ބާސާއިން ކޫމަން ވަތްކެއް ނުކުރާނެ: ރިޕޯޓު

މި ސީޒަން ނިމުމުން ބާސެލޯނާގެ ކޯޗުގެ މަގާމުން ނެދަލެންޑްސްގެ ރޮނާލްޑް ކޫމަން ވަކިނުކުރާނެ ކަމަށް ރިޕޯޓުތައް ބުނެފިއެވެ.

ބާސާގެ ކޯޗުގެ މަގާމާ ކޫމަން ހަވާލުވީ މިދިޔަ އަހަރުގެ އޯގަސްޓް މަހުގެ ތެރޭގައި ދެ އަހަރުގެ އެއްބަސްވުމެއްގެ ދަށުންނެވެ. އޭރު ބާސާގެ ރައީސަކަށް ހުރީ ޖޯސެފް މާރިއާ ބާޓޮމެއުއެވެ. އެކަމަކު މިދިޔަ އަހަރުގެ އޮކްޓޯބަރު މަހުގެ ތެރޭގައި ބާޓޮމެއު މަގާމުން އިސްތިއުފާދީފައިވާއިރު، ދާދި ފަހުން ބޭއްވި ބާސާގެ އިންތިޚާބު ޖޮއާން ލަޕޯޓާ ވަނީ ކާމިޔާބުކުރައްވާފައެވެ.

ރިޕޯޓުތައް ބުނާ ގޮތުން ލަޕޯޓާ އިންތިޚާބުވުމާއެކު، އޭނާ ވަނީ ބާސާއަށް ބައެއް ބަދަލުތައް ގެންނަށް ނިންމާފައެވެ. އެގޮތުން ބާސާގެ ކޯޗަކަށް އެ ޓީމުގެ ލެޖެންޑް ޒަވީ ހެނާންޑޭޒް ގެންނަން ލަޕޯޓާ ބޭނުންވާ ކަމަށް ރިޕޯޓުތައް ބުނެއެވެ.

އެކަމަކު މި ފަހަކަށް އައިސް ކޫމަނާއެކު ބާސާއިން އަންނަނީ މޮޅު ކުޅުމެއް ދައްކަމުންނެވެ. އެގޮތުން ސްޕެނިޝް ކަޕުގެ ފައިނަލަށް ބާސާ ދަތުރުކޮށްފައިވާއިރު، ސްޕެނިޝް ލީގުގައިވެސް އެ ޓީމުން އަންނަނީ ރަނގަޅު ނަތީޖާތަކެއް ނެރެމުންނެވެ. އެކަމަކު ދާދި ފަހުން ބާސާ ވަނީ ޔުއެފާ ޗެމްޕިއަންސް ލީގުގެ ދެވަނަ ބުރުން ކަޓާފައެވެ.

ރިޕޯޓުތައް ބުނާ ގޮތުން އެއްބަސްވުމާ އެއްގޮތަށް ކުރިއަށް އޮތް ސީޒަނުގައިވެސް ބާސާއަށް އިރުޝާދުދޭނީ ކޫމަނެވެ. އެކަމަކު ކޫމަނުގެ ކުރިމަގާ މެދު ބާސާގެ އައު ބޯޑުން ވަރަށް އަވަހަށް ގޮތެއް ނިންމާނެ ކަމަށްވެސް ސްޕެއިނުގެ ނޫސްތަކުން ވަނީ ރިޕޯޓުކޮށްފައެވެ.

އަންނަ ސީޒަނުގައިވެސް ކޫމަން ބާސާއަށް އިރުޝާދުދޭނެ ކަމަށް ރިޕޯޓުތައް ބުނިއިރު، އެ ޓީމަށް އޮތް އެންމެ ބޮޑު ޗެލެންޖަކީ ކެޕްޓަން ލިއޮނެލް މެސީ މަޑުކުރުވުމެވެ. މި ސީޒަން ނިމުމުން ހިލޭ ޓްރާންސްފާއެއްގެ ދަށުން ކުލަބު ބަދަލުކުރުމުގެ ފުރުސަތު މެސީއަށް އޮތް ނަމަވެސް، ރިޕޯޓުތައް ބުނާ ގޮތުން އަންނަ ސީޒަނުގައިވެސް މެސީ ބާސާގައި މަޑުކުރާނެއެވެ. އަދި ކޫމަނުގެ މަސައްކަތާ މެދު މެސީ ހިތްހަމަޖެހޭ ކަމަށްވެސް ރިޕޯޓުތައް ބުނެއެވެ.