ނިސްބަތުން ތަރައްގީ ގެނެސްދިނުމުގެ ވިސްނުމެއް ނެތް - އަސްލަމް

ނިސްބަތުން ތަރައްގީ ގެނައުމުގެ ވިސްނުމެއް ނެތް ކަމަށާއި، އެކަން ކުރައްވާނީ ހަމަހަމަ ގޮތެއްގައި ކަމަށް މިނިސްޓަރ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ، މުހައްމަދު އަސްލަމް ވިދާޅުވެއްޖެއެވެ.

ހުވަދު އަތޮޅުގައި އާރުޓީއެލް ފެރީގެ ޚިދުމަތް ރަސްމީކޮށް ފެށުމަށް ބޭއްވި ރަސްމިއްުޔާތުގައި ވާހަކަަފުޅުދައްކަވަމުން މިނިސްޓަރު ވިދާޅުވީ، ކުޑަރަށެއް ބޮޑުރަށެއް ނެތި ރައްޔިތުންނަށް ލިބޭނެ ޚިދުމަތަކީ އާރުޓީއެލްގެ ޚިދުމަތް ކަމަށެވެ. އެންމެންނަށް ހަމަހަމަ ގޮތެއްގައި ލިބޭ ތަރައްގީއަކީ މިއީ ކަމަށާއި، ނިސްބަތުން ތަރައްގީ ކޮށްދޭކަށް ވިސްނުމުގައި ނެތް ކަމަށެވެ. މިނިސްޓަރު ވިދާޅުވީ ހަމަހަމަ ގޮތެއްގައި ތަރައްގީ ލިބޭނެ ކަމަށާއި، ގައުމެއްގައި ތަރައްގީއަކީ ނިސްބަތުން ދޭ އެއްޗެއް ނޫން ކަމަށެވެ. އަދި އުއްމީދު ފުރިހަމަ ކުރުމަށް ވަރަށް ގިނަ ކަންކަން އެބަހުރި ކަމަށާއި، އާރުޓީއެލް ނޫން، އަދިވެސް ގިނަ ބަދަލުތައް ގެންނަން އެބަހުރި ކަމަށެވެ.

މިނިސްޓަރު ވިދާޅުވީ ފެރީގެ ޚިދުމަތް ތަންކޮޅެއް ކުރިން އެމްޑީޕީގެ ފުރަތަމަ ސަރުކާރުގައި ފެށި ކަމަށާއި، ފަށާފައި ސަރުކާރު ބަދަލުވުމާއެކު ދެން އައި ސަރުކާރުން މިކަން ތަރައްގީ ނުކުރި މކަމަށެވެ. އަދި މިކަމާ ދޭތެރޭގައި ވިސްނުމެއް ނެތް ކަމަށާއި، ސިޔާސީ ބޭފުޅުންނާއި ގައުމުގެ ވެރިން ގައުމެއްގެ ރައްޔިތުންނާ ދޭތެރޭގައި ދެކޭގޮތާއި ގެންގުޅުއްވާ ތަސައްވަރު ރައްޔިތުންނަށް ވަރަށް މުހިންމުވާންޖެހޭ ކަމަށެވެ. އަދި މިކަން ކުރުމުގެ ވިސްނުން ސަރުކާރުތަކުގައި ނެތުމަކީ ހިތާމަކުރަންޖެހޭ ކަމެއް ކަމަށާއި، އެހެންނޫންނަމަ މިއަދު އެވާހަކަ ދައްކާކަަށް ނުޖެހޭނެ ކަމަށެވެ. އަދި ތަރައްގީގައި ދެވިފައި އޮންނާނީ އެހެން ހިސާބަކަށް ކަމަށް މިނިސްޓަރު ވިދާޅުވިއެވެ.

މިނިސްޓަރ ވިދާޅުވީ އާރުޓީއެލްގެ ޚިދުމަތަކީ ދެން އެއްވެސް ބަޔަކަށް ހުއްޓުވޭނެކަމެއް ނޫން ކަމަށެވެ. 67 އުޅަނދު ބަނދެގެން ދަތުރުގައި ބައިވެރި ކުރެވިއްޖެ ކަމަށާއި، ތަަސައްވުރަކީ ކުރިއަށް އޮތް އަހަރު ނިމުމުގެ ކުރިން 187 ރަށް އެކީގައި ގުޅާލައި މަހާލުން ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ އުމުރުން 4 އަހަރުން ދަށުގެ ކުޑަކުދިންނާއި، ނުކުޅެދުންތެރިކަން ހުންނަ ފަރާތްތަކުގެ އަތުން މި ޚިދުމަތުގައި ލާރި ނުނަގާނެ ކަމަށެވެ. އަދި މިހާތަނަށް 19000ށްވުރެ ގިނަ ކުޑަކުދިންނާއި ނުކުޅެދުންތެރިކަން ހުންނަ ފަރާތްތަށް ޚިދުމަތް ލިބިފައި އެބަހުރި ކަމަށެވެ. މިނިސްޓަރު ވަނީ މިކަން ހުއްޓުނަނުދެއްވުމަށް އެދިވަޑައިގަންނަވާފައެވެ.

މިނިސްޓަރު ވިދާޅުވީ ހުވަދުއަތޮޅުގައި ޚިދުމަތް ދޭނީ 8 ލޯންޗުން ކަމަށާއި، އިތުރު ލޯންޗް އަންނާނެ ކަމަށެވެ. އަދި މި ޚިދުމަތް ފެށީ 6 އުޅަނދުން ކަމަށާއި، އިތުރު އުޅަނދު ގެނެސް ބެކަޕް ލޯންޗް އޮންނާނެ ކަމަށެވެ. އަދި މިއިން ލޯންޗެއްގައި 6 ކުރޫން ތިބޭނެ ކަމަށާއި، އެއީ ރަށުގައި ހުރެގެން އަދާކުރެވޭނެ ވަޒީފާ ކަމަށް މިނިސްޓަރު ވިދާޅުވިއެވެ.