މޮންޗެންގްލަޑްބަކް ބަލިކޮށް ސިޓީ ކުއާޓާއަށް

ޔުއެފާ ޗެމްޕިއަންސް ލީގުގެ ދެވަނަ ބުރުން ބޮރޫޝިއާ މޮންޗެންގްލަޑްބަކް ކަޓުވާލުމަށްފަހު މުބާރާތުގެ ކުއާޓާ ފައިނަލަށް މެންޗެސްޓާ ސިޓީ ދަތުރުކޮށްފިއެވެ.

ކޮވިޑް-19 އާ ގުޅިގެން ސިޓީ އާއި މޮންޗެންގްލަޑްބަކުގެ ދެ ލެގުވެސް ކުޅެފައިވަނީ ހަންގޭރީގެ ބުޑަޕެސްޓުގައި ހުންނަ ޕުސްކަސް އެރީނާގައެވެ. އެގޮތުން އަންގާރަ ދުވަހުގެރޭ ކުޅުނު ދެވަނަ ލެގުން 2-0 ގެ ނަތީޖާއަކުން ސިޓީ މޮޅުވިއިރު، ފުރަތަމަ ލެގުންވެސް ސިޓީ ވަނީ 2-0 ގެ ނަތީޖާއަކުން މޮޅުވެފައެވެ. އެހެންކަމުން 4-0 ގެ އެގްރިގޭޓް ނަތީޖާއަކުން މޮޅުވެ، ސިޓީ ވަނީ ކުއާޓާއަށް ދަތުރުކޮށްފައެވެ.

އަންގާރަ ދުވަހުގެރޭ ކުޅުނު މެޗުގައި ސިޓީން ދެ ލަނޑުވެސް ޖަހާފައިވަނީ ފުރަތަމަ ހާފުގައެވެ. އެގޮތުން މެޗުގެ 12 ވަނަ މިނެޓުގައި ސިޓީއަށް ލީޑު ނަގައިދިނީ ކެވިން ޑި ބްރޭނާއެވެ. އޭނާ މި ލަނޑު ކާމިޔާބުކުރީ އޭރިއާ ބޭރުން ފޮނުވާލި ބާރު ހަމަލާއަކުންނެވެ. އަދި އޭގެ ހަ މިނެޓު ފަހުން ފިލް ފޯޑެން ދިން ބޯޅައަކުން އިލްކާއި ގުންޑޮގާން ވަނީ ލަނޑެއް ޖަހައި، ސިޓީއަށް ލީޑު ފުޅާކޮށްދީފައެވެ.

މި މެޗުން ސިޓީ މޮޅުވިއިރު، މި ސީޒަނުގެ ޗެމްޕިއަންސް ލީގުގައި އެންމެ ފަހުން ކުޅުނު ހަތް މެޗުވެސް އެ ޓީމުން ނިންމާލާފައިވަނީ ބައިކޮޅަށް ލަނޑެއް ނުވައްދައެވެ. އަދި މި ސީޒަނުގެ ޗެމްޕިއަންސް ލީގުގައި ކުޅުނު އަށް މެޗުގައި ސިޓީ ކޮޅަށް މިހާތަނަށް ވަދެފައިވަނީ އެންމެ ލަނޑެކެވެ.

މީގެ އިތުރުން އަންގާރަ ދުވަހުގެރޭ ކުޅުނު މެޗުން ސިޓީ މޮޅުވިއިރު، ހުރިހާ މުބާރާތެއްގައި އެންމެ ފަހުން ކުޅުނު 25 މެޗުގެ ތެރެއިން 24 މެޗުން ސިޓީ ވަނީ މޮޅުވެފައެވެ.