ގޯތި ލިބޭ މީހުންގެ ލިސްޓަށް ޝަކުވާ ހުށަހެޅުން ޖުލައި 15ގެ ނިޔަލަށް - "އެއްވެސް ނަމެއް އުނިވާނެ ކަމަކަށް ނުބެލެވޭ"
ހަތް މީހުންނަށްވުރެ ގިނަ މީހުން ޖޮއިންޓް އެޕްލިކޭޝަނުގައި ބައިވެރިވާނަމަ، އެ ފޯމަކަށް ލިބޭނީ ޖުމްލަ 4،000 އަކަފޫޓް
ޕްލޭނިންގ މިނިސްޓްރީން ހޯމަ ދުވަހު ބޭއްވި ނޫސްވެރިންގެ ބައްދަލުވުން
މި ސަރުކާރުން ހިންގާ "ބިންވެރިޔާ" ސްކީމްގެ ދަށުން ގޯތި ލިބޭ މީހުންގެ ވަގުތީ ލިސްޓަށް ޝަކުވާ ހުށަހެޅުމުގެ ފުރުސަތު ކުރިއަށް އޮތް ޖުލައި 15 ވަނަ ދުވަހުގެ ނިޔަލަށް ހުޅުވާލައިފިއެވެ.
ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި ޕްލޭނިން މިނިސްޓަރު މުހައްމަދު އަސްލަމް ވިދާޅުވީ، މިހާރު އާާއްމުކޮށްފައިވާ ވަގުތީ ލިސްޓަށް ޝަކުވާ ހުށަހެޅުމުގެ ފުރުސަތު 26 ޖޫންއިން ފެށިގެން، އަންނަ ޖުލައި މަހުގެ 15އާ ހަމައަށް ހުޅުވާލާފައިވާކަމަށެވެ. އެހެންނަމަވެސް ލިސްޓުން ނަމެއް އުނިވެދާނެ ކަަމަށް ނުބެލެވޭ ކަމަށް އަސްލަމް ވިދާޅުވިއެވެ. އަދި ކުރިއަށް އޮތް މަދު ހަފުތާތަކެއްގެ ތެރޭގައި، ގޯތި ލިބޭ މީހުންގެ ދާއިމީ ލިސްޓު އިއުލާނުކުރާނެ ކަމަށް އެމަނިކުފާނު ވިދާޅުވިއެވެ. އަސްލަމް އިތުރަށް ވިދާޅުވީ ޝަކުވާތައް ބަލައިގަނެ، ލިސްޓަށް ގެންނަން ޖެހޭ އިސްލާހުތައް ގެނެސް، ފައިނަލް ލިސްޓު އާއްމުކުރާނީ ޝަރުތު ހަމަވާ މީހުންނަށް ލިބޭނެ ބިމުގެ މައުލޫމާތާއި އެކުގައި ކަމަށެވެ.
"ބިންވެރިޔާ" ސްކީމްގެ ދަށުން 15،164 ފޯމު ހުށަހަޅާފައިވާއިރު އެއީ ޖޮއިންޓް-އެޕްލިކޭޝަންތައް ހިމެނޭ ގޮތަށް, މުޅިއެކު 19،857 މީހުންނެވެ. ހޯމަ ދުވަހު އާއްމުކުރި ލިސްޓުގައި ހިމެނެނީ އޭގެ ތެރެއިން ގޯތި ލިބޭ 10،314 މީހުންނެވެ. އަސްލަމް ވަނީ ބިންވެރިޔާ ސްކީމްގެ ދަށުން ގޯތި ދިނުމުގެ ކަންކަން ކަނޑައެޅި ކޮމިޓީގެ މަސައްކަތްތައް ރަނގަޅުކަން ފާހަގަކުރައްވައި، އެ ކޮމިޓީގެ މަސައްކަތަށް ތައުރީފްކުރައްވާފައެވެ.
މީގެ އިތުރުން ގޯތި ދިނުމަށްޓަކައި ދިރިއުޅުމުގެ ހާލަތު ބަލަން ގޭގެއަށް ޒިޔާތްކޮށްފައި ނުވާތީ އެކަމާމެދު ނޫސްވެރިއަކު ސުވާލު ދެންނެވުމުން އަސްލަމް ވިދާޅުވީ، އާއްމުކޮށް ގޯއްޗަށް އެދި ކުރިމަތިލާ މީހުންގެ ދިރިއުޅުމުގެ ހާލަތު ބަލަން ޒިޔާރަތްކުރުމަކީ އެންމެ އިންސާފުވެރިގޮތް ނޫން ކަމަށެވެ. އެފަދަ ސަރވޭތައް ކުރަން ދާއިރު އާއްމުން ދަނީ ދައްކަން ބޭނުންވާ ވަކި މަންޒަަރެއް ކަަމަށާއި، ދިރިއުޅުމުގެ ހަގީގީ މަންޒަރު ނުފެންނަ ކަަމަށް އަސްލަމް ވިދާޅުވިއެވެ. އޭގެ ބަދަލުގައި މި ފަހަރު ބަލާފައިވާނީ ކަމާގުޅޭ އިދާރާތަކުގައި ހުރި ލިޔެކިޔުންތަކުން ލިބެން ހުރި ސައްހަ މައުލޫމާތަށް ކަމަށް އަސްލަމް ވިދާޅުވިއެވެ.
"ބިންވެރިޔާ" ސްކީމުގެ ދަށުން ގޯތި ދޫކުރަނީ ހުޅުމާލެއާއި ގުޅީފަޅުގެ އިތުރުން ގިރާވަރު ފަޅު ހިއްކައިގެންނެވެ. މިނިސްޓްރީން ހާމަކޮށްފައިވާގޮތުގައި ގޯތީގެ އަދަދު ކަނޑައެޅުމަށް ހަމަޖެހިފައި ވަނީ ގޯތި ދިނުމަށްޓަކައި ހޮވާ ވަކިވަކި އެޕްލިކޭޝަންތަކަށް ދޫކުރާނެ ގޯތީގެ ބޮޑުމިން ކަނޑައެޅުމަށްފަހުއެވެ. އެގޮތުން ފޯމަކަށް ލިބޭނެ ގޯތީގެ އެންމެ ކުޑަ ސައިޒަކީ 1،250 އަކަފޫޓެވެ. ޖޮއިންޓް އެޕްލިކޭޝަނާއި، އެކަކަށްވުރެ ގިނަ މީހުންގެ ނަމުގައި ހުށަހަޅާ ފޯމުތަކަށް، އިތުރަށް ބައިވެރިވާ ކޮންމެ މީހަކަށް 400 އަކަފޫޓު ގޯތީގެ ބޮޑުމިނަށް އިތުރު ކުރެވޭނެއެވެ. އެގޮތުގެ މަތިން ހަތް މީހުންނަށްވުރެ ގިނަ މީހުން ޖޮއިންޓް އެޕްލިކޭޝަނުގައި ބައިވެރިވާނަމަ، އެ ފޯމަކަށް ލިބޭނީ ޖުމްލަ 4،000 އަކަފޫޓެވެ.
