ސިޓީއަށް އެއްވަނައިގައި 17 ޕޮއިންޓުގެ ލީޑެއް

އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ރެލިގޭޝަން ޒޯނުގައި އޮތް ފުލަމް އަތުން މޮޅުވެ ތާވަލުގެ އެއްވަނައިގައި މެންޗެސްޓާ ސިޓީން 17 ޕޮއިންޓުގެ ލީޑެއް ނަގައިފިއެވެ.

ރަށުން ބޭރުގައި ކުޅުނު މެޗުން ސިޓީ މޮޅުވީ 3-0 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލަނޑެއް ފެނިފައި ނުވާއިރު، ސިޓީން ލީޑު ނަގާފައިވަނީ ދެވަނަ ހާފު ފަށައިގެން ދެވަނަ މިނެޓުގައެވެ. ޔާއޯ ކަންސޭލޯ ތަނަވަސްކޮށްދިން ފުރުސަތަކުން ސިޓީއަށް ލީޑުނަގައިިދިން ލަނޑު ކާމިޔާބުކޮށްދިނީ ޑިފެންޑަރު ޖޯން ސްޓޯންސްއެވެ. އަދި މެޗުގެ 56 ވަނަ މިނެޓުގައި ގަބްރިއެލް ޖީސޫސް ވަނީ ސިޓީއަށް ލީޑު ފުޅާކޮށްދީފައެވެ.

އަދި އޭގެ ހަތަރު މިނެޓު ފަހުން ލިބުނު ޕެނަލްޓީއަކުން ސާޖިއޯ އަގުއޭރޯ ވަނީ ސިޓީގެ ތިންވަނަ ލަނޑު ޖަހާފައެވެ. މިއީ އޭރިއާ ތެރެއިން ސިޓީގެ ފެރާން ޓޮރޭސަށް ފުލަމުގެ ޓޮސިން އަޑޮރާބިއޯ ކުރި ފައުލަކަށް ރެފުރީ ދިން ޕެނަލްޓީއެކެވެ. މި މެޗުގައި އަގުއޭރޯ ލަނޑު ޖެހިއިރު، މިއީ މިދިޔަ އަހަރުގެ ޖެނުއަރީ މަހު ޝެފީލްޑް ޔުނައިޓެޑް ކޮޅަށް ލަނޑެއް ޖެހި ފަހުން ލީގުގައި އާގުއޭރޯ ޖެހި ފުރަތަމަ ލަނޑެވެ.

މި މޮޅާއެކު ތާވަލުގެ އެއްވަނައިގައި ސިޓީން 17 ޕޮއިންޓުގެ ލީޑެއް ނެގިއިރު، އެ ޓީމަށް ވަނީ ކުޅުނު 30 މެޗުން 71 ޕޮއިންޓް ލިބިފައެވެ. ދެވަނައިގައި އޮތް މެންޗެސްޓާ ޔުނައިޓެޑަށް 28 މެޗުން ލިބިފައިވަނީ 54 ޕޮއިންޓެވެ. އަދި ތާވަލުގެ ތިންވަނައިގައި އޮތް ލެސްޓާ ސިޓީއަށް 28 މެޗުން 53 ޕޮއިންޓް ލިިފައިވާއިރު، ހަތަރުވަނައިގައި ޗެލްސީ އޮތީ 29 މެޗުން 51 ޕޮއިންޓާއެކުއެވެ. ލީގުގައި ހޮނިހިރު ދުވަހުގެރޭ ޗެލްސީ ކުޅުނު މެޗުން އެ ޓީމު ވަނީ ލީޑްސް ޔުނައިޓެޑާ ލަނޑެއް ނުޖެހި އެއްވަރުވެފައެވެ.