ރާއްޖޭގައި ދިރިއުޅޭ އާބާދީގެ 24 އިންސައްތައަކީ ކުޑަކުދިން
10 މެއި 2023 | ބުދަ 13:4562،541 ފިރިހެން ކުދިންނާއި 59،093 އަންހެން ކުދިން އުޅޭ
ކުޑަކުދިން
ރާއްޖޭގައި ދިރިއުޅޭ އާބާދީގެ 24 އިންސައްތައަކީ ކުޑަކުދިންކަމަށް, މޯލްޑިވްސް ބިއުރޯ އޮފް ސްޓެޓިސްޓިކްސްއިން ބުނެފިއެވެ.
މިއަދު ފާހަގަކުރަމުންދާ ކުޑަކުދިންގެ ދުވަހާ ގުޅުވައިގެން ސްޓެޓިސްޓިކްސްއިން އާންމުކުރި ތަފާސްހިސާބުތައް ދައްކާގޮތުން؛ ރާއްޖޭގައި 121،634 ކުޑަކުދިން އުޅެއެވެ. އެއީ 62،541 ފިރިހެން ކުދިންނާއި 59،093 އަންހެން ކުދިންނެވެ. ކުޑަކުދިންގެ އާބާދީގެ ގޮތުގައި ބަލަނީ އުފަންވީއްސުރެ 17 އަހަރާ ދެމެދެވެ.
ރާއްޖޭގައި ދިރިއުޅޭ ކުޑަކުދިންގެ ތެރެއިން އެންމެ ގިނަ ކުދިންގެ އުމުރަކީ 10 އަހަރާ 14 އަހަރާ ދެމެދެވެ. އެންމެ މަދު ކުދިންގެ އުމުރަކީ 15 އަހަރާ 17 އަހަރާ ދެމެދެވެ.
ރާއްޖޭގައި ދިރިއުޅޭ އާބާދީގެ ޖުމްލައަކީ 515،122އެވެ.
ކުޑަކުދިންގެ އާބާދީގެ ނިސްބަތް، އުފަންވީއްސުރެ 14 އަހަރާ ދެމެދުގެ އާބާދީ 2022 ވަނަ އަހަރުގެ ބޯހިމެނުމުގައި ހުރީ 26 އިންސައްތައިގައެވެ. 2014 ވަނަ އަހަރު ހުރީ 28 އިންސައްތައިގައެވެ.
2022 ވަނަ އަހަރުގެ ބޯހިމެނުމުގެ ނަތީޖާ ދައްކާގޮތުން؛ މަސައްކަތްކުރާ އާބާދީގެ ކޮންމެ 100 މީހަކަށް 38 ކުދިން ބަރޯސާވެއެވެ. އެއަދަދު 2014ގައި ހުރީ 41ގައެވެ.
ސްކޫލްތަކުގައި ކިޔަވާކުދިންގެ ތެރެއިން އެންމެ ގިނަ ކުދިން ކިޔަވަމުން އަންނަނީ ގްރޭޑް 1ގައެވެ. އެންމެ މަދު ކުދިން ކިޔަވަމުން އަންނަނީ ބޭބީ ނަރސަރީގައެވެ.
ކުޑަކުދިން އުފަންވާ އަދި މަރުވާ ރޭޓަށް ބަލާއިރު؛ އާބާދީގެ ކޮންމެ 1000 މީހަކަށް 10 ކުޑަކުދިން ޖެހެއެވެ. އުފަންވީއްސުރެ 27 ދުވަހާ ދެމެދު ކުޑަކުދިން މަރުވާ ރޭޓަށް ބަލާއިރު އުފަންވިއިރު ދިރިހުރި ކޮންމެ 1000 ކުއްޖަކަށް ޖެހެނީ 6 ތުއްތުކުދިންނެވެ.
