"ރަށު ފެރީ" އަންނަ ނޮވެމްބަރުގައި ފަށާނެ- އަސްލަމް

"ރަށު ފެރީ"ގެ ޚިދުމަތް އަންނަ ނޮވެމްބަރުގައި ފަށާނެ ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ، މުހައްމަދު އަސްލަމް ވިދާޅުވެއްޖެއެވެ. 'އިންޓަރގްރޭޓެޑް ނެޝަނަލް ޕަބްލިކް ފެރީ ފެޓްވާރކް' ނުވަތަ ރަށު ފެރީގެ އެންމެ ތަފްސީލްތައް ދެއްވުމަށް ބުދަ ދުވަހު ބޭއްވި ނިއުސް ކޮންފަރެންސްގައި، މިނިސްޓަރ އަސްލަމް ވިދާޅުވީ، ދަތުރުކުރުމަށް ބޭނުންވާ އުޅަނދުފަހަރު ބަނދެ، ސީ ޓްރައެލްތައް މި އަހަރުގެ މެދުތެރޭގައި ކޮށް, ނޮވެމްބަރުގައި ރައްޔިތުންނަށް ޚިދުމަތް ދެވޭވަރުވާނެ ކަމަަށެވެ.

ދައުލަތުގެ ބަޖެޓުން 157 މިލިއަން ރުފިޔާ ޚަރަދުކޮށްގެން ހިންގާ މަޝްރޫއު ކުރިއަށްގެންދިޔުމުގައި ސަރުކާރުގެ ވިސްނުމަކީ، ސަބްސިޑައިޒް ކޮށްގެންވެސް "ރަށު ފެރީ"ގެ ނިޒާމް ނަގާ ކޮޅަށްޖެހުމެވެ. މިނިސްޓަރ އަސްލަމް ވިދާޅުވީ، މިހާރު ބެލިބެލުމުން އަންދާޒާކުރެވުނު ގޮތުގައި، ސަރުކާރުން މި މަޝްރޫޢުއަށް، ގާތްގަނޑަކަށް 7 އަހަރާއި 10 އަހަރާ ދެމެދުގެ މުއްދަތަކަށް ސަބްސިޑައިޒް ކުރަންޖެހޭނެއެވެ.

މިނިސްޓަރ ވިދާޅުވީ ފެރީތަކުގެ ޑިޒައިން ވެސް މިހާރު ނިމިފައިވާ ކަމަށާއި، މި ފެރީ ތަކަކީ ޕަސިންޖަރުންނަށް ރައްކާތެރި އަދި ފަސޭހަކަމާއެކު ދަތުރުކުރެވޭނެ ގޮތަށް ފަރުމާ ކޮށްފައިވާ ފެރީތަކެއްކަމަށެވެ.

17 އުޅަނދު ބަނުމަށް ނިންމާފައިވާއިރު، އުޅަނދުފަހަރު ބަނުމަށް ވަރަށް އަވަހަށް ބަޔަކާ ހަވާލުކުރާނެ ކަމަށާއި، އުޅަނދު ބަނުމަށް ހަވާލުކުރާނީ ދިވެހި ބަޔަކާ ކަމަށްވެސް މިނިސްޓަރ ވިދާޅުވިއެވެ. އަދި އުތުރުގެ 42 ރަށަކަށް ދަތުރުކޮށް އެ ރަށްރަށުގައި ފެރީ ކައިރިކުރާނެ ސަރަހައްދުތަކާއި، ފެރީ ގިމަތަ އަޅާނެ ތަންތަން ކައުންސިލްތަކާއި، ވާހަކަދައްކައިގެން ހަމަޖެހިފައިވާކަމަށެވެ. އަދި ކައުންސިލްތަކާއި އެރަށްރަށުގެ ރައްޔިތުންގެ ފަރާތުން ވެސް މިކަމުގައި ވަރަށް އެއްބާރުލުން ލިބިފައިވާކަމަށެވެ.

ފެެރީ ދަތުރުތައް ފަށާއިރު ރަށްރަށުގެ ޓާރމިނަލްތައް ހުންނާނީ ނިމިފައި ކަމަށާއި، ޒޯން 1ގެ ދަތުރު ރޫޓާއި ޝެޑިއުލްވެސް މިހާރު އެއްކޮށް ނިމިފައިވާކަމަށެވެ. އަދި ފެރީގެ އަގުތައް މިހާރު ރިވިއު ކުރަމުން އަންނަ ކަމުގައި ވިދާޅުވިއެވެ.

މި ޕްރެސް ކޮންފަރެންސްގައި ވާހަކަދައްކަވަމުން އެމްޓީސީސީގެ އެމްޑީ، އާދަމް އާޒިމް ވިދާޅުވީ، ފެރީގެ ޚިދުމަތް ފަށާއިރު، މުވައްޒަފުން ހޯދުމުގެ މަސައްކަތް ޖުލައިމަހުގެ ތެރޭގައި ފަށާނެ ކަމަށެވެ. ވިސްނުމަކީ އެ ސަރަހައްދުތަކުން މުވައްޒަފުން ހޯދުން ކަމަށެވެ. ޒޯން 1ގައި ޚިދުމަތް ދިނުމަށް 80 މުވައްޒަފުންގެ ބޭނުންވެއެވެ.

މުޅި ރާއްޖެ ދަތުުރުފަތުގެ ނިޒާމަކުން ގުޅާލުމަށް ސަރުކާރުން ކުރިއަށްގެންދާ މި މަޝްރޫއުގައި އެންމެ ފުރަތަމަ ފެރީގެ ޚިދުމަތް ފަށަނީ އުތުރުގެ 3 އަތޮޅުގައެވެ. މުޅިރާއްޖެ 6 ޒޯނަކަށް ބަހާލައިގެން ކުރިއަށްގެންދާ މި މަޝްރޫއުގެ ބާކީހުރި ޒޯންތަކުގެ މަސައްކަތް އަންނަ އަހަރުގެ ތެރޭގައި ކުރިއަށްގެންގޮސް 2023 ގައި މުޅި މަޝްރޫ އެއްކޮށް ނިންމުމަށް ސަރުކާރުންވަނީ އަމާޒުހިފާފައެވެ.