މިޔަންމާގެ އަސްކަރިއްޔާއާ ދެކޮޅަށް އެގައުމުގައި ކުރަމުން ގެންދާ މުޒާހަރާގައި ފުލުހުން ބަޑި ޖަހާ 22 މީހުން މަރާލައިފިއެވެ.

މިޔަންމާގެ ކުރީގެ ވެރިރަށް ކަމަށްވާ ހީލަންގް ތަރިޔާރު ސަރަހައްދުގައި ކުރިޔަށް ގެންދިޔަ މުޒާހަރާ ކޮންޓްރޯލް ކުރުމަށް ފުލުހުން ބާރުގެ ބޭނުން ކޮށްފައިވާއިރު، ބަޑި ޖަހައި 22 މީހަކު ވަނީ މަރާލައިފައެވެ. އަދި ފުލުހުންގެ ހަމަލާތަކުގައި 38 މީހަކަށް އަނިޔާވެފައިވާ ކަމަށް ރިޕޯޓްތައް ބުނެއެވެ.

ރިޕޯޓްތައް ބުނާ ގޮތުން ފުލުހުން ބާރުގެ ބޭނުން ކޮށްފައިވަނީ މުޒާހަރާގެ ބައިވެރިން އެ ސަރަހައްދުގައި ހުރި ކާރުހަނާތަކަށް ގެއްލުން ދިނުމުންނެވެ. އެގޮތުން އެ ސަރަހައްދުގައި ހުރި 10 ކާރުހާނާ އަކަށް މުޒާހަރާގެ ބައިވެރިން ވަނީ ގެއްލުންދީފައެވެ. މި ކާރުހާނާތަކަކީ ޗައިނާގެ އިންވެސްޓްމެންޓެއްގެ ދަށުން ބިނާ ކޮށްފައިވާ ކާރުހާނާތަކެކެވެ. މި ކާރުހާނާތަކަށް މުޒާހަރާގެ ބައިވެރިން ހަމަލާދީފައިވަނީ ޗައިނާއިން މިޔަންމާގެ އަސްކަރިއްޔާއަށް އެހީވަމުންދާ ކަމަށް ބުނެއެވެ.

މިޔަންމާގައި ކުރިޔަށްދާ މުޒާހަރާތައް ކޮންޓްރޯލް ކުރުމަށް ފުލުހުން ބާރުގެ ބޭނުން ކުރަމުން އަންނައިރު، މި މުޒާހަރާތަކުގައި މިހާތަނަށް 80 އަށް ވުރެ ގިނަ މީހުން ވަނީ މަރުވެފައެވެ.

މިޔަންމާގައި ކުރިޔަށްދާ މުޒާހަރާތަކާ ގުޅިގެން މިޔަންމާގެ އަސްކަރިއްޔާއިން ބުނީ އަސްކަރިއްޔާއިން ބަޣާވާތެއް ކޮށްފައި ނުވާނެ ކަމަށެވެ. އަދި އަން ސަން ސޫކީގެ ވެރިކަން ވަށްޓާލައިފައިވަނީ އިންތިހާބުގައި އޮޅުވާލުމުން ކަމަށެވެ.