ބޯހިމެނުމުގެ މުއްދަތު އިތުރުކޮށްފި

މާލެ އާއި ހުޅުމާލެ ސަރަހައްދުގައި ބޯހިމެނުމުގެ މުއްދަތު އިތުރުކޮށްފިއެވެ.

ބޯހިމެނުމުގެ މުއްދަތު އެންމެ ފުރަތަމަ ކަނޑައަޅާފައި ވަނީ މި މަހުގެ 13ން 14ށް އަދި 17 އިން ފެށިގެން ގޮސް 25 ވަނަ ދުވަހުގެ ނިޔަލަށެވެ. އެގޮތުން 13 އަދި 14 ވަނަ ދުވަހު ކުރިއަށް ގެންގޮސްފައި ވަނީ ގޭބިސީތަކާއި ވިޔަފާރިތަކާއި ގުޅޭ މަޢުލޫމާތު އެއްކުރުމުގެ މަސައްކަތެވެ. 17ން ފެށިގެން 25 ކުރިއަށްދާނީ ގޭބިސީތަކުގައި ދިރިއުޅޭ މީހުންނާއި ދިރިއުޅުމުގެ ޙާލަތާއި ގުޅޭ މަޢުލޫމާތު ނެގުމުގެ މަސައްކަތެވެ.

ބޯހިމެނުމުގެ މުއްދަތު އިތުރުކޮށްފައިވަނީ މި މަހުގެ 27ގެ ނިޔަލަށެވެ. މޯލްޑިވްސް ބިއުރޯ އޮފް ސްޓެޓިސްޓިކްސް އިން ހުކުރު ދުވަހު ނެރުނު ބަޔާނެއްގައިވަނީ މާލެ އާއި ހުޅުމާލެ ސަރަހައްދުގެ ގޭބިސީތަކާއި ވިޔަފާރިތަކާއި ގުޅޭ މަޢުލޫމާތު އެއްކޮށް އަދި ނުނިމޭ ކަމަށެވެ.

އެގޮތަށް ދިމާވީ މި ދެ ސަރަހައްދުގައި އެނިއުމަރޭޓަރުންގެ ގޮތުގައި މަސައްކަތްކުރާނެ މީހުން އެކަށީގެންވާ ވަރަށް ނުލިބުމުން ކަމަށް ބުނެފައިވެއެވެ. އެހެންވެ އެ ދެ ސަރަހައްދުގައި ލިސްޓިންގގެ މަސައްކަތް ހޮނިހިރު ދުވަހުވެސް ކުރިއަށްގެންދަން ވަނީ ނިންމާފައެވެ. އަދި ތަފްސީލް މައުލޫމާތު ނެގުމުގެ މުއްދަތު 27 އާ ހަމައަށް އިތުރުވެސް ކޮށްފައިވާކަމަށްވަނީ ހާމަކޮށްފައެވެ.

މޯލްޑިވްސް ބިއުރޯ އޮފް ސްޓެޓިސްޓިކްސް އިން މިހެން ބުނެފައިވާއިރު ބޯހިމެނުމުގެ މަސައްކަތްކުރާ ފަރާތްތަކުން ކުރިއަށްގެންދަނީ ބުރަ އަދި މުހިންމު މަސައްކަތްތަކެއްކަން ފާހަގަކުރައްވައި، އެ މަސައްކަތަށް ހުރިހާ ރައްޔިތުންގެ ފަރާތުން ވެސް އެއްބާރުލުން ދިނުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ އެދިވަޑައިގަންނަވާފައެވެ.

ރައީސުލްޖުމްހޫރިއްޔާ ވަނީ އެ ފަރާތްތައް ކުރާ މަސައްކަތަކީ ރާއްޖޭގެ ކުރިމަގު ރޭވުމަށް ވަރަށް މުހިންމު މަޢުލޫމާތުތަކެއް އެއްކުރެވޭ މަސައްކަތެއްކަމުގައި ފާހަގަކުރައްވާފައެވެ. އަދި ބޯހިމެނުމުގައި އެއްކުރެވޭ މަޢުލޫމާތުތަކުގެ އަލީގައި ރާއްޖޭގެ ތަރައްޤީގެ މަޝްރޫޢުތަކާ އިޖުތިމާޢީ ހުރިހާ ބޮޑެތި މައްސަލަތައް ފާހަގަވުމުގެ އިތުރުން އެކަންތައްތައް ޙައްލުކުރުމަށް ވަރަށް ބޮޑަށް ފަސޭހަވެގެންދާނެކަމަށް ވެސް އެމަނިކުފާނު ވިދާޅުވިއެވެ.

މިފަހަރުގެ ބޯހިމެނުމުގެ ޢަމަލީ މަސައްކަތުގައި 4000 އަށް ވުރެ ގިނަ ފަރާތްތަކުން ބައިވެރިވެއެވެ. ބޯހިމެނުމުގެ މަސައްކަތަކީ ކޮންމެ 10 އަހަރަކުން އެއްއަހަރު ޤައުމުގެ ޙާލަތު ވަޒަންކޮށް ކުރިމަގުގައި ކުރިއަށްގެންދާ މަޝްރޫޢުތައް ޕްލޭންކުރުމަށް މަގުފަހިކުރުމަށް ބޭނުންވާ މަޢުލޫމާތު އެއްކުރުމަށް ކުރިއަށްގެންދާ ޤައުމީ ތަރައްޤީގެ މަސައްކަތެކެވެ. މީގެ ދަށުން ގޭބިސީތަކުގައި ދިރިއުޅޭ މީހުންގެ މަޢުލޫމާތާއި ދިރިއުޅުމުގެ ޙާލަތު ދެނެގަތުމަށް މަސައްކަތްކުރާނެއެވެ.