ބޯހިމެނުމަށް އެއްކުރާ މައުލޫމާތުތަކަކީ ރޭވުމުގެ މަރުހަލާއަށް މުހިންމު މައުލޫމާތުތަކެއް: ބިއުރޯ އޮފް ސްޓެޓިސްޓިކްސް
18 ސެޕްޓެމްބަރު 2022 | އާދީއްތަ 07:00ޚިދުމަތްތައް ގާއިމްކުރުމަށް އާބާދީ އެނގުން މުހިންމު
ބޯހިމެނުމުގެ މަސައްކަތް ކުރިއަށްގެންދިއުން
ބޯހިމެނުމުގައި އެއްކުރާ މައުލޫމާތުތަކަކީ ރޭވުމުގެ މަރުހަލާގައި ވަރަށް މުހިންމު މައުލޫމާތުތަކެއް ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސްއިން ބުނެފިއެވެ.
މޯލްޑިވްސް ބިއުރޯ އޮފް ސްޓެޓިސްޓިކްސްގެ ފަރާތުން ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެ ބޯހިމެނުމުގެ މުހިންމުކަމާއި ގުޅޭ މުހިއްމު މައުލޫމާތު ދީފައިވެއެވެ.
އެގޮތުން މި ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން ޗީފް ސްޓެޓިސްޓިޝަން އައިޝަތު ހަސަން ވިދާޅުވީ އެ މައުލޫމާތުތަކަކީ ސަރުކާރާއި އަމިއްލަ ފަރާތްތަކާއި ފަރުދުންގެ މެދުގައި ވެސް ވަރަށް ބޭނުންތެރި މައުލޫމާތުތަކެއް ކަމަށެވެ. މި މައުލޫމާތުތަކުގެ މައްޗަށް ބިނާކޮށް ޕޮލިސީތައް އެކުލަވާލެވޭނެ ކަމަށާއި، އަދި ޚިދުމަތްތައް ގާއިމްކުރަން ވެސް ފަސޭހަވެގެންދާނެ ކަމަށް އޭނާ ވިދާޅުވިއެވެ.
މިމަހުގެ 13 ވަބަ ދުވަހު ބޯހިމެނުމުގެ މަސައްކަތް ވަނީ ފަށާފައެވެ. އަދި 25 ގެ ނިޔަލަށް މި މަސައްކަތް ކުރިއަށްދާނެއެވެ. މާލެ ސަރަހައްދުގައި 27 ގެ ނިޔަލަށް މި މަސައްކަތް ކުރިއަށްގެންދިއުމަށް ވަނީ ނިންމާފައެވެ.
ނޭޝަނަލް ބިއުރޯ އޮފް ސްޓެޓިސްޓިކްސް އިން މައުލޫމާތު ދޭގޮތުގައި ބޯހިމެނުމަށް ދޭ މައުލޫމާތު ސިއްރު ކުރެވޭނެއެވެ. އެއީ ގާނޫނުން ވެސް މަޖުބޫރު ކުރާ ކަމެއް ކަަމަށާއި އާއްމު ކުރާނީ ލިބޭ ހުރިހާ މައުލޫމާތުތައް އެއްކޮށްގެން ކަމަށް އެ އިދާރާއިން ބުނެއެވެ. އަދި މައުލޫމާތު އެއްކުރާއިރު އެއްވެސް މީހަކީ ކާކުކަން އެނގޭކަހަލަ މައުލޫމާތެއް ނުހޯދާނެ ކަމުގެ ޔަގީންކަން އެ އިދާރާއިން ދެއެވެ.
