އަހަރުމެން ވަރަށް ރަނގަޅަށް އެމްބާޕޭ ހިފަހައްޓާލިން: ޒަވީ

ފްރާންސްގެ ޕީއެސްޖީ އަތުން ރޭ ބާސެލޯނާ 3-2އިން މޮޅުވި އެއް ސަބަބަކީ ނުރައްކާތެރި ފޯވަޑް ކީލިއަން އެމްބާޕޭ ވަރަށް ރަނގަޅަށް ހިފަހައްޓާލުން ކަމަށް ބާސެލޯނާގެ ކޯޗު ޒަވީ ހަނާންޑޭޒް ބުނެފި އެވެ.

އަންނަ ސީޒަނުގައި ސްޕޭނުގެ ރެއާލް މެޑްރިޑަށް ބަދަލުވާނެ ކަމަށް ބެލެވިފައިވާ އެމްބާޕޭ އަށް މުޅި މެޗުގައި ނުރައްކާތެރި ހަމަލާތަކެއް ގޯލަށް ފޮނުވާލެވޭ ގޮތެއްނުވި އެވެ. އެއަށްވުރެ ބާސެލޯނާގެ ކުޅުންތެރިން ކުޅުނީ އޭނާ އަށް ޖާގަ ނުދީ އެވެ.

އޭނާ ބުނީ މެޗުގައި ބާސެލޯނާ އަށް ތަފާތު ގެނެސްދިނީ ދެ ލަނޑު ޖަހައިން ރަފީނިއާ އާއި ފޯވަޑް ރޮބަޓް ލެވޮންޑޯސްކީ ކަމަށެވެ.

އޭނާ ބުނީ ޕީއެސްޖީއަކީ ދުނިޔޭގެ އެންމެ މޮޅު ޓީމު ކަމަށާއި އަންނަ ހަފުތާގައި ބާސެލޯނާގެ ދަނޑުގައި ކުޅޭ މެޗު ވަރުގަދަ ވާނެ ކަމަށެވެ. އަދި މި މެޗުގައި ބާސެލޯނާގެ ޒުވާން ކުޅުންތެރިންދެއްކި ކުޅުމާމެދު އުފާކުރާ ކަމަށެވެ.

މި މެޗުގެ ފުރަތަމަ ލަނޑު ޖެހީ ބާސެލޯނާގެ ބްރެޒިލް މިޑްފީލްޑަރު ރަފީނިއާ އެވެ. އެކަމަކު ފަހު ހާފު ފަށައިގެން ފުރަތަމަ ފަސް މިނިޓް ތެރޭގައި ޖެހި ދެ ގޯލުން ޕީއެސްޖީ ލީޑް ހޯދި އެވެ. ފުރަތަމަ ލަނޑު ޖެހީ އޮސްމާނޭ ޑެމްބެލޭ އެވެ. ފަހު ލަނޑު ޖެހީ ވިޓީނިއާ އެވެ. އެކަމަކު ޕެޑްރީ ކުޅެން ނުކުތްތާ ދެ މިނިޓްތެރޭގައި ދިން މޮޅު ޕާހަކުން ރަފީނިއާ ނަތީޖާ ހަމަހަމަކޮށްދިނެވެ. އޭނާ އަކީ މެޗުގެ މޮޅު ކުޅުންތެރިޔާ އެވެ. ބާސެލޯނާ މޮޅުކޮށްދިން ލަނޑު ޖެހީ ފަހު ހާފުގައި ނުކުތް ޑިފެންޑަރު އަންދްރޭސް ކްރިސްޓިއަންސަން އެވެ.