މާލެ ސަރަޙައްދުން ބޯހިމެނުމަށް މައުލޫމާތު ނުލިބޭ 900 ތަނެއް އެބަހުރިކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) އިން ބުނެފިއެވެ.
މި ހިނގާ ސެޕްޓެމްބަރު މަހުގެ 13 ވަނަ ދުވަހު ބޯހިމެނުމުގެ މަސައްކަތް ފަށާފައިވާއިރު، 25 ގެ ނިޔަލަށް މި މަސައްކަތް ކުރިއަށްދާނެކަމަށް އެމްބީއެސްއިން ބުނެފައިވެއެވެ. އަދި މާލެ ސަރަހައްދުގައި 27 ގެ ނިޔަލަށް މި މަސައްކަތް ކުރިއަށްގެންދިއުމަށް ނިންމާފައިވީ ނަމަވެސް، އެކި ސަބަބުތަކާހުރެ އަދިވެސް މާލެ ސަރަޙައްދުން ބޯހިމެނުމަށް މައުލޫމާތު ނުލިބޭ 900 ތަނެއް އެބަހުރިކަމަށް އެމްބީއެސްއިން ބުނެއެވެ.
އެމްބީއެސްއިން ވަނީ މިހާތަނަށް ބޯހިމެނިފައި ނުވާ ތަންތަނާއި، ލޭބަރ ކުއާޓަރ އަދި ރަޖިސްޓަރ ކޮށްގެން އިގްތިސާދީ މަސައްކަތް ހިންގާ ތަންތަނުން އަދި ބޭނުންކުރާ ތަންތަންވެސް ވީވަރަކުން ފާހަގަކޮށް އެ ބިއުރޯއަށް އަންގަމުން ގެންދިއުމަށް އެދިފައެވެ.
އަދި މައުލޫމާތު ލިބިފައިނުވާ ތަންތަނަށް ގުޅުމުގެ މަސައްކަތް ކުރަމުންދާއިރު، ތަޅުލާފައި ހުރުމުންނާއި، މައުލޫމާތު ދެވޭ ވަރުގެ މީހަކާ ދިމާނުވުމާއި، ރަށުން ބޭރުގައިވުމާއި، އެނިއުމަރޭޓަރުން ދީފައިވާ އެޕޮއިންޓުމަންޓަށް ނުދެވުން ފަދަ ސަބަބުތަކާހުރެ މި މަސައްކަތް ލަސްވެފައިވާކަން އެމްބީއެސްއިން ފާހަގަ ކުރެއެވެ.
ބޯހިމެނުމަށް ލިބޭ މައުލޫމާތުތަކުގެ އަލީގައި ޕޮލިސީތައް ހެދުމަށާއި ދިރާސާތައް ކުރުމަށް ބޮޑެތި ލުއިތަކެއް ލިބިގެންދާނެ ކަމަށް އެމްބީއެސްއިން ބުނެއެވެ.
ނޭޝަނަލް ބިއުރޯ އޮފް ސްޓެޓިސްޓިކްސް އިން މައުލޫމާތު ދޭގޮތުގައި ބޯހިމެނުމަށް ދޭ މައުލޫމާތު ސިއްރު ކުރެވޭނެއެވެ. އެއީ ގާނޫނުން ވެސް މަޖުބޫރު ކުރާ ކަމެއް ކަަމަށާއި އާއްމު ކުރާނީ ލިބޭ ހުރިހާ މައުލޫމާތުތައް އެއްކޮށްގެން ކަމަށް އެ އިދާރާއިން ބުނެއެވެ.
އަދި މައުލޫމާތު އެއްކުރާއިރު އެއްވެސް މީހަކީ ކާކުކަން އެނގޭކަހަލަ މައުލޫމާތެއް ނުހޯދާނެ ކަމުގެ ޔަގީންކަން އެ އިދާރާއިން ދެއެވެ.
މީގެ އިތުރުން، މިހާރު ޤާނޫނުގެ ދަށުން ބޯހިމެނުމަށް މައުލޫމާތު ނުދޭ ފަރާތްތަކާ މެދު ފިޔަވަޅު އެޅުމުގެ އިހުތިޔާރު ނޭޝަނަލް ބިއުރޯ އޮފް ސްޓެޓިސްޓިކްސްއަށް ލިބިގެންވާ ކަމަށާއި، ނަމަވެސް އެ ފިޔަވަޅު އެޅުމުގެ ކުރިން މައުލޫމާތު ފޯރުކޮށްދިނުމަށް ކޮންމެ މީހަކަށް ވެސް ފުރުސަތުތަކެއް ލިބިގެންދާނެ ކަމަށް އެ އިދާރާއިން ވަނީ ބުނެފައެވެ.
ބޯހިމެނުމުގެ މަސައްކަތްކުރާ ފަރާތްތަކުން ކުރިއަށްގެންދަނީ ބުރަ އަދި މުހިންމު މަސައްކަތްތަކެއްކަން ފާހަގަކުރައްވައި، އެ މަސައްކަތަށް ހުރިހާ ރައްޔިތުންގެ ފަރާތުން ވެސް އެއްބާރުލުން ދިނުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ އެދިވަޑައިގަންނަވާފައެވެ.
ރައީސުލްޖުމްހޫރިއްޔާ ވަނީ އެ ފަރާތްތައް ކުރާ މަސައްކަތަކީ ރާއްޖޭގެ ކުރިމަގު ރޭވުމަށް ވަރަށް މުހިންމު މަޢުލޫމާތުތަކެއް އެއްކުރެވޭ މަސައްކަތެއްކަމުގައި ފާހަގަކުރައްވާފައެވެ. އަދި ބޯހިމެނުމުގައި އެއްކުރެވޭ މަޢުލޫމާތުތަކުގެ އަލީގައި ރާއްޖޭގެ ތަރައްޤީގެ މަޝްރޫޢުތަކާ އިޖުތިމާޢީ ހުރިހާ ބޮޑެތި މައްސަލަތައް ފާހަގަވުމުގެ އިތުރުން އެކަންތައްތައް ޙައްލުކުރުމަށް ވަރަށް ބޮޑަށް ފަސޭހަވެގެންދާނެކަމަށް ވެސް އެމަނިކުފާނު ވިދާޅުވިއެވެ.
މިފަހަރުގެ ބޯހިމެނުމުގެ ޢަމަލީ މަސައްކަތުގައި 4000 އަށް ވުރެ ގިނަ ފަރާތްތަކުން ބައިވެރިވެއެވެ. ބޯހިމެނުމުގެ މަސައްކަތަކީ ކޮންމެ 10 އަހަރަކުން އެއްއަހަރު ޤައުމުގެ ޙާލަތު ވަޒަންކޮށް ކުރިމަގުގައި ކުރިއަށްގެންދާ މަޝްރޫޢުތައް ޕްލޭންކުރުމަށް މަގުފަހިކުރުމަށް ބޭނުންވާ މަޢުލޫމާތު އެއްކުރުމަށް ކުރިއަށްގެންދާ ޤައުމީ ތަރައްޤީގެ މަސައްކަތެކެވެ. މީގެ ދަށުން ގޭބިސީތަކުގައި ދިރިއުޅޭ މީހުންގެ މަޢުލޫމާތާއި ދިރިއުޅުމުގެ ޙާލަތު ދެނެގަތުމަށް މަސައްކަތްކުރާނެއެވެ.
