"ބޯހިމެނުމަށް މައުލޫމާތު ދޭން އިންކާރު ކުރާނަމަ ޤާނޫނީ ފިޔަވަޅު އެޅުމާއި ހަމައަށް ދާނެ"
18 ސެޕްޓެމްބަރު 2022 | އާދީއްތަ 02:06ބޯހިމެނުމަށް ދޭ މައުލޫމާތު ސިއްރު ކުރެވޭނެ ކަމުގެ ޔަގީންކަން ދޭ
ބޯހިމެނުމުގެ މަސައްކަތް ކުރާ ފަރާތްތަކާއި ރައީސް ބައްދަލުކުރެއްވުން
ބޯހިމެނުގެ މަސައްކަތް މިހާރު ކުރިއަށްދާއިރު މައުލޫމާތު ދޭން އިންކާރު ކުރާނަމަ އެ މީހަކާ މެދު ޤާނޫނީ ގޮތުން ފިޔަވަޅު އެޅުމުގެ އިހުތިޔާރު ވެސް ލިބިގެންވާ ކަމަށް ނޭޝަނަލް ބިއުރޯ އޮފް ސްޓެޓިސްޓިކްސް އިން ބުނެފިއެވެ.
ރާއްޖެޓީވީގެ "ފަލަސުރުޚީ" ގައި ވާހަކަދައްކަވަމުން ނޭޝަނަލް ބިއުރޯ އޮފް ސްޓެޓިސްޓިކްސްގެ ޗީފް ސްޓެޓިސްޓިޝަން އައިޝަތު ހަސަން ވިދާޅުވީ މިހާރު ކުރިއަށްދާ ބޯހިމެނުމުގެ ހަރަކާތަކީ ވަރަށް މުހިންމު ހަރަކާތެއް ކަމަށެވެ. އެގޮތުން، ބޯހިމެނުމަށް ލިބޭ މައުލޫމާތުތަކުގެ އަލީގައި ޕޮލިސީތައް ހެދުމަށާއި ދިރާސާތައް ކުރުމަށް ބޮޑެތި ލުއިތަކެއް ލިބިގެންދާނެ ކަމަށް އޭނާ ވިދާޅުވިއެވެ.
ސަރުކާރުން ރަށްތަކުގައި ތަރައްގީގެ މަޝްރޫއުތައް ހިންގުމުގައި ވެސް ބޯހިމެނުމުގެ މައުލޫމާތު މުހިންމުކަން ފާހަގަކުރައްވައި އައިޝަތު ހަސަން ވިދާޅުވީ ބޯހިމެނުމަށް ދޭ މައުލޫމާތަކީ ރޭވުމުގެ މަރުހަލާއަށް ވެސް ބޭނުންތެރި މައުލޫމާތުތައް ކަމަށާއި އެއީ ވަކިވަކި ފަރުދުންނަށް ވެސް މުހިންމު މައުލޫމާތެއް ކަމަށެވެ.
މި މަހުގެ 13 ވަނަ ދުވަހު ބޯހިމެނުމުގެ މަސައްކަތް ފަށާފައިވާއިރު މާލެ ސަރަހައްދުން އެއްބާރުލުން ލިބެމުން އަންނަކަން އައިޝަތު ހަސަން ފާހަގަ ކުރެއްވިއެވެ. އަދި ރަށްރަށުގައި ވެސް ހަލުވިކަމާއެކު މި މަސައްކަތް ކުރިއަށްދާ ކަމަށާއި މި މަސައްކަތް ކުރިއަށްގެންދަނީ އެހެން ޤައުމުތަކުގައި ވެސް ބޯހިމެނުމުގެ ކަންކަން ކުރިއަށްގެންދާ ގޮތަށް ކަމަށް އޭނާ ވިދާޅުވިއެވެ.
ފަލަސުރުޚީގައި ވާހަކަދައްކަވަމުން ޑެޕިއުޓީ ޗީފް ސްޓެޓިސްޓިޝަން އައިޝަތު ޝަހުދާ ވިދާޅުވީ މިހާރު ޤާނޫނުގެ ދަށުން ބޯހިމެނުމަށް މައުލޫމާތު ނުދޭ ފަރާތްތަކާ މެދު ފިޔަވަޅު އެޅުމުގެ އިހުތިޔާރު ނޭޝަނަލް ބިއުރޯ އޮފް ސްޓެޓިސްޓިކްސްއަށް ލިބިގެންވާ ކަމަށެވެ. ނަމަވެސް އެ ފިޔަވަޅު އެޅުމުގެ ކުރިން މައުލޫމާތު ފޯރުކޮށްދިނުމަށް ކޮންމެ މީހަކަށް ވެސް ފުރުސަތުތަކެއް ލިބިގެންދާނެ ކަމަށް އޭނާ ވިދާޅުވިއެވެ.
ޝަހުދާ ވިދާޅުވީ ބޯހިމެނުމުގެ މަސައްކަތް ކުރިއަށްދާއިރު ބޭނުންވަނީ އެންމެން ވެސް އެއްބާރުލުން ދީގެން އެ މީހެއްގެ ރުހުމާއެކު މައުލޫމާތު ދިނުން ކަމަށެވެ.
ނޭޝަނަލް ބިއުރޯ އޮފް ސްޓެޓިސްޓިކްސް އިން މައުލޫމާތު ދޭގޮތުގައި ބޯހިމެނުމަށް ދޭ މައުލޫމާތު ސިއްރު ކުރެވޭނެއެވެ. އެއީ ގާނޫނުން ވެސް މަޖުބޫރު ކުރާ ކަމެއް ކަަމަށާއި އާއްމު ކުރާނީ ލިބޭ ހުރިހާ މައުލޫމާތުތައް އެއްކޮށްގެން ކަމަށް އެ އިދާރާއިން ބުނެއެވެ.
މީގެ އިތުރުން މައުލޫމާތު އެއްކުރާއިރު އެއްވެސް މީހަކީ ކާކުކަން އެނގޭކަހަލަ މައުލޫމާތެއް ނުހޯދާނެ ކަމުގެ ޔަގީންކަން އެ އިދާރާއިން އަރުވައެވެ.
ބޯހިމެނުމުގެ މަސައްކަތް މި މަހުގެ 27 ވަނަ ދުވަހާ ހަމައަށް ކުރިއަށްދާއިރު މައުލޫމާތު ހޯދަން ދާ އެނޫމަރޭޓަރުންނަކީ އެކަމުގައި އުޅޭ ފަރާތްތައްކަން ކަށަވަރު ކުރުމަށް ވަނީ އިލްތިމާސްކޮށްފައެވެ. އެގޮތުން، މައުލޫމާތު ހޯދަން ދާ އެނޫމަރޫޓަރުންގެ ކާޑު ސްކޭންކުރެވޭ ގޮތް ހަދާފައިވާއިރު ހާއްސަ ވެސްޓުތަކެއް ވެސް އެ ފަރާތްތަކުން މިހާރު ބޭނުން ކުރާނެއެވެ.
ބޯހިމެނުމުގެ މަސައްކަތަށް އެއްބާރުލުން ދިނުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވެސް ވަނީ ހުރިހާ ރައްޔިތުންގެ ފަރާތުން އެދިވަޑައިގެންފައެވެ.
