ބޯހިމެނުމުގެ މަސައްކަތުގައި ހަރަކާތްތެރިވާނެ އެނިއުމަރޭޓަރުން ހޯދަނީ
އިއުލާނުކޮށްފައި ވަނީ 30 އެނިއުމަރޭޓަރުން ހޯދުމަށް
މާލޭގެ މަގުތަކަށް ރައްޔިތުން ނުކުމެ
ބޯހިމެނުން 2022 އަށް ތައްޔާރުކުރުމުގެ ގޮތުން ހިންގާ މެޕިންގ އެކްސަސައިޒަށް އެނިއުމަރޭޓަރުން ހޯދުމަށް ނޭޝަނަލް ބިއުރޯ އޮފް ސްޓެޓިސްޓިކްސް (އެންބީއެސް) އިން އިއުލާންކޮށްފިއެވެ.
އެންބީއެސް އިން އާންމުކޮށްފައިވާ އިއުލާނުގައި ވަނީ ބޯހިމެނުން 2022 އަށް ތައްޔާރުވުމުގެ ގޮތުން ބޯހިމެނުމުގައި ބޭނުންކުރެވޭ ބްލޮކް މެޕްތައް ތައްޔާރުކުރުމުގެ މަސައްކަތުގައި ހަރަކާތްތެރިވުމަށް 30 އެނިއުމަރޭޓަރުން ބޭނުންވާ ކަމަށާއި މިމަސައްކަތް ކުރިއަށްދާނީ 30 މާރޗުން ފަހެއް އޭޕްރީލް 2021ގެ ނިޔަލަށް ކަމަށެވެ.
މިމަސައްކަތަކީ ކޮންމެ ދުވަހަކު ފީލްޑަށް ނުކުމެ، ހަވާލުކުރެވޭ ޗާޓުގައިވާ ތަންތަން ފާހަގަކުރުމަށްޓަކައި ކުރާ މަސައްކަތެއް ކަމަށް އެންބީއެސް އިން ބުނެއެވެ.
އެންބީއެސް އިން ބުނީ މިސާރވޭގައި ބައިވެރިވެވޭނީ ޖީ.ސީ.އީ އޯ ލެެވެލް ފެންވަރަށް ތައުލީމް ހާސިލް ކޮށްފައިވާ އަދި އުމުރުން 18 އަހަރާއި 45 އަހަރާއި ދެމެދުގެ މީހުންނަށް ކަމަށެވެ. އެގޮތުން ގިނަވަގުތު މަސައްކަތުގައި އުޅެވޭނެ ފަރާތްތަކަށް އިސްކަންދެވޭނެ ކަމަށާއި ބޯހިމެނުން ނުވަތަ މިފަދަ ސަރވޭއެއްގައި ބައިވެރިވެ ތަޖުރިބާ ލިބިފައިވާ މީހުންނަށް އިސްކަން ދެވޭނެ ކަމަށް އެންބީއެސް އިން ބުންޏެވެ.
ފަސް ދުވަހުގެ މުއްދަތަށް މިހަރަކާތް ކުރިއަށްގެންދާއިރު ކޮންމެ ދުވަހެއްގެ ހެދުނު 8:00ން ހަވީރު 6:00ށް މިމަސައްކަތް ކުރިއަށް ގެންދިއުމަށް ވަނީ ނިންމާފައެވެ. މިމަސައްކަތުގައި ހޭދަކުރާ ދުވަސްތަކުގައި ދުވާލަކު 500 ރުފިޔާގެ މަގުން އެލަވަންސެއް ދެވޭނެ ކަމަށާއި ފޯނު އެލަވަންސްގެ ގޮތުގައި ދުވާލަކު 10 ރުފިޔާ އަދި ފުޑް އެލަވަންސްގެ ގޮތުގައި ދުވާލަކު 100 ރުފިޔާ ދެވޭނެކަމަށް އެންބީއެސް އިން ބުންޏެވެ.
މިސަރވޭގެ މަސައްކަތުގައި ހަރަކާތްތެރިވުމަށް ޝައުޤުވެރިވާ ފަރާތްތަކުން ބިއުރޯގެ ވެބްސައިޓް މެދުވެރިކޮށް 23 މާރޗު 2021 ވާ އަންގާރަ ދުވަހުގެ 12:00ގެ ކުރިން ފޯމް ހުށަހެޅުމަށް އެންބީއެސް އިން އެދެއެވެ.
