51 ޕަސެންޓް އެޑްވާންޓޭޖް އޮތީ ރެއާލް އަށް: ޓުޗެލް
ފުރަތަމަ ލެގު ނިމުނީ ދެ ޓީމު އެއްވަރުވެގެން
ބަޔާންގެ ކޯޗު ތޯމަސް ޓުޗެލް އަދި އެ ޓީމަށް ކުޅެމުން އަންނަ އިންގްލެންޑުގެ ހެރީ ކޭން
ޗެމްޕިއަންސް ލީގު ފުޓްބޯޅަ މުބާރާތުގެ ފައިނަލުން ޖާގަ ހޯދުމަށް މިރޭ ކުޅޭ މެޗުގެ %51 އެޑްވާންޓޭޖް އޮތީ ސްޕޭނުގެ ރެއާލް މެޑްރިޑަށް ކަމަށް ޖަރުމަނުގެ ބަޔާން މިއުނިކްގެ ކޯޗު ތޯމަސް ޓުޗެލް ބުނެފި އެވެ.
މި ދެ ޓީމު ޖަރުމަނުގައި ކުޅުނު މެޗު ނިމުނީ 2-2އިން އެއްވަރުވެގެންނެވެ. މިހެންވެ މިރޭ ފައިނަލް ކުޅޭނެ ޓީމެއް ކަނޑައަޅަން ނަތީޖާ ނެރެންޖެހޭނެ އެވެ. އެއްވަރުވެއްޖެނަމަ އިތުރު ވަގުތުގެ 30 މިނިޓް ކުޅޭނެ އެވެ. އެވަރުން ވެސް އެއްވަރުވެއްޖެނަމަ ޕެނަލްޓީ ޖަހާނީ އެވެ.
ޓުޗެލް ބުނީ ފުރަތަމަ ކުޅުނު މެޗުގައި ރަނގަޅީ އޭނާގެ ޓީމު ކަމަށެވެ. ނަމަވެސް ރެއާލް އަށް ކުޑަ އެޑްވާންޓޭޖެއް ލިބެނީ އެމީހުންގެ އަމިއްލަ ދަނޑުގައި މެޗު ކުޅޭތީ ކަމަށެވެ.
ބަޔާންގެ ކެޕްޓަން މެނުއަލް ނޯޔާ ބުނީ ރެއާލްގެ ދަނޑުގައި ކުޅޭއިރު ވިސްނަންވީ ކަންތައްތަކެއް އެބަހުރި ކަމަށެވެ.
ރެއާލް މެޑްރިޑަކީ މުބާރާތުގެ އެންމެ ކާމިޔާބު ޓީމެވެ. 14 ފަހަރު މުބާރާތް ކާމިޔާބުކޮށްފައިވާއިރު ބަޔާން ވަނީ ހަ ފަހަރު ތަށި ހޯދައިފަ އެވެ.
މިރޭގެ މެޗު ފަށާނީ މާލޭ ގަނޑިން 12 ޖަހާއިރު އެވެ.
