ބޯހިމެނުމުގެ ނަތީޖާ މިމަހުގެ 30ގައި އާއްމު ކުރަނީ
14 މާރިޗު 2023 | އަންގާރަ 16:59ފުރަތަމަ އާއްމުކުރުމަށް ނިންމާފައިވަނީ އިދާރީ ރަށްރަށުގެ ފެންވަރުގައި އެއްކުރެވުނު މަޢުލޫމާތު
ބޯހިމެނުމުގައި ހަރަކާތްތެރިވާ އެނިއުމަރޭޓަރުންނާއި ނައިބްރައީސް ބައްދަލުކުރައްވަނީ
މިދިޔަ އަހަރު ކުރިއަށްގެންދިޔަ ބޯހިމެނުމުގެ ނަތީޖާ މި މަހުގެ 30 ވަނަ ދުވަހު އާއްމު ކުރަން މޯލްޑިވްސް ބިއުރޯ އޮފް ސްޓެޓިސްޓިކްސްއިން ނިންމައިފިއެވެ.
އެ ބިއުރޯއިން ބުނެފައިވާ ގޮތުގައި މިމަހުގެ 30 ވަނަ ދުވަހު އާއްމުކުރާނީ ފުރަތަމަ ފަހަރަށް އާއްމުކުރާ މަޢުލޫމާތެވެ. އެގޮތުން، ފުރަތަމަ އާއްމުކުރުމަށް ނިންމާފައިވަނީ އިދާރީ ރަށްރަށުގެ ފެންވަރުގައި އެއްކުރެވުނު މަޢުލޫމާތުތައް ކަމަށެވެ. މީގެ ތެރޭގައި އެރަށެއްގައި އުޅޭ ދިވެހިންގެ އަދަދާއި ބިދޭސިންގެ އަދަދާއި ޖިންސާއި އުމުރުފުރައިގެ މަޢުލޫމާތުތައް އާއްމުކުރުމަށް ވަނީ ނިންމާފައެވެ. އަދި ގޭބިސީތަކުގެ އަދަދާއި އެވްރެޖްކޮށް ގޭބިސީއެއްގައި އުޅޭ މީހުންގެ އަދަދު ހާމަކުރުމަށް ވެސް ވަނީ ހަމަޖެހިފައެވެ.
މީގެއިތުރަށް އިމާރާތްތަކާއި މީހުން ނިދާ، ދިރިއުޅޭ ތަންތަނާއި ލޭބަރ ކުއަރޓާޒްތަކާއި މަސައްކަތް ހިނގާ ތަންތަނުގެ މަޢުލޫމާތުތައް ހާމަކުރާނެކަމަށްވެސް އެ ބިއުރޯއިން ބުނެފައި ވެއެވެ.
ސްޓެޓިސްޓިކްސް ބިއުރޯއިން ބުނީ ބޯހިމެނުމުގެ ޑޭޓާގެ ކޯޑްކުރުމުގެ މަސައްކަތާއި އެކި ދާއިރާތަކުން ނަގާފައިވާ ތަފްސީލް މައުލޫމާތު ވެލިޑޭޓްކުރުމުގެ މަސައްކަތްވެސް ކުރަމުން އަންނަކަމަށެވެ. އަދި އިތުރު ދާއިރާތަކުގެ ނަތީޖާތައް ހާމަކުރާނެ ތާރީހުތައް އާއްމުކޮށް އަންގަމުންދާނެކަމަށްވެސް އެ ބިއުރޯއިން ބުންޏެވެ.
އެ ބިއުރޯގެ އަމާޒަކީ ބޯހިމެނުމުގެ ތަފާސް ހިސާބުތައް ވީހާވެސް ފުޅާދާއިރާއެއްގައި ހާމަކޮށް ތަފާސް ހިސާބުގެ އަލީގައި ކަންކަން ނިންމުމަށް އެހީތެރިކަން ފޯރުކޮށްދިނުންކަމަށް ސްޓެޓިސްޓިކްސް ބިއުރޯއިން ބުންޏެވެ.
ބޯހިމެނުމުގެ މަސައްކަތަކީ ކޮންމެ 10 އަހަރަކުން އެއް އަހަރު ޤައުމުގެ ޙާލަތު ވަޒަންކޮށް ކުރިމަގުގައި ކުރިއަށްގެންދާ މަޝްރޫޢުތައް ޕްލޭންކުރުމަށް މަގުފަހިކުރުމަށް ބޭނުންވާ މަޢުލޫމާތު އެއްކުރުމަށް ކުރިއަށްގެންދާ ޤައުމީ ތަރައްޤީގެ މަސައްކަތެކެވެ. އެހެން ފަހަރުތަކާއި ޚިލާފަށް މިފަހަރުގެ ބޯހިމެނުމުގައި ވިޔަފާރިތަކާއި މަސައްކަތްކުރާ އިދާރާތަކުގެ މައުލޫމާތުވެސް އެއްކުރިއެވެ.
މިދިޔަ އަހަރު ރާއްޖޭގައި ބޯހިމެނުމުގެ މަސައްކަތް ކުރިއަށްގެންދިޔައީ ސެޕްޓެމްބަރު މަހުން ފެށިގެން އޮކްޓޯބަރު މަހާ ހަމައަށެވެ.
