ދިވެހިން ވެއްޖެ، ރައީސަކު އިންތިޚާބުކުރަން ވޯޓެއް ލާން: އަސްލަމް
ފާއިތުވި ތިން އިންތިޚާބުގައިވެސް ރައްޔިތުން ވޯޓުލީ ވަކި މީހަކަށް އިންތިޚާބު ކާމިޔާބުވިޔަ ނުދިނުމަށް
މިނިސްޓަރު އަސްލަމް، ގައްދޫގައި ކުރިއަށްދިޔަ ޖަލްސާގައި ވާހަކަފުޅުދައްކަވަނީ
ވަކި މީހަކަށް އިންތިޚާބު ކާމިޔާބުވިޔަ ނުދިނުމުގެ ބަދަލުގައި، ރައީސަކު ހޮވަން ދިވެހިން ވޯޓުލާން ވެއްޖެކަމަށް، ޕްލޭނިންގ މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
ގދ. ގައްދޫގައި އަންގާރަ ދުވަހުގެ ރޭ ބޭއްވި "އުފާވެރި އަމާން ރާއްޖެ" ޖަލްސާގައި ވާހަކަފުޅުދައްކަވަމުން އަސްލަމް ވިދާޅުވީ، ރާއްޖޭގައި މިނިވަން ސިޔާސީ ހަރަކާތް ފެށިފަހުން ހަތަރުވަނަ ރިޔާސީ އިންތިޚާބެއް ބާއްވާއިރު، ފާއިތުވި ތިން އިންތިޚާބުގައިވެސް ރައްޔިތުން ވޯޓުލީ ވަކި މީހަކަށް އިންތިޚާބު ކާމިޔާބުވިޔަ ނުދިނުމުގެ ވިސްނުމުގައި ކަމަށެވެ. އެގޮތުން، ކުރީގެ ރައީސުން ކަމަށްވާ މައުމޫން އަބްދުލްގައްޔޫމާއި މުހައްމަދު ނަޝީދާއި ޔާމީން އަބްދުލްގައްޔޫމާ ދެކޮޅަށް އެ އިންތިޚާބުތަކުގައި ވޯޓުލީ ސަބަބުތަކެއް ހުރެގެންކަމަށް އޭނާ ވިދާޅުވިއެވެ.
އަސްލަމް ވިދާޅުވީ މިއަދު ރާއްޖެ އޮތީ ޑިމޮކްރަސީގައި ކުރިއަށް އާދެވިފައި ކަމަށާއި، މިއަދުގެ ސަރުކާރުން ފަސް އަހަރު ނިމިގެންދާއިރު ޖަޒީރާ ރާއްޖެ ތަސައްވުރާ އެއްގޮތަށް، އެއްވެސް ރައްޔިތަކު ބާކީނުކޮށް ތަރައްގީ ގެނެސްދީފައިވާ ކަމަށެވެ. އެހެންވެ، ޕާޓިތަކުގެ ލީޑަރުން ރިޔާސީ އިންތިޚާބަށް ނުކުމެވަޑައިގަތުމުން އެ ބޭފުޅުންގެ ސިޔާސަތާއި މާޒީގެ މަސައްކަތްތަކަށް ބެލުމަށްފަހު ރައްޔިތުން ރައީސަކު އިންތިޚާބު ކުރާނެ ދުވަހަކަށް އުއްމީދުކުރައްވާ ކަމަށް އޭނާ ވިދާޅުވިއެވެ.
އަސްލަމް ވިދާޅުވީ ސިޔާސީ ޕާޓީތަކުގެ ލީޑަރޝިޕް ބަދަލުވިނަމަވެސް ޕާޓީތައް އުފެދިގެން އަންނަނީ ވަކި އަސާސްތަކެއްގެ މައްޗަށް ކަމަށްވާއިރު އެމްޑީޕީ އަދިވެސް ދެމިއޮތީ 2008 ވަނަ އަހަރު ވެރިކަމަށް އައި އަސާސްތަކާއެކުގައި ކަމަށެވެ. އެގޮތުން، އަތްފޯރާ ފަށުގައި ބޯހިޔާވަހިކަން ހޯދައިދިނުމާއި, ރަށު ބަންދުން ރައްޔިތުން ވީއްލުމާއި، ބޭސް ސިޓީއަށް ސަލާން ޖެހުން ހުއްޓުވުމާއި، ތާހިރު އަގުހެޔޮ ދިރިއުޅުމެއް ހޯދައިދިނުމަކީ އަދިވެސް އެމްޑީޕީގެ ސިޔާސަތުކަން އޭނާ ފާހަގަކުރެއްވިއެވެ.
ދެވަނަ ދައުރެއް ރައީސަށް ދިނުމަކީ ފުރަތަމަ ދައުރުގައި ރައީސަކު ކުރެއްވި މަސައްކަތްތައް ރައްޔިތުން ބަލައިގަންނަ މިންވަރު ހާމަކޮށްދޭ ކަމެއްކަން ފާހަގަކުރައްވައި އަސްލަމް ވިދާޅުވީ، މި ސަރުކާރުން ރައްޔިތުންނަށް ކޮށްދިން ކަންކަން ރައްޔިތުން ބަލައިގެންފައިވާކަން މިހާރު ކުރައްވަމުން ގެންދަވާ ދަތުރުތަކުގައި ހާމަވެގެންދާކަމަށެވެ.
