ބާސާއިން ޑެމްބެލޭގެ އެއްބަސްވުން އާކުރަނީ

ފްރާންސްގެ ފޯވާޑް އޮސްމާނޭ ޑެމްބެލޭގެ އެއްބަސްވުން އާކުރަން ބާސެލޯނާއިން މަސައްކަތް ކުރަމުން އަންނަ ކަމަށް ރިޕޯޓުތައް ބުނެފިއެވެ.

އުމުރުން 23 އަހަރުގެ ޑެމްބެލޭ 2017 ވަނަ އަހަރު ބާސާއާ ގުޅުނީ ޖަރުމަނުގެ ބޮރޫޝިއާ ޑޯޓްމުންޑް ދޫކޮށް 147 މިލިޔަން ޔޫރޯގެ އަގަކަށެވެ. އަދި ބާސާއާއެކު ޑެމްބެލޭ ފަސް އަހަރުގެ އެއްބަސްވުމެއް ހެދިއިރު، އެ އެއްބަސްވުން އަންނަ އަހަރުގެ ޖޫން މަހުގެ ނިޔަލަށް ހަމަވާނެއެވެ.

ރިޕޯޓުތައް ބުނާ ގޮތުން އަންނަ އަހަރުގެ ހޫނު މޫސުމުގައި ޑެމްބެލޭއަށް ހިލޭ ކުލަބު ބަދަލު ކުރެވޭނެތީ، ބާސާއިން މިހާރު އަންނަނީ ޑެމްބެލޭގެ އެއްބަސްވުން އާކުރުމާމެދު މަޝްވަރާކުރަމުންނެވެ. އެކަމަކު އަވަސް އަރުވާލައިގެން އެއްބަސްވުން އާކުރުމުގެ ބަދަލުގައި، އެއްބަސްވުން އާކުރާނީ މި ސީޒަނުގައި އޭނާ ދައްކާ ކުޅުމަށް ބެލުމަށްފަހު ކަމަށްވެސް ރިޕޯޓުތައް ބުނެއެވެ.

ޑެމްބެލޭގެ އެއްބަސްވުން އާކުރަން ބާސާއިން މަޝްވަރާކުރަމުން އަންނައިރު، އޭނާ ހޯދަން މެންޗެސްޓާރ ޔުނައިޓެޑުން އަންނަނީ މަސައްކަތް ކުރަމުންނެވެ. އެގޮތުން މީގެ ކުރިން ޑެމްބެލޭގެ ޓްރާންސްފާއާ ގުޅޭ ގޮތުން ޔުނައިޓެޑުން ބާސާއާއެކު މަޝްވަރާކުރި ކަމަށް މީޑިއާތަކުން ރިޕޯޓުކުރި ނަމަވެސް، ބާސާއިން ވަނީ އެކަން ދޮގުކޮށްފައެވެ.

ޑެމްބެލޭއަކީ އޭނާ ބާސާއަށް ގެނައިރު ދުނިޔޭގައި ހުރި އެންމެ ހުނަރުވެރި އެއް ފޯވާޑެވެ. އެކަމަކު އަނިޔާގެ ސަބަބުން އެއް ފެންވަރެއްގައި ހިފަހައްޓާލެވޭ ގޮތް ނުވެއެވެ. މިދިޔަ ސީޒަނުގައި އަނިޔާގެ އެތައް މައްސަލައެއް ދިމާވިއެވެ. އަނިޔާއިން ރަނގަޅުވެ، މި ސީޒަނުގައި ރޮނާލްޑް ކޫމަންގެ އިރުޝާދުގެ ދަށުން ޑެމްބެލޭ އަންނަނީ މޮޅު ކުޅުމެއް ދައްކަމުންނެވެ. މިހާތަނަށް މި ސީޒަނުގައި ބާސާއަށް 34 މެޗު ކުޅެދީފައިވާއިރު، އޭނާ ވަނީ އަށް ލަނޑު ޖަހާފައެވެ.

ބާސާއަށް މިހާތަނަށް ކުޅެދިން 108 މެޗުގައި 27 ލަނޑު ޖަހާފައިވާ ޑެމްބެލޭ ވަނީ ބާސާއާއެކު ސްޕެނިޝް ލީގު ދެ ފަހަރު އަދި ސްޕެނިޝް ކަޕް އެއް ފަހަރު ކާމިޔާބުކޮށްފައެވެ.