގެ އިވެންޓެއް ބޭއްވި ހޯލަކަށް ކޮންބައެއްކަން ނޭނގޭ ބަޔަކު ހަމަލާދިނުމާ ގުޅިގެންނެވެ.
