ބޯހިމެނުމުގެ މަސައްކަތް 13 ސެޕްޓެމްބަރުގައި ފަށަނީ
މިފަހަރުގެ ބޯހިމެނުމުގެ މަސައްކަތަށް 4300 އެނިއުމަރޭޓަރުން ބޭނުންވޭ
މާލޭގެ މަގުމަތި- މި އަހަރުގެ ބޯހިމެނުން ކުރިއަށް ގެންދާނީ 13 ސެޕްޓެމްބަރުން 25 ސެޕްޓެމްބަރުގެ ނިޔަލަށް
މިއަހަރު ކުރިޔަށްގެންދިޔުމަށް ހަމަޖެހިފައިވާ ރާއްޖޭގެ އާބާދީ އާއި މީހުން ދިރިއުޅޭ ތަންތަނުގެ ބޯހިމެނުން 13 ސެޕްޓެމްބަރުގައި ފެށުމަށް ނިންމައިފިއެވެ.
ރާއްޖޭގެ އާބާދީ އާއި މީހުން ދިރިއުޅޭ ތަންތަނުގެ ބޯހިމެނުން 2022 ވަނަ އަހަރުގެ ސެޕްޓެމްބަރު މަހުގެ 17ން 30ށް ބޭއްވުމަށް ހަމަޖެހިފައިވާކަމަށް މޯލްޑިވްސް ބިއުރޯ އޮފް ސްޓެޓިސްޓިކްސްއިން ކުރިން އޮތީ ހާމަކޮށްފައެވެ. އެހެންނަމަވެސް މިހާރު އެ ތާރީޚުވަނީ އަވަސްކޮށްފައެވެ.
މޯލްޑިވްސް ބިއުރޯ އޮފް ސްޓެޓިސްޓިކްސްއިން މައުލޫމާތުދޭ ގޮތުގައި މި އަހަރުގެ ބޯހިމެނުން ކުރިއަށް ގެންދާނީ 13 ސެޕްޓެމްބަރުން 25 ސެޕްޓެމްބަރުގެ ނިޔަލަށެވެ. މިފަހަރުގެ ބޯހިމެނުމުގައި އެހެން އަހަރުތަކާއި ޚިލާފަށް އިގްތިސާދީ މަސައްކަތްތަކާއި ގުޅޭގޮތުން މައުލޫމާތު އެއްކުރުމަށް ވަނީ ހަމަޖެހިފައެވެ.
މިކަމާއި ގުޅޭގޮތުން އިތުރު ތަފްސީލު ދެއްވަމުން މޯލްޑިވްސް ބިއުރޯ އޮފް ސްޓެޓިސްޓިކްސްގެ ޗީފް ސްޓެޓިސްޓިޝަން އައިޝަތު ހަސަން ވިދާޅުވީ އަދި މިހާތަނަށް އައިއިރު ރާއްޖޭގައި އިގްތިޞާދީ މަސައްކަތްތަކުގެ ބޯހިމެނުމެއް ހިމަނާފައިނުވާކަމަށެވެ. އިގްތިސާދީ މަސައްކަތްތަކުގެ ބޯހިމެނުމެއްގެ ޒަރީއާއިން ޖީޑީޕީއަށް ބޭނުންވާ މައުލޫމާތު އެއްކުރެވިގެންދާނެކަމަށް އައިޝަތު ހަސަން ވިދާޅުވިއެވެ. އަދި ރާއްޖޭގެ އެކި ހިސާބުތަކުގައި އިގްތިސާދީ ގޮތުން ކުރަމުންދަނީ ކޮންކޮން މަސައްކަތްތަކެއްތޯ އާއި އެމަސައްކަތްތަކުގެ ކުޑަބޮޑުމިން އަދި އެތަންތަނުގައި މަސައްކަތްކުރާ މީހުންގެ އަދަދު ފަދަ މައުލޫމާތު އެއްކުރެވިގެންދާނެ ކަމަށް ވިދާޅުވިއެވެ.
މީގެއިތުރުން މިފަހަރުގެ ބޯހިމެނުމުގައި އެހެން ފަހަރުތަކާއި ޚިލާފަށް ކަރުދާހުގެ ބަދަލުގައި ބޭނުންކުރާނީ ޓެބްލެޓެވެ.
މިފަހަރުގެ ބޯހިމެނުމުގެ މަސައްކަތަށް 4300 އެނިއުމަރޭޓަރުން ބޭނުންވެއެވެ. އެއީ އަތޮޅުތަކުގައި މަސައްކަތްކުރުމަށް 2200 އަދި މާލޭގައި މަސައްކަތްކުރުމަށް 2100 އެވެ.
މި މަސައްކަތަށް ނުކުންނަ ކޮންމެ ދުވަހަކަށް 500 ރުފިޔާގެ އެލަވަންސެއް ދިނުމަށް ވަނީ ނިންމާފައެވެ. މީގެ އިތުރުން 7-11 ދުވަހަަށް 10 ރުފިޔާގެ އިތުރު އެލަވަންސެއްވެސް ދޭނެއެވެ. އަދި ބޯހިމެނުމުގެ މަސައްކަތުގައި ބައިވެރިވާ މީހުންނަށް ދިނުމަށް ހަމަޖެހިފައިވާ ތަމްރީނަށް ނިކުންނަ ކޮންމެ ދުވަހަކަށް 100 ރުފިޔާގެ އެލަވަންސެއް ލިބޭނެއެވެ. ތަމްރީނު ކުރިއަށްދާނީ އެއް ހަފްތާގެ މުއްދަތަކަށެވެ.
ރާއްޖޭގައި ކޮންމެ 10 އަހަރަކުން އެއް އަހަރު ބޯހިމަނައެވެ. އެންމެފަހުން ބޯހިމަނާފައިވަނީ 2014 ވަނަ އަހަރުއެވެ. އެފަހަރުގެ ބޯހިމެނުމުގެ ނަތީޖާ ދައްކާގޮތުން ރާއްޖޭގެ އާބާދީ އަކީ 402،071 އެވެ.
މިފަހަރުގެ ބޯހިމެނުމުގެ ޝިއާރަކީ "އަހަރެންގެ ބޯހިމެނުން" މިއެވެ.
